Read tshwa 1 Timote 6 Bible Online

1 Timote 6 - tshwa bible

1 Timote 6

¹Vontlhe lava va nga tikhumbi lahasi ka gota a va dzunze a venyi vabye, kasi a vito ga Nungungulu ni gonzo yakwe zi nga soliwi. [44]

²Lava va nga ni venyi va kholwako, ngha va nga va kanyisi, hilezi va nga vamakabye; kanilezi ngha va va tirela nguvunguvu, kota lezi va nga makholwa ni varanzekako, vona lava va vuniwako hi vona. Gonzisa timhaka leti, u luleka ha tona. [45]

³Loku ku hi ni munhu a gonzisako a gonzo yinwani, a nga namareli timhakeni ti nene, tona timhaka ta Hosi ya hina Jesu Kristu, ni gonzo leyi yi lulamileko,

⁴yena i kukumukile na a nga tivi nchumu, i na ni wubabyi ga ku wutisa ziwutiso ni ku kanetisana hi timhaka, laha ku humako kona a makangwa, ni kuholova, ni tihlamba, ni kualakanyela kubiha, [46]

⁵ni kukanetisana ka vanhu lava va bihisilweko kupimeni kabye, lava va lahlekelweko hi zinene, na va alakanya lezaku a xikholwa i ndlela ya bhinzu. [47]

⁶Kunene a kukhozela Nungungulu hi kutsaka i bhinzu ga hombe. [48]

⁷A hi tangi na nchumu laha misaveni, zi te dlunya lezaku a hi zi koti ku teka nchumu loku hi suka ka yona. [49]

⁸Loku hi hi ni zakuga ni kuambala, ngha hi eneliswa ha zona. [50]

⁹Kanilezi lava va ranzako a ku ngha va fuma, va wela kuringweni ni maphanyeni, ni kumbilukeleni kunyingi ka wupumbu ku bayisako, lezi zi nyupetako vanhu kulobyisweni ni kulahlekeni. [51]

¹⁰Hakuva a ku ranza mali hi mutsu wa tixaka tontlhe ta kubiha; a vanwani hi ku yi navela va pengile kukholweni, va ti phoroketile hi kuxaniseka kunyingi. [52]

¹¹Kanilezi wena munhu wa Nungungulu, potsoloka lezi zilo, u hlota kululama, a kukhozela Nungungulu, a kukholwa, a liranzo, a kutimisela, ni kurula. [53]

¹²Lwana a kulwa ko saseka ka kukholwa, u khomisisa a wutomi ga pinzukelwa, legi u vitanelweko gona, laha u nga vumela a kuvumela ko saseka mahlweni ka vakustumunyu vanyingi. [54]

¹³Mina nza ku laya mahlweni ka Nungungulu, loyi a nyikako kuhanya ka zontlhe, ni mahlweni ka Kristu Jesu, loyi a nga kustumunya mahlweni ka Pontiu Pilatu hi kuvumela kunene, [55]

¹⁴lezaku u gonga a kulaya loku, na u nga hi na bala ni kusoleka, yi kala yi wonekeliswa a Hosi ya hina Jesu Kristu, [56]

¹⁵loku ku ta nga maheka hi xikhati xa yena, loyi a nga yece a Hosi ya ntamu yi bongekako, a Hosi ya tihosi, ni Mufumeli wa vafumeli; [57]

¹⁶a nga yena yece loyi a nga hiko na kufa, loyi a tshamileko kuwonekeleni loku ku nga hiko na kutshinelelwa; loyi a nga woniwangiko hi munhu, hambu ku zi kota ku mu wona; a ka yena a kuve kudzunziwa ni ntamu wa pinzukelwa. Amen! [58]

¹⁷Laya vona lava va fumileko laha misaveni, lezaku va nga ti kukumukisi, va nga tsumbi kufumeni ku nga tiyangiko, kanilezi va tsumba Nungungulu, loyi a hi nyikako zilo zontlhe hi matsenya lezaku hi tsaka ha zona.

¹⁸Va laye lezaku va maha zo saseka, va fuma hi mitiro yi nene, va ranza ku avela vanwani a zilo zabye, va hana;

¹⁹lezaku va ti veketela a tshomba leyi yi ta ngava a xiseketelo xi nene a xikhatini xa ha tako, lezaku va fela ku kuma wutomi legi gi nga wutomi hizinene.

²⁰O Timote, gonga lezi zi vekilweko ka wena, u ala a kubyabyatsa ka hava ni kukanetana loku ku vitanwako aku wutlhari na gi nga hi gona;

²¹Vanwani hi ku gi vumela va tsanzekile kukholweni. A tipswalo a tive na wena!