Read tshwa Titusi 1 Bible Online

Titusi 1 - tshwa bible

Titusi 1

¹Paule, a nanza ga Nungungulu, tlhelo mupostoli wa Jesu Kristu, a rumelweko hi kota ya kukholwa ka vahlawulilweko va Nungungulu, ni kutiva kabye a zinene lezi zi xungeteneko ni ku khozela Nungungulu, [1]

²hi ku tsumba a wutomi ga pinzukelwa, legi Nungungulu loyi a nga hembiko a nga tsumbisa hi kaleloko ka matiko; [2]

³kanilezi hi xikhati xakwe i lo wonekelisa a mhaka yakwe hi mahungu lawa nzi nga nyikiwa wona hi kulaya ka Nungungulu, a Muhanyisi wa hina. [3]

⁴Mina Paule nza rungula Titusi, a nwananga hizinene a kukholweni loku hi nga nako hi wumbiri ga hina, nziku: A tipswalo ni kurula a zive na wena, na zi huma ka Nungungulu Dadani na Kristu Jesu a Muhanyisi wa hina. [4]

⁵Nzi ku siyile le Kreta lezaku u fela ku lulamisa a timhaka leti ti seleko, u yimisa masingalakati mitini yontlhe, kota lezi nzi nga ku laya, [5]

⁶loku u kuma munhu loyi a nga solekiko, a nga nuna wa sati munwe, na a hi ni vana lava va kholwako, lava va nga soliwiko hi kota ya vilinganya ni kungaingisi.

⁷Hakuva a murisi ngha a nga soleki, kota lezi a nga nekwa ya Nungungulu; na a nga hi na xikanikani, na a nga hi na xizangazangani, a nga ti nyikeliko kunweni ka byala, na a nga hi mubi, na a nga naveli bhinzu go biha; [6]

⁸kanilezi a va munhu a rurelako vapfhumba, a muranzi wa wunene, loyi a tlharihileko, loyi a lulamileko, a basileko, wa kutikhoma;

⁹loyi a namarelako ka mhaka yi tsumbekako ya gonzo, kasi a fela ku zi kota ku luleka hi gonzo leyi yi hanyisako, ni ku kada lava va kanetako. [7]

¹⁰Hakuva va kona vanyingi lava va nga ingisiko, a vabyabyatsi ni vakanganyisi, nguvunguvu lava va zitshiva,. [8]

¹¹lava va faneleko ku valiwa milomu, hakuva va hahlula mingango yi mbhela, hi ku gonzisa lezi zi nga faneliko, kasi ku kuma bhinzu go biha. [9]

¹²A munwe wa vona, a nga muprofeti wabye, i ngalo: A va le Kreta mbahembi xikhati xontlhe, zihari zo biha, a zimiti zi lolohako. [10]

¹³A wukustumunyu legi gi nene. Hi kota ya lezo va kawuke hi ntamu, kasi vava ni wutomi kukholweni,

¹⁴na va nga cheli kota hi mitsheketo ya vaJuda, ni zileletelo za vanhu lava va hambukileko zineneni. [11]

¹⁵Zontlhe zi basile ka lava va basileko; kanilezi a ku na xilo xi basileko ka lava va zivi ni va nga kholwiko; a kupima kabye ni livalo labye zi nyenyezile. [12]

¹⁶Va wula lezaku va mu tiva Nungungulu, kanilezi va mu kaneta hi mitiro yabye; mbanhu va manyala, ni va nga ingisiko, a va vuni nchumu mitirweni yontlhe yo saseka. [13]