Read tshwa Filemoni 1 Bible Online

Filemoni 1 - tshwa bible

Filemoni 1

¹Paule, a peresu ya Kristu Jesu, na Timote a makabye wa hina, ha rungula Filemoni a ranzekako ni xitirikulori, [1]

²na Apfia a makweru, na Akipusi a sochwa-kulori, ni bandla legi gi nga lomo ndlwini ya wena: [2]

³A tipswalo ni kurula a tive na nwina, zi humako hi ka Nungungulu a Dadani wa hina ni ka Hosi Jesu Kstu. [3]

⁴Nza bonga Nungungulu wa mina xikhati xontlhe, loku nzi ku kumbuka mikhongelweni ya mina, [4]

⁵hakuva nzi zwile hi liranzo leli u ranzako ha lona vontlhe vobasa, ni kukholwa loku u nga nako ka Hosi Jesu. [5]

⁶Mina nza kombela lezaku a kukholwa loku u hlengelako ha kona zinwe na hina ku fela ku tira hi ntamu, u kala u tiva a zilo zontlhe zo saseka lezi hi nga nazo ka Kristu. [6]

⁷Hakuva mina nzi tsakisilwe nguvu ni ku tangaliswa hi liranzo la wena, hakuva a timbilu ta vobasa ti tiyisetilwe ha wena, makabye. [7] Paule a kombelela Onesimusi,

⁸Hikwalaho hambu lezi nzi nga ni ntamu ka Kristu wa ku ku laya ku maha lezi zi faneleko, [8]

⁹kasi-ke hi kota ya liranzo nza ku kombela, na nzi hi Paule wa kunghahi wa xikhosana, mina loyi nzi nga peresu ya Kristu Jesu.

¹⁰Nza ku khongotela hi nwananga Onesimusi, loyi nzi mu belekileko nzi hi makhotsweni ya mina, [9]

¹¹loyi a kale a nga kala a nga vuni nchumu ka wena, kanilezi makunu wa vuna ka wena ni ka mina.

¹²Hi yena nzi mu tlhelisako ka wena; nzi mu rumela aku khwatsi i nkhata wa mina,

¹³nzi nga ranza a ku ngha nzi tshama naye, lezaku a fela ku nzi tirela wutshanwini ga wena, a makhotsweni lawa nzi nga nawo hi kota ya ivangeli. [10]

¹⁴Kanilezi nzi wa nga ranzi ku maha nchumu a handle ka ku vumelwa hi wena; kasi a wunene ga wena gi nga hi ga kukurumetwa, kanilezi giva ga kuranza ku tlhatlhekileko. [11]

¹⁵Hakuva kutani i lo hambana na wena a xikhatana, kasi u fela ku mu kuma u tshama naye masiku wontihe; [12]

¹⁶na a nga ha hi khumbi, kanilezi ku hunza khumbi, ave makabye a ranzekako nguvu ka mina, kanilezi nguvunguvu ka wena, a makabye nya meni ni le Hosini. [13]

¹⁷Loku uku nzi nakuloni mu amukele aku khwatsi hi mina. [14]

¹⁸Kanilezi loku a ngha a ku gohele nchumu, hambu loku a hi ni nanzu ka wena, zi hlayele hlanini wa mina.

¹⁹Mina Paule, nza tsala hi canja ga mina wutsumbu, nziku; Nzi ta xi riha mina. A nzi wuli lezaku u na ni nanzu ka mina, a nanzu wa kona hi wutsumbu ga wena.

²⁰Ina, makabye, ngha nzi hi ni kutsaka ha wena Hosini; tangalisa a mbilu ya mina ka Kristu.

²¹Nzi ku tsalele lezi na nzi tsumba a kuingisa ka wena, lezaku u ta maha ni ku hunza lezi nzi zi wulako. [15]

²²Tlhatakumbiri nzi longisele yindlu; hakuva nza tsumba lezaku hi kota ya mikhongelo ya nwina nzi ta vumelwa kuta ka nwina. [16]

²³Epafrasi, a peresu-kulori hi kota ya Kristu Jesu, wa ku rungula; [17]

²⁴na Marku, na Aristarkusi, na Demasi, na Luka, a zitiri-kulori. [18]

²⁵A tipswalo ta Hosi ya hina Jesu Kristu a tive ni moya wa wena. Amen!