Read tshwa Joxua 3 Bible Online

Joxua 3 - tshwa bible

Joxua 3

¹Joxua i lo vuka ni mixo, zonake vontlhe a vanana va ka Israeli va lo suka le Xitime va famba va ya chikela le Jordani, va yima laho, na va nga se tlhatuka a congo.

²Zonake a anzhako ka masiku manharu, a tinduna ti lo famba lomu wugovelweni,

³ti leletela vontlhe lezaku: Loku mu wona a nghaxa ya xivumelwano xa Jehova Nungungulu wa nwina na gi rwelwe hi vapristi va vaLevi, mu ta suka lomu mu govileko kona, mu famba lenzhako ka yona.

⁴Kanilezi a kuve kona a pfhukana xikari ka gona na nwina wa xipimo xa 2,000 wa mikono, mu nga tshineli laha kusuhani kasi mu wona a ndlela leyo mu ta nga famba ha yona, hakuva nwina a mu se nga famba hi leyo ndlela ka masiku ma hunzileko.

⁵Na Joxua i te ngalo ka vanhu: Basisani wutsumbu ga nwina, hakuva manziko Jehova i ta maha zihlamaliso xikari ka nwina. [5]

⁶Zonake Joxua i lo byela vapristi, aku: Tekani a nghaxa ya xivumelwano, mu famba mahlweni ka vanhu. Zonake va lo rwala a nghaxa ya xivumelwano, va famba mahlweni ka vanhu.

⁷Jehova i te ngalo ka Joxua: Inyamutlha nzi ta sangula ku ku kulisa mahlweni ka vontlhe va ka Israeli, kasi va fela ku zi tiva lezaku nzi tava na wena khwatsi hi lezi nzi nga hi zinwe na Mosi.

⁸Makunu u ta leletela a vapristi lava va rwalako a nghaxa ya xivumelwano uku: Loku mu chikela mbhirini ya mati ya Jordani, mu ta yima lomu Congweni wa Jordani.

⁹Joxua i te ngalo ka vanana va ka Israeli: Tshinelani mu tazwa timhaka ta Jehova Nungungulu wa nwina.

¹⁰Zonake Joxua aku: Inyamutlha mu ta zi tiva lezaku i kona Nungungulu a hanyako xikari ka nwina, ni lezaku futsi i ta panzanya mahlweni ka nwina a vaKanani, ni vaHiti, ni vaHivi, ni vaPerezi, ni vaGirgaxi, ni vaAmori, ni vajebusi.

¹¹Languta, a nghaxa ya xivumelwano xa Hosi ya yontlhe misava, yi ta ranga mahlweni ka nwina yi tlhatuka Jordani.

¹²Makunu lezi humesani 12 wa vavanuna lomu ka tinyangwa ta ka Israeli, a nyangwa ni nyangwa yi humesa a wanuna munwe.

¹³Hakuva laha mikonzo ya vapristi lava va rwalako a nghaxa ya Jehova a Hosi ya misava yontlhe yi ta nga yima matini ya Jordani, a mati ya Jordani lawa ma tako hi le hehla, ma ta tsemeka ma yima, ma maha xitsunzulu.

¹⁴Laha a vanhu va nga huma hi lomu matendeni yabye a ku ya tlhatuka Jordani, a vapristi lava va rwalako a nghaxa ya xivumelwano va lo ranga mahlweni ka vanhu.

¹⁵Lava va rwalako a nghaxa na va chikele Jordani, loku mikonzo yabye yi pelile matini (hakuva a congo wa Jordani wa kukumuka, wu halakela wontihe a fungu xontlhe xikhati xa kuhula); [6]

¹⁶a mati lawa ma relelako mata hi le hehla, ma lo ta yima ma kukumuka ma maha xitsunzulu hi le kule nguvu, kala kusuhani ni le Adama, a muti lowu wu nga tlhelo ga Zaretani; ni mati lawa ma relelako le Bimbini ga Libala, gi nga Bimbi ga Munyu, ma lo kokiwa wontihe, zonake a vanhu va lo tlhatuka hi laha ko cuwukana na Jeriko. [7]

¹⁷Ni vapristi lava va rwalako a nghaxa ya xivumelwano xa Jehova va lo yima vaku tseka hi mikonzo lomu ku omileko laha xikari ka Jordani, zonake vontlhe va ka Israeli va lo famba muhanzeni wu omileko, kala vontlhe vanhu va tlhatuka Jordani.