Read tshwa Joxua 24 Bible Online

Joxua 24 - tshwa bible

Joxua 24

¹Joxua i lo tsombanyisa tixaka tontlhe ta ka Israeli le Xekemi, ni ku ramba a masingalakati ya ka Israeli, ni tihosana tabye, ni valamuli vabye, ni tinduna tabye ta yimpi; va lo ta yima mahlweni ka Nungungulu.

²Zonake Joxua i te ngalo ka vontlhe vanhu: Jehova Nungungulu wa Israeli i ngalo: A xikhatini xa kaleloko a vararu va nwina, yena Tera a raru wa Abrahama, ni raru wa Nahori, va wa lo aka le tlhatuko wa congo, va khozela vanwani vanungungulu.

³Zonake nzi lo teka a raru wa nwina Abrahama le tlhatuko wa congo, nzi mu fambisa xikari ka gontlhe tiko ga Kanani, nzi mu anzisela pswalo wakwe, nzi mu nyika Isaka. [73]

⁴Na Isaka nzi lo mu nyika Jakobe na Esau. Esau nzi lo mu nyika xitsunga xa Seire, xi maha xakwe; kanilezi Jakobe ni vanana vakwe va lo relela Gipite. [74]

⁵Na mina nzi lo ruma Mosi na Aroni, nzi xanisa a vaGipite, khwatsi hi lezi nzi mahisileko zona xikari kabye; nzi wuya nzi mu humesa lomo.

⁶Makunu na nzi humesile vararu va nwina le Gipite, mu kala mu chikela le bimbini, a vaGipite va lo hlongolisa vararu va nwina hi tikareta zinwe ni vakhileli va mahaxi kala le Bimbini go Pswhuka.

⁷Laha va nga rila ka Jehova, yena i lo veka munyama xikari ka nwina ni vaGipite, i lo wuyisa a bimbi hehla ka vona gi va fenengeta. A mahlo ya nwina ma wonile lezi nzi zi mahileko ka vaGipite; zonake mu lo tshama xiwuleni masiku yo tala.

⁸Na mina nzi lo mu heleketa tikweni ga maAmori lava va akileko le tlhatuko wa Jordani, vona va lolwa na nwina; kanilezi mina nzi lo va nyikela canjeni ga nwina, kala mu teka a tiko gabye; mina nzi lo va lovisa mahlweni ka nwina.

⁹Zonake Balaki a nʼwana Zipora, a hosi ya maMoabi, i lo suka alwa na Israeli; yena i lo rumela vanhu kuya vitana Balaami a nʼwana Beori, kasi ku ta mu phunga.

¹⁰Kanilezi mina a nzi lo ala ku ingisa Balaami, hikwalaho yena i lo mu katekisa, nzi mu ponisa canjeni gakwe.

¹¹Nwina mu lo tlhatuka Jordani, mu chikela Jeriko. A va le Jeriko, ni maAmori, ni vaPerezi, ni vaKanani, ni vaHiti, ni vaGirgaxi, ni vaHivi, ni vajebusi va lolwa na nwina, kanilezi mina nzi lo va nyikela canjeni ga nwina.

¹²Na mina nzi rumile mivi mahlweni ka nwina, leyi yi nga hlongola mahlweni ka nwina a tihosi timbiri ta vaAmori; cima na ku nga hi tlhari ga wena ni wura ga wena.

¹³Nzi mu nyikile a tiko legi mu nga gi tirangiko ni miti leyi mu nga yi akangiko, makunu mu tshamile ka yona: maga mihanzu ya xivina ni maoliva, lezi nwina mu nga byalangiko. [75]

¹⁴Makunu chavani Jehova mu mu khozela hi ku kholeka ni zinene. Susani a vanungungulu lava a vararu va nwina va nga wa va khozela le tlhatuko wa congo ni le Gipite, mu khozela Jehova.

¹⁵Kanilezi loku zi woneka na zi bihile mahlweni ka nwina a ku khozela Jehova, hlawulani legi siku loyi mu ta nga mu khozela; kutani mbanungungulu lava a vararu va nwina va nga wa va khozela le tlhatukweni wa congo, kutani mbanungungulu va maAmori, lava mu akileko tikweni gabye. Kanilezi mina ni ngango wa mina hi ta khozela Jehova.

