Read tshwa Joxua 1 Bible Online

Joxua 1 - tshwa bible

Joxua 1

¹Makunu laha Mosi a nanza ga Jehova a nga file, Jehova i lo wulawula ka Joxua nʼwana Nuni, a nanza ga Mosi, aku: [1]

²A nanza ga mina Mosi i file; hikwalaho suka wena u ya tlhatuka loyi Jordani, wena ni vontlhe lava vanhu, mu ya enghena a tikweni legi nzi nyikileko a vanana va ka Israeli.

³Gontlhe wutshamu lego gi ta kanzihelwa hi mikonzo ya nwina, nzi mu nyikile gona, khwatsi hi lezi nzi byelileko Mosi.

⁴Kusukela le xiwuleni ni legi Lebanoni, kala congweni wa hombe, a congo wa Eufrate, gontlhe tiko ga maHiti, kala le ka Bimbi ga Hombe, hi le Mupela-gambo, gi tava tiko ga nwina. [2]

⁵A ku kona munhu loyi a ta nga tiya a yima mahlweni ka wena ka wontihe masiku ya wutomi ga wena; khwatsi hi lezi nzi nga hi na Mosi, nzi tava na wena, cima nzi nga ta ku tsika, hambu ni ku ku siya.

⁶Tiyisa mbilu, uva ni ntamu, hakuva hi wena u ta nga avela lava vanhu a tiko legi nzi hlambanyileko ka vararu vabye a ku va nyika gona.

⁷Ntsena tiyisa mbilu, uva ni ntamu, u chivirika ku lanzela milayo yontlhe leyi Mosi a nanza ga mina a ku leleteleko; u nga hambuki ka yona uya xineneni, hambu xibhabheni, kasi wa fela ku humelela ka zontlhe lezi u ta nga zi maha.

⁸A bhuku legi ga nayo gi nga dzuki gi hi kule ni nomu wa wena, kanilezi u ta gi alakanya mumu ni wusiku, u ti karata ku maha zontlhe lezi zi tsalilweko ka gona, kasi wa fela ku humelela ba tontlhe tindlela ta wena, u tshameka.

⁹Xana a nzi ku leletelangi, nziku: Tiyisa a mbilu, uva ni ntamu: u nga chavi, u nga tsemeki hlana; hakuva Jehova Nungungulu wa Wena i zinwe na wena kontlhe lomo u ta ngava kona.

¹⁰Zonake Joxua i lo leletela a tinduna ta vanhu, aku:

¹¹Fambani lomu magovelweni mu leletela vanhu, muku: Longisani timbuva, hakuva anzhako ka masiku manharu mu ta tlhatuka Jordani mu ya khozisa a tiko legi Jehova Nungungulu wa nwina a mu nyikileko gona a ku gi fumela. Joxua a wulawula ka tlawana wa va ka Israeli.

¹²Na Joxua i lo wulawula ka va ka Rubeni ni va ka Gadi, ni ka khihlanya ga nyangwa ya ka Manasa, aku:

¹³Alakanyani lezi Mosi, a nanza ga Jehova, a mu leleteleko tona, zo ngalo: Jehova Nungungulu wa nwina i mu nyikile kuhumula, i mu nyikile legi tiko;

¹⁴vasati va nwina ni vanana va nwina, ni zifuyo za nwina, zi ta sala lomu tikweni legi Mosi a mu nyikileko gona seno tlhatuko wa Jordani, kanilezi nwina mu ta hloma mu famba mahlweni zinwe ni vanakuloni, nwentlhe vavanuna va tinhenha ta kulwa, mu va vuna,

¹⁵kala Jehova a nyika vanakuloni a kuhumula kota nwina; va enghenawu a tikweni legi Jehova Nungungulu wa nwina a va nyikileko gona; zonake mu ta wuya tikweni ga nwina mu ta gi fumela, gona tiko legi Mosi, a nanza ga Jehova, a mu nyikileko gona seno tlhatuko wa Jordani, hi le Mutsuwuka-gambo.

¹⁶Na vona va lo hlamula Joxua, vaku: Hina hi ta maha zontlhe lezi U hi leletelako zona, hi taya ni kwihi laha u ta nga hi ruma kona.

¹⁷Kota lezi hi ingisileko Mosi ka zilo zontlhe, zinghaho hi ta ku ingisawu. Ntsena lezaku Jehova Nungungulu wa wena ave zinwe na wena, kota lezi a nga wa hi zinwe na Mosi.

¹⁸Kani hi wihi a ta nga ala ku maha zileletelo za wena, a nga ingisi timhaka ta wena leti u ta nga hi leletela ka zilo zontlhe, loye munhu i ta dawa. Ntsena lezaku wena u tiya hlana u nga mbheli ntamu.