Read tshwa Joxua 23 Bible Online

Joxua 23 - tshwa bible

Joxua 23

¹Laha ku nga wa hunzile masiku yo tala, laha Jehova a nga wa nyikile kuhumula ka vanana va ka Israeli ka vontlhe valala vabye lava va nga wa va ranzele, na Joxua i wa hi wa kale hi kuva ni malembe yo tala,

²Joxua i lo tsombanyisa vontlhe va ka Israeli, a masingalakati yabye, ni madota yabye, ni Valamuli vabye, ni tinduna ta tixaka tabye, aku kabye:

³Mina nzi wa kale, nzi na ni malembe yo tala. Na nwina mu wonile zontlhe lezi Jehova Nungungulu wa nwina a zi mahileko ka wontihe matiko lawa hi kota ya nwina; hakuva hi Jehova Nungungulu wa nwina loyi a nga mu lwela.

⁴Langutani, nzi mu avele lawa matiko hi ku hlahluvela, wona matiko lawa ma seleko ni wontihe matiko lawa nzi ma lovisileko kusukela Jordani, kala le Bimbini ga Hombe, hi le Muhlwa-gambo, kasi gi maha tshomba ya nwina, ni zizukulwana za nwina.

⁵Na Jehova Nungungulu wa nwina i ta va panzanya yena wutsumbu mahlweni ka nwina, i ta va wutlela tiko mahlweni ka nwina, na nwina mu ta va ni tiko gabye khwatsi hi lezi Jehova Nungungulu wa nwina a wulileko ka nwina. [69]

⁶Hikwalaho tiyani nguvu, mu hlayisa ni ku maha zontlhe lezi zi tsalilweko lomu bhukwini ga nayo wa Mosi, mu nga hambuki xineneni hambu xibhabheni.

⁷Mu nga hlengeli ni matiko lawa maseleko xikari ka nwina; mu nga dzuki mu kumbuka mavito ya vanungungulu vabye, ge hambu ku hlambanya ha vona; mu nga dzuki mu va khozela ni ku va khizamela.

⁸Kanilezi namarelani ka Jehova Nungungulu wa nwina, khwatsi hi lezi mu mahileko kala nyamutlha.

⁹Hakuva Jehova i hlongolile mahlweni ka nwina a matiko ya hombe ya ntamu, ni lezi a nga kona munhu a zi kotako ku yima mahlweni ka nwina kala legi siku.

¹⁰Munhu munwe wa nwina i ta hlongola a 1,000 wabye; hakuva hi Jehova Nungungulu wa nwina a mu lwelako, khwatsi hi lezi a mu tsumbisileko. [70]

¹¹Hikwalaho chelani kota mu ti tlharihela, kasi mu fela ku ranza Jehova Nungungulu wa nwina.

¹²Hakuva loku nwina mu tlhelela nzhako, mu namarela ka misalela ya lawa matiko, lava va tshamileko xikari ka nwina, ni loku mu tekelana navo vavasati, mu teka kabye vonawu va teka ka nwina,

¹³zi tiveni futsi lezaku; Jehova Nungungulu wa nwina a nga ta ha hlongola lawa matiko mahlweni ka nwina; kanilezi va ta maha a phanya ni tlhamu ka nwina, ni limhika mareveni ya nwina ni mizwa mahlweni ya nwina, mu kala nwina mu lobyiswa ka legi tiko go saseka legi Jehova Nungungulu wa nwina a mu nyikileko gona. [71]

¹⁴Langutani, inyamutlha mina nza famba hi ndlela ya yontlhe misava. Nwina ma zi tiva khwatsi hi timbilu tontlhe ta nwina ni mihefemulo yontlhe ya nwina, lezaku ku hava ni ginwe gezu ka wontihe magezu yo saseka lawa Jehova Nungungulu wa nwina a ma wulileko hehla ka nwina, ma nga kala ku maheka; kanilezi ma mahekile wontihe, ku hava ni gezu ginwe gi wileko hasi.

¹⁵Ku ta ku khwatsi hi lezi a magezu wontihe lawa Jehova Nungungulu wa nʼwina a mu byelileko wona ma mahekileko, zi tava nghaho kambe Jehova i ta tiyisa hehla ka nwina wontihe magezu lawa yo biha, mu kala mu mbhela lomu ka tiko legi go saseka, legi Jehova Nungungulu wa nwina a mu nyikileko gona.

¹⁶Loku mu hambunyeta xivumelwano lexi Jehova Nungungulu wa nwina a mu leleteleko xona, mu ya khozela vanwani vanungungulu, mu khizama mahlweni ka vona, a zanga ya Jehova yi ta mu vukela, na nwina mu ta hatlisa mufa lomu ka tiko legi go saseka, legi a mu nyikileko gona. [72]