¹⁶Ni vanhu va lo hlamula vaku ngalo: A zive kule na hina leʼza ku tsika Jehova hi ya khozela vanwani vanungungulu!

¹⁷Hakuva Jehova i Nungungulu wa hina. Hi yena a nga hi humesa zinwe ni vadadani Va hina le tikweni ga Gipite, le ndlwini ya wukhumbi, ni loyi a mahileko masingita ya hombe mahlweni ka hina. Kambe hi yena a nga hi hlayisa lomu ndleleni yontlhe leyi hi fambileko hi yona, ni xikari ka matiko lawa hi tsemakanyileko ka wona.

¹⁸Na Jehova i hlongole mahlweni ka hina wontihe matiko, ni maAmori lawa ma nga wa akile tikweni legi. Hikwalaho hina hi ta khozela Jehova, hakuva hi yena Nungungulu wa hina.

¹⁹Na Joxua i te ngalo ka vanhu: Nwina a mu zi koti ku khozela Jehova, hakuva yena i Nungungulu wa kubasa, ni Nungungulu wo pinyama. Yena a nga ta timisela a zihambuko za nwina ni zionho za nwina. [76]

²⁰Hi lezi loku ma nga fularela Jehova, mu ya khozela vanwani vanungungulu, yena i ta hunzuluka a mu mahela kubiha, a mu lovisa, laha ka kuva i wa mu mahele kusasa.

²¹Zonake a vanhu va te ngalo ka Joxua: Kokwihi, hina hi ta khozela Jehova!

²²Na Joxua i te ngalo ka vanhu: Nwina venyi mu vakustumunyu vaku mu hlawulile Jehova a ku khozela yena. Na vona va te ngalo: Hina hi vakustumunyu.

²³Joxua aku: Loku zi nghaho, susani vanungungulu va vamatiko, mu hunzuluka hi timbilu ta nwina ka Jehova Nungungulu wa ka Israeli.

²⁴Zonake a vanhu va te ngalo ka Joxua: Hina hi ta khozela Jehova Nungungulu wa hina, ni gezu gakwe hi ta gi ingisa.

²⁵Zonake Joxua i lo maha xivumelwano ni vanhu lego siku, ni ku va vekela nayo ni xileletelo leyo Xekemi.

²⁶Na Joxua i lo tsala timhaka leti lomu bhukwini ga nayo wa Nungungulu: ni ku teka a ribye ga hombe a gi yimisa kwalaho lahasi ka nkuhlu lowu wu nga wa hi kusuhani ni wutshamu go basa ga Jehova. [77]

²⁷Zonake Joxua aku ngalo ka vanhu vontlhe: Langutani, ribye legi gi tava kustumunyu gi ta nga hi kecara, hakuva gi zwile tontlhe timhaka leti Jehova a wulileko ka hina, gi tava kustumunyu lezaku mu nga dzuki mu kaneta Nungungulu wa nwina.

²⁸Zonake Joxua i lo fambisa vanhu, munwe ni munwani a famba tshombeni yakwe.

²⁹Anzhako ka lezi zilo, Joxua nʼwana Nuni, a nanza ga Jehova, i lofa na a hi ni 110 wa malembe.

³⁰Va lo mu lahla lomu misaveni ya tshomba yakwe le Timnati-Sera, le xitsungeni xa ka Efraime, hi le Nwalungu ka xitsunga xa Gaaxi.

³¹Na Israeli i lo khozela Jehova wontihe masiku ya Joxua, ni ka masiku wontihe ya masingalakati lawa ma hanyileko anzhako ka kufa ka Joxua, lava va nga wa tiva mitiro yontlhe leyi Jehova a nga wa yi maha ka vaIsraeli.

³²Ni marambu ya Josefa lawa a vanana va ka Israeli va ngata nawo hi le Gipite, va lo ma kelela leyo Xekemi, hi tlhelo ga xipanze xa sava lexi Jakobe a nga wa xavile ka vanana va Hamori a raru wa Xekemi, hi zana ga zipanze za mali, ni simu lego gi lo maha a tshomba ya vanana va Josefa. [78]

³³Zonake ku lofa Eliazari nʼwana Aroni, va lo mu lahla xitsungeni xa ka Finiasi, a nʼwana wakwe, lexi a nga wa nyikilwe lomu tikweni ga zitsunga za Efraime.