Read tshwa 1 Timote 4 Bible Online

1 Timote 4 - tshwa bible

1 Timote 4

¹Kanilezi a Moya wa wula wu tiyisa lezaku a vanwani va ta tsika kukholwa a zikhatini za ha tako, va ingisa a mimoya leyi yi kanganyisako ni gonzo ya madimoni, [22]

²hi kota ya wuxengeteli ga vanhu va kanelako mawunwa, lava a livalo labye li hisilweko khwatsi hi xiketse xo hisa. [23]

³Va tsimbetela a ku tekana, va laya ku kala ku nga giwi zakuga lezi Nungungulu a zi vangeleko lava va kholwako ni lava va tivako zinene, lezaku zi amukelwa hi kubonga. [24]

⁴Hakuva zontlhe zi vangilweko hi Nungungulu zi nene, a ku na nchumu lexi xi faneleko ku nyenyiwa loku xi amukelwa hi kubonga; [25]

⁵hakuva zi basiswa hi mhaka ya Nungungulu ni kukhongela.

⁶Loku u byela a vamakabye timhaka leti, u tava nanza gi nene ga Kristu Jesu, legi gi wundlilweko timhakeni ta kukholwa, ni ka gonzo yi nene leyi u yi lanzeleko. [26]

⁷Kanilezi ala a mafenya ni mitsheketo ya vavasati va kale. Ti tolovete a kuhanya ka kukholwa.

⁸Hakuva a ku ti toloveta a ntiro wa miri ka vuna kutsongwani, kanilezi a kuhanya ka kukholwa ka vuna zilweni zontlhe; ku na ni xitsumbiso xa wutomi kuhanyeni loku ni ka loku ku tako. [27]

⁹A mhaka leyi yi tiyile, yi fanele ku amukelwa kontlhe. [28]

¹⁰Hi xona xigelo xa kutira ka hina ni kulwa, hakuva hi tsumbile a Nungungulu a hanyako, loyi a nga Muhanyisi wa vanhu vontlhe, nguvunguvu lava va kholwako.

¹¹Leletela vanhu a timhaka leti, u va gonzisa tona.

¹²Ngha a nga hi kona loyi a ku kanyisako hilezi u nga jaha, kanilezi ngha u hi xiwonelo ka makholwa hi kuwulawula, ni mahanyela, ni liranzo, ni kukholwa ni kuhlazeka. [29]

¹³Pinyamela ku gonzela vanhu a mitsalo, ni ku luleka ni ku gonzisa, nzi kala nzita.

¹⁴U nga mahi mihoni hi xinyikiwo lexi xi nga ka wena, lexi u nga nyikiwa xona hi kuprofeta zinwe ni kutlhatekwa ka mandla ya masingalakati. [30]

¹⁵Pangama mitirweni leyi, u ti nyikela gontlhe wutsumbu ga wena ka yona; kasi a kuya mahlweni ka wena ka woneka ka vanhu vontlhe.

¹⁶Ti wonele wutsumbu ga wena, ni kugonziseni ka wena; nonohisa ka zona, hakuva hi ku maha lezo u ta hanyisa wutsumbu ga wena, ni lava va ku zwako kambe. [31]