Read tshwa 2 Timote 4 Bible Online

2 Timote 4 - tshwa bible

2 Timote 4

¹Nza ku hlambanyisa mahlweni ka Nungungulu, ni ka Kristu Jesu, loyi a ta nga lamula a vahanyako ni vafileko, na hi kuwoneka kakwe ni mufumo wakwe, nziku:

²Kanela a mhaka; pinyama hi xikhati xi faneleko ni xikhati xi nga faneliko, u kawuka, u luleka, ni ku khongotela hi kutimisela kontlhe, ni kugonzisa. [37]

³Hakuva xa hata xikhati laha va ta nga ala a gonzo yi hanyisako; kanilezi kota lezi va nga ni tindleve ti nyakanyelelako a kuzwa, va ta ti lavela vagonzisi vo tsakisa kumbilukela kabye; [38]

⁴zonake va nga ta ha ingisa zinene, va ta hambukela mitsheketweni. [39]

⁵Kanilezi wena ti tsitsirite timhakeni tontlhe, u timisela zikaratweni, u tira a ntiro wa muvangeli, u hetisa a ntiro wa wena. [40]

⁶Hakuva makunu va lombela ha mina, a xikhati xa kusuka ka mina xi chikele.

⁷Nzi lwile a kulwa ko saseka, nzi mbhetile a kutsutsuma ka mina, nzi gongole a kukholwa.

⁸Makunu nzi vekelwe a xidlodlo xa kululama, lexi a Hosi a nga mulamuli a lulamileko, yi ta nga nzi nyika xona sikwini lego, na ku nga hi mina nzoce, kanilezi ni ka vontlhe lava va ranzileko a kuwoneka ka yena. [41]

⁹Hatlisa uta ka mina lokuloku,

¹⁰hakuva Demasi i nzi tsikile, kota lezi a ranzako za nguva leyi, i yile Tesalonika; Kreseke i yile Galatia, na Titusi i yile Dalmatia. [42]

¹¹Hi Luka yece a nga na mina. Tana na Marku, hakuva wa nzi vuna nguvu ntirweni. [43]

¹²Tikikusi nzi mu rumile Efesusi. [44]

¹³A jasi legi nzi nga gi siya le Troasi ka Karpusi, tana nago loku uta, ni mabhuku kambe, nguvunguvu a mapapilo ya madzowo.

¹⁴Alexandro, a mufuli wa suku, i i nzi mahele makhombo yo tala; a Hosi yi ta mu tlhelisela kota mitiro yakwe. [45]

¹⁵Mu kunguhele na wenawu, hakuva i lo kaneta nguvu a timhaka ta hina.

¹⁶A kutihlamuleleni ka mina ko ranga ku wa nga hi kona munhu loyi a nga nzi yimela, kanilezi vontlhe va lo nzi tsika; ngha va nga hlayelwi nanzu lowo. [46]

¹⁷Kanilezi a Hosi yi lo nzi yimela, yi nzi tiyisa, kasi a mhaka ya fela ku biwa hungu hi mina matlhelweni wontihe, lezaku a vamatiko vontlhe va fela kuzwa; lezo nzi lo hlangutwa nonwini wa nghala. [47]

¹⁸Kunene a Hosi yi ta nzi hlanguta mitirweni yontlhe ya kubiha, yi nzi hanyisela a mufumo wa yona wa le tilweni. A wudzunzo a give ka yona kala kupinzuka ni kupinzuka. Amen! [48]

¹⁹Rungula Prisika na Akwila, ni va ka Oniseferusi. [49]

²⁰Erastusi i sele le Korinte, kasike Trofimusi nzi mu siyile le Miletu na a kari a babya. [50]

²¹Hatlisa uta na ku nga se ku chikela wuxika. Eubulusi wa ku rungula, na Pudensi, na Linusi, na Klaudia, ni vamakabye vontlhe.

²²A Hosi a yive ni moya wa wena. A tipswalo a tive na nwina.