Read tshwa Joxua 4 Bible Online

Joxua 4 - tshwa bible

Joxua 4

¹Zonake laha vontlhe vanhu va nga wa tlhatukile Jordani, Jehova i te ngalo ka Joxua:

²Teka 12 wa vavanuna ka tontlhe tinyangwa, a nyangwa yinwe ni yinwani ku huma wanuna munwe;

³mu va leletela ku ngalo: Tekani kwalomu xikari ka Jordani, laha va yimileko vapristi vaku tseka, mu teka 12 wa maribye mu rwala mu ta ya ma veka laha mu ta nga gova kona wusiku legi.

⁴Joxua i lo vitana 12 wa vavanuna lava a va hlawulileko xikari ka vanana va ka Israeli, wanuna munwe ka nyangwa ni nyangwa;

⁵aku ka vona: Hunzani muya mahlweni ka nghaxa ya Jehova Nungungulu wa nwina, lomu xikari ka Jordani, munwe ni munwani a tlakula a ribye a gi rwala laha makatleni yakwe, khwatsi hi tsengo wa tinyangwa ta vanana va ka Israeli,

⁶kasi xi maha xiwoniso xikari ka nwina. Laha a vanana va nwina va ta nga ta mu wutisa hi zikhati za ha tako vaku: Ma kombisa yini lawa maribye ke? [8]

⁷Zonake mu ta va byela ku ngalo: A mati ya Jordani ma wa lo avanyeka mahlweni ka nghaxa ya xivumelwano xa Jehova; laha yona yi nga tlhatuka Jordani a mati lawa ya Jordani ma lo avanyeka, ni lawa maribye xialakanyiso xikari ka vanana va ka Israeli kala kupinzuka.

⁸A vanana va ka Israeli va lo maha khwatsi hi lezi Joxua a va leletelako; va lo teka 12 wa maribye lomu xikari ka Jordani, khwatsi hi lezi Jehova a leleteleko ka Joxua; va lo rwala khwatsi hi tsengo wa tinyangwa ta vanana va ka Israeli; va lo ma rwala va famba nawo kala ka wutshamu lego va ngaya etlela kona, va lo ma veka laho.

⁹Na Joxua i lo yimisa 12 wa maribye lomu xikari ka Jordani, laha ku nga wa yimile mikonzo ya vapristi lava va rweleko a nghaxa ya xivumelwano, na wona ma kona laho kala inyamutlha.

¹⁰Ni vapristi lava va rwalako a nghaxa va lo yima laha xikari ka Jordani kala ku mahiwa zontlhe lezi Jehova a leleteleko Joxua a ku byela vanhu khwatsi hi lezi Mosi a leleteleko zontlhe zilo ka Joxua, zonake a vanhu va lo hatlisa ku tlhatuka.

¹¹Laha vontlhe vanhu va nga wa tlhatukile, a nghaxa ya Jehova ni vapristi va lo tlhatuka va ranga mahlweni ka vanhu.

¹²Ni vanana va ka Rubeni, ni vanana va ka Gadi, ni khihlanya ga nyangwa ya ka Manasa, va lo fambawu na va hlomile zinwe ni vanana va ka Israeli, khwatsi hi lezi Mosi a va leleteleko.

¹³Va wa hi 40,000 wa vavanuna lava va hlomileko, va fambako mahlweni ka Jehova ku yalwa le mikoveni ya Jeriko.

¹⁴Hi lego siku Jehova i lo kulisa Joxua mahlweni ka vaIsraeli vontlhe, zonake va lo mu chava kota lezi va nga wa chava Mosi ka wontihe masiku ya wutomi gakwe.

¹⁵Na Jehova i lo wulawula ka Joxua, aku:

¹⁶Byela vapristi lava va rwalako a nghaxa ya wukustumunyu va huma lomu Jordani.

¹⁷Zonake Joxua i lo byela vapristi, aku: Humani lomo matini ya Jordani!

¹⁸Laha na vapristi lava va rwalako a nghaxa ya xivumelwano xa Jehova na va humile lomu Jordani, zalezo na mikonzo: yabye ya ha humako yi kanzihela lomu muhanzeni, a mati ya Jordani ma lo tlhelela wutshanwini ga wona, ma khulungela gontlhe wutshamu ga wona kota kale.

¹⁹Ni vanhu va lo tlhatuka Jordani hi siku ga 10 ga hweti yo ranga, va loya gova le Gilgale, le mbhinganweni wa le Mutsuwuka-gambo wa Jeriko.

²⁰Na Joxua i lo yimisa maribye lawo ya 12 le Gilgale, lawa va nga wa ma tekile le Jordani.

²¹Yena i lo byela a vanana va ka Israeli, aku: Loku a vanana va nwina va wutisa ginwani siku ka vararu vabye, vaku: Nja yini lawa maribye ke?

²²Zonake mu ta tivisa a vanana va nwina, lezaku: Israeli i lo tlhatuka loyi Jordani na ku womile laha,

²³Hakuva Jehova Nungungulu wa nwina i lo pswhisa mati lawa ya Jordani mahlweni ka nwina mu kala mu tlhatuka, kota lezi Jehova Nungungulu wa nwina a nga maha hi Bimbi go Pswhuka legi a nga gi pswhisa mahlweni ka hina hi kala hi tlhatuka.

²⁴Kasi wontihe matiko ya misava ma fela ku tiva lezaku a canja ga Jehova gi na ni ntamu, ni lezaku nwina mu ta chava Jehova Nungungulu wa nwina, kala kupinzuka. [9]