Read tshwa Titusi 2 Bible Online

Titusi 2 - tshwa bible

Titusi 2

¹Kanilezi wena kanela lezi zi faneleko a gonzo yi nene: [14]

²lezaku a vavanuna va kale va ti khoma, vave lava va dzunzekako, lava va tlharihileko, va hi ni kukholwa ku nene, ni liranzo, ni kutimisela.

³Hizalezo ni vavasati va kale a vave ni matshamela ma khesekako, na va nga hi na mahlevo, va nga ti nyikeliko kunweni ka byala; kanilezi va gonzisa lezi za zinene; [15]

⁴lezaku va gonzisa a timbelekana a ku ranza vanuna vabye ni vana vabye,

⁵vava va tlharihileko, va basileko, va ti tshamela makaya, va hi va nene, va ingisa a vanuna vabye, kasi a mhaka ya Nungungulu yi nga soliwi. [16]

⁶Hizalezo ni majaha, ma luleke a kuva ma ti khoma;

⁷Uva xiwonelo xa mitiro yontlhe yo saseka; a kugonziseni ka wena u kombisa a kubasa ni kudzunzeka, [17]

⁸Ngha u nga soleki kuwulawuleni ka wena, kasi loyi a kanetako a fela ku koyo tingana, hi kuva a nga hi na zo biha a ku wula ha hina. [18]

⁹Luleka a malanza lezaku ma ingisa a venyi va wona, ma va tsakisa timhakeni tontlhe, ma nga va kaneti;

¹⁰va nga yivi nchumu, kanilezi va tsumbeka; kasi zilweni zontlhe va fela ku bombisa a gonzo ya Nungungulu a Muhanyisi wa hina.

¹¹Hakuva a tipswalo ta Nungungulu ti wonekile, ti neha kuhanyiswa ka vanhu vontlhe, [19]

¹²ti hi gonzisa ku tsika lezi zi nga lulamangiko ni kunavela ka misava, hi hanya ka nguva leyi hi kutikhoma ni kululama hi chava Nungungulu; [20]

¹³na hi cuwukela a kutsumba ka hina ku bongekako ku nga kuwoneka ka kungangamela ka Nungungulu wa hina wa hombe tlhelo Muhanyisi wa hina Kristu Jesu. [21]

¹⁴loyi a nga ti nyikela hi kota ya hina, kasi a fela ku hi tirula kubiheni kontlhe, a ti basisela a vanhu lava va ta ngava vakwe, va pinyamileko mitirweni yo saseka. [22]

¹⁵Kanela timhaka leti, u luleka ni ku kawuka hi ntamu wontihe. Ngha a nga hi kona loyi a ku kanyisako.