Read tshwa Joxua 18 Bible Online

Joxua 18 - tshwa bible

Joxua 18

¹Ni wontihe tlhangano wa vanana va ka Israeli wu lo tlhangana le Xilo; zonake va lo yimisa a tenda ga mutlhangano, hakuva va wa khozisile tiko. [56]

²Kanilezi ku wa sele ntlhanu wa tinyangwa ni timbiri xikari ka vanana va ka Israeli, leti ti nga amukelangiko xiavelo xabye.

³Zonake Joxua aku ka vanana va ka Israeli: Ku ta kala rini na ma ha rivateka a kuya teka a tiko legi Jehova Nungungulu wa vararu va nwina a mu nyikileko gona ke?

⁴Hlawulani vavanuna vanharu ka nyangwa yinwe ni yinwani, nzi ta va ruma va tsemakanya a tiko va panzelela matiko hi ku tsala; zonake va ta wuya ka mina.

⁵Na vona va ta avanyisela a ntlhanu wa ziavelo ni zimbiri. Juda i ta tshama lomu tikweni gakwe le Dzongeni, ni yindlu ya ka Josefa yi ta tshama lomu tikweni ga yona le Nwalungu.

⁶Mu ta panzelela a tiko, mu panza a ntlhanu wa matiko ni mambiri, zonake mu ta neha a mapapilo ya kona laha ka mina, mina nzi ta mu hlahluveta tihlolo ka legi wutshamu mahlweni ka Jehova Nungungulu wa hina.

⁷Kanilezi a va ka Levi, a va na xiavelo xikari ka nwina, hakuva a wupristi ga Jehova hi yona tshomba yabye. Kasike Gadi na Rubeni, ni khihlanya ga nyangwa ya ka Manasa, va amukele xiavelo xabye le tlhatuko wa Jordani, hi le Mutsuwuka-gambo, leyi Mosi a nanza ga Jehova a va nyikileko. [57]

⁸A vavanuna lavo, va lo suka va famba. Na Joxua i lo va leletela a vavanuna lavo va fambako kuya panza tiko, aku: Fambani, mu tsemakanya tiko, mu gi tsalela, zonake mu ta wuya ka mina. Nzi ta mu pimela hi ku hlahluva tihlolo laha ka wutshamu legi mahlweni ka Jehova, laha Xilo.

⁹A vavanuna lavo va lo famba va tsemakanya tiko va tsalela miti ya gona lomu ka mapapilo, va gi avanyisa hi 7 wa zipanze. Zonake va lo wuya ka Joxua le wugovelweni ga le Xilo.

¹⁰Joxua i lo va pimela hi ku hlahluva tihlolo le Xilo, mahlweni ka Jehova, zonake Joxua i lo avela a tiko ka vanana va ka Israeli, i lo nyika ka munwe ni munwani a xiavelo xakwe.

¹¹Ku lo huma xiavelo xa nyangwa ya vanana va ka Benjamini, hi mingango yabye; zonake a mimbhingano ya xiavelo xabye yi wa hi xikari ka vanana va ka Juda ni vanana va ka Josefa.

¹²Ni mbhingano wabye hi tlhelo ga Nwalungu wu wa sukela Jordani, wu kanziha xitsungeni xa Jeriko hi le Nwalungu; zonake wu kanziha zitsunga za le Muhlwa-gambo, wu longoloka wuya le xiwuleni xa Bet-Avane.

¹³Wu lo suka laho wu kongoma Luza, hi le Dzongeni le Beteli; zonake wu relela Atarot-Adari hi le xitsungeni lexi xi nga le Dzongeni ga Bet-Horoni wa le hasi. [58]

¹⁴Zonake wu renzeleka wu kongoma Muhlwa-gambo hi le Dzongeni ka xitsunga lexi xi cuwukeneko ni Bet-Horoni hi le Dzongeni, zonake wu famba kala le Kiriat-Baali, ku nga Kiriat-Jearime, a muti wa vanana va ka Juda; hi tlhelo ga Muhlwa-gambo.

¹⁵Le Dzongeni wu sukela magumeso ka Kiriat-Jearime, zonake wu kongoma Muhlwa-gambo, ka hlowo ya mati ya le Neftoa;

¹⁶zonake wu relela magumo ka xitsunga lexi xi cuwukeneko ni nzhelelo wa Ben-Hinome lowu wu nga nzhelelo wa va ka Refaime, hi le Nwalungu, zonake wu relela hi nzhelelo wa Ben-Hinome, wu kongoma tlhelo ga le Dzongeni ka xitsunga xa vajebusi ni ku kala le En-Rogeli;

¹⁷zonake wu kongoma le Nwalungu, wuya En-Xemexe, wu famba hi tlhelo ga le Gelilote legi gi cuwukeneko ni ndlela leyi yi kanzihako le Adumima, zonake wu relela hi le Ribyeni ga Bohani nʼwana Rubeni.

¹⁸Zonake wu hunza wu relela hi tlhelo ga Nwalungu legi gi cuwukeneko ni libala, zonake wu relela le libaleni.

¹⁹Wu famba wu relela hi le Nwalungu ka Bet-Hogla, zonake wu ya gumesa le magumo ka Nwalungu wa Bimbi ga Munyu, hi le magumeso ka Jordani. Lowu hi mbhingano wa le Dzongeni.

²⁰Ni Jordani i lo maha mbhingano hi tlhelo ga Mutsuwuka-gambo. Leyi hi tshomba ya vanana va ka Benjamini, hi mimbhingano ya kona hi matlhelo wontihe, hi mingango yabye.

²¹Makunu a miti ya lixaka la vanana va ka Benjamini hi mingango yabye, hi leyi: Jeriko, ni Bet-Hogla, ni Emeki-Ziza;

²²ni Bet-Araba, ni Zemarime, ni Beteli;

²³ni Avima, ni Para, ni Ofra;

²⁴ni Kefar-Amonai, ni Ofni, ni Geba; 12 wa miti ni zimitana za yona.

²⁵Ni Gibeoni, ni Rama, ni Beeroti;

²⁶ni Mizpa, ni Kefira, ni Moza;

²⁷ni Rekemu, ni Irpeeli, ni Tarala;

²⁸ni Zela, ni Elefa, ni Jebusi (ku nga kona Jerusalema), ni Gibea, ni Kiriati; 14 wa miti ni zimitana za yona. Leyi hi tshomba ya vanana va ka Benjamini hi mingango yabye.