Read tshwa 2 Va le Tesalonika 2 Bible Online

2 Va le Tesalonika 2 - tshwa bible

2 Va le Tesalonika 2

¹Makunu vamakabye, hi kukumbuka a kuwuya ka Hosi ya hina Jesu Kristu, ni kutsombana ka hina na yena, ha mu khongotela [10]

²lezaku mu nga hatlisi ku tsekatsekiswa kupimeni ka nwina, hambu ku karateka, kutani hi moya, kutani hi mhaka, kutani hi papilo go khwatsi gita hi ka hina, aku khwatsi a siku ga Hosi gi tshinele.

³Mu nga kanganyiswi hi munhu ha nchumu; hakuva a kuranga ku tava kona kutlhelela nzhako, ku wonekeliswa a Munhu wa kuonha, a nga nʼwana wa kulahleka, [11]

⁴loyi a vukelako ni ku ti kulisa hehla ka zontlhe zi vitwako mingungulu, ni zontlhe lezi zi khozelwako; a kala a ya tshama tempeleni ya Nungungulu, a ti wula lezaku i Nungungulu. [12]

⁵A mu alakanyi lezaku na nza ha hi na nwina, nzi lo mu byela lezi zilo ke?

⁶Makunu ma zi tiva lezi zi mu tsimbetelako, a kala a wonekeliswa hi xikhati xakwe.

⁷Hakuva a fihlakalo wo hambunyeta nayo wu sina wu tira ni lezi; kanilezi wu tira ntsena kala a susiwa loyi a wu tsimbetelako. [13]

⁸Zonake i ta wonekeliswa a xihunza-milayo, loyi Hosi Jesu a ta nga mu daya hi xikuhe xa nomu wakwe, a mu lovisa hi kuwonekeliswa ka kuwuya kakwe. [14]

⁹A zihunza-milayo xi tata hi kota ya kutira ka Satani, na xi hi ni ntamu wontihe ni ziwoniso ni zirewukiso za mawunwa, [15]

¹⁰a hi ni kukanganyisa kontlhe ku nga lulamangiko, kasi ku khohlisa lava va lovako; hakuva a va vumelangi ni ku ranza zinene, lezi zi nga va hanyisako. [16]

¹¹Hikwalaho Nungungulu wa va rumela a ntamu lowu wu hambukisako, kasi va fela ku kholwa mawunwa; [17]

¹²lezaku va fela ku lamulwa vontlhe lava va nga kholwangiko zinene, kanilezi va xalala hi lezi zi nga lulamangiko.

¹³Kanilezi hina hi yimelwe hi ku mu bonga Nungungulu xontlhe xikhati ha nwina, vamakabye va ranzekako va Hosi; hakuva Nungungulu i lo mu hlawula hi le kusanguleni a kuva mu hanyiswa hi kubasiswa hi Moya ni kukholwa ka zinene.

¹⁴Hizalezo a mu vitaneleko zona hi ivangeli ya hina, kasi ma hlengela a kungangamela ka Hosi ya hina Jesu Kristu.

¹⁵Hikwalaho, vamakabye, yimani muku nde, mu khomisisa a gonzo leyi mu nga gonziswa yona, kutani hi nomu, kutani hi papilo ga le ka hina. [18]

¹⁶A Hosi ya hina Jesu Kristu, ni Nungungulu a Dadani wa hina, loyi a hi ranzileko, ni ku hi nyika a kutangaliswa ka pinzukelwa, ni kutsumba ko saseka hi tipswalo takwe, [19]

¹⁷a tangalise timbilu ta nwina, a mu tiyisa mitirweni yontlhe yo saseka ni kuwulawula ku lulamileko.