Read tshwa 2 Va le Tesalonika 1 Bible Online

2 Va le Tesalonika 1 - tshwa bible

2 Va le Tesalonika 1

¹Paule, na Silvanusi, na Timote, ha rungula a bandla ga va le Tesalonika, legi gi nga ka Nungungulu Dadani wa hina, ni ka Hosi Jesu Kristu, hiku: [1]

²A tipswalo ni kurula a zive na nwina, na zi huma hi ka Nungungulu Dadani ni Hosi Jesu Kristu.

³Hi yimelwe hi ku mu bonga Nungungulu xontlhe xikhati ha nwina, vamakabye; zi fanele kakuva a kukholwa ka nwina ka kula nguvu, ni kuranzana ka nwina nwentlhe ka su enzeleka; [2]

⁴laha ka kuva hina hi ti tlakusa ha nwina mabandleni ya Nungungulu, hi kota ya kutimisela ni kukholwa ka nwina kuxanisekeni kontlhe ka nwina, ni mihlomulweni leyi mu yi zwako. [3]

⁵Lezo za komba lezaku a kulamula ka Nungungulu ku lulamile; aku kasi ma fela ku hlayelwa lezaku mu fanelwe hi mufumo wa Nungungulu, lowu mu xanisekelako wona. [4]

⁶Hakuva xilo xi lulamileko ka Nungungulu ku tlhelisela hlomulo ka lava va mu xanisako. [5]

⁷Ni ku nyika nwina lava mu xanisekako a ku humula zinwe na hina, laha Hosi Jesu a ta nga wonekeliswa hi le tilweni zinwe ni tingelosi ta ntamu wakwe phingweni ga nzilo, [6]

⁸a ta va tlhelisela lava va nga mu tiviko Nungungulu, ni lava va nga ingisiko ivangeli ya Hosi ya hina Jesu. [7]

⁹Vona va ta tsayiswa hi kulobyiswa ka pinzukelwa, va hlongolwa mahlweni ka Hosi ni ka kungangamela ka ntamu wa yona, [8]

¹⁰hi siku lego a ta ngata ha gona a kuta dumiswa ka vobasa vakwe, ni kuva wo hlamalisa ka vontlhe lava va kholilweko; hakuva mu kholilwe a wukustumunyu ga hina.

¹¹Hi kota ya lezo hina ha mu khongelela xontlhe xikhati, lezaku a Nungungulu wa hina a fela ku wula lezaku mu fanele a kuvitanwa ka nwina, a tira hi ntamu wakwe yontlhe mixuvo yo saseka ni mitiro yontlhe ya kukholwa nzeni ka nwina;

¹²kasi a vito ga Hosi ya hina Jesu ga fela ku dumiswa ka nwina, na nwinawu mu dumisiwa ka yena, hi tipswalo ta Nungungulu wa hina ni Hosi Jesu Kristu. [9]