Read tshwa Maheberu 10 Bible Online

Maheberu 10 - tshwa bible

Maheberu 10

¹Kota lezi a nayo wu nga ni xiruti ntsena xa zilo zo saseka lezi zi tako, na wu nga fananisi hi kumbheleleko a xiyimo xa zona, cima a wu zi koti ku mbhelelisa vona lava va tshinelako hi miphahlelo leyi va nyikelako yona malembe ni malembe. [108]

²Hakuva loku zi wa hi tano, ngha va tsikile a ku nyikela, hakuva a vakhozeli loku va basisilwe kanwe, ngha va nga zwangi kambe a livalo la zionho.

³Kanilezi hi miphahlelo leyo ku alakanyiswa hi zionho a malembe ni malembe. [109]

⁴Hakuva a zi koteki lezaku a nkhata wa tikuzi ni timbuti wu susa zionho. [110]

⁵Hikwalaho laha Kristu a ngata laha misaveni, i te ngalo: A miphahlelo ni minyikelo a ku tsaki ha zona, Kanilezi u nzi longiselele a miri; [111]

⁶A ku tsakangi hi miphahlelo ya kuhiswa ni leyi yi humeselwako kuonha.

⁷Zonake nzi wa te ngalo: Languta, nzata a ku ta maha kuranza ka wena Nungungulu. (Lomu bhukwini ku tsalilwe lezo ha mina.)

⁸Na a rangile a wula aku: A miphahlelo ni minyikelo, ni miphahlelo ya kuhiswa ni leyi yi humeselwako kuonha a ku zi ranzangi, hambu ni ku tsaka ha zona (hambu lezi zi nyikelwako hi nayo).

⁹Zonake a engeta, aku: Languta, nzata a ku ta maha kuranza ka wena. Yena i susa leʼza kuranga, kasi a fela ku yimisa a za wumbiri.

¹⁰Hi kuranza kwaloko hi basisilwe hi kunyikelwa ka miri wa Jesu Kristu kanwe ku mbhela. [112]

¹¹Hakunene a mupristi munwe ni munwani i yimile masiku ni masiku kukhozeleni, a nyikela yaleyo miphahlelo kambe ni kambe, leyi yi nga zi kotiko ku susa zionho. [113]

¹²Kanilezi yena, laha na a nyikele a munyikelo munwe ntsena hi kota ya zionho, i tshamile kala kupinzuka canjeni ga xinene ga Nungungulu, [114]

¹³na a rinzela kala a valala vakwe va mahiwa a xikhegetelo xa mikonzo yakwe. [115]

¹⁴Hakuva hi muphahlelo munwe yena i mbhelelisile kala kupinzuka vona lava va basisilweko.

¹⁵Na wona Moya wa ku Basa kambe wa hi mahela wukustumunyu; hakuva anzhako ka kuva na wu wulile ku ngalo:

¹⁶Lexi hi xivumelwano nzi to xi maha na vona anzhako ka lawo masiku, ku wula Hosi; Nzi ta veka milayo ya mina timbilwini tabye, Nzi yi tsala kambe kupimeni kabye. [116]

¹⁷Wu engeta wuku: A zionho zabye ni zigoho zabye nzi nga ta zi alakanya kambe.

¹⁸Makunu laha ku nga kona a kutsetselelwa ka zionho, a ka ha laveki a kuphahlelwa hi kota ya kuonha.

¹⁹Hikwalaho, vamakabye, kota Iezi hi nga ni kutiya a ku enghena Wutshanwini go Basabasa hi nkhata wa Jesu, [117]

²⁰hi ndlela leyi a hi longiseleko yona, a ndlela yiswa yi hanyako yo tsemakanya a xisirelo, lezo hi ku ngalo, hi nyama yakwe; [118]

²¹kota lezi hi nga ni mupristi wa hombe hehla ka yindlu ya Nungungulu, [119]

²²ngha hi tshinela hi timbilu ti nene na hi hi ni kutiya ka hombe kukholweni, a timbilu ta hina na ti nwatsekelwa ti basiswa ka livalo lo biha, a mimiri ya hina na yi hlazilwe hi mati ma nene. [120]

²³A hi khomisiseni a kuvumela ka kutsumba ka hina, kasi ku nga kanakaniswi; hakuva i tsumbekile loyi a nga hi tsumbisa. [121]

²⁴Ngha hi khatalelana kasi ha susumetana liranzweni ni mitirweni yo saseka;

²⁵na hi nga tsiki a tinkhozo ta hina khwatsi hi mukhuwo wa vanwani, kanilezi hi khongotelana; nguvunguvu kota lezi mu wonako lezaku a Siku gi tshinela kusuhani. [122]

²⁶Hakuva loku hi onha ha womu anzhako ka kuva na hi tivile zinene, a wa ha hi kona a muphahlo wa zionho; [123]

²⁷kanilezi ku sele ntsena a ku rinzela hi kuchava a kulamulwa, ni xikuhe xa nzilo lowu wu ta nga hetisa a valala. [124]

²⁸Loku a munhu a hambunyetile a nayo wa Mosi wa dawa hi kota ya wukustumunyu ga vanhu vambiri kutani vanharu, a nga zwelwi wuxinji. [125]

²⁹Xana a mu alakanyi nwina lezaku i fanelwe hi kubiwa ku tshisako ko hunza lezi, loyi a kanziheleko a Nʼwana wa Nungungulu, na a kanyisa a nkhata wa xivumelwano, lowu a nga basiswa ha wona, a engeta a rukatela a Moya wa tipswalo ke? [126]

³⁰Hakuva ha mu tiva loyi a nge ngalo: A kuphota ni kutlhelisela zi lumba mina. Aku kambe: A Hosi yi ta yimela a vanhu va yona. [127]

³¹Za chavisa a ku wela mandleni ya Nungungulu a hanyako. [128]

³²Kanilezi alakanyani a masiku ya kale, anzhako ka kuya na mu woningilwe, lawo mu nga timisela ka wona a kulweni ka hombe ka kuxaniseka; [129]

³³hi tlhelo hilezi mu nga hlekulwa hi kurukwa ni zixaniso, hi tlhelo ginwani hilezi mu nga hlengela ni lava va nga xanisiswa lezo. [130]

³⁴Hakuva mu lo va zwela wusiwana lava va nga lomu makhotsweni, kambe mu lo vumela hi kutsaka laha mu nga wutlelwa a zibya za nwina, na mu tiva lezaku mu na ni za chukwana, lezi zi te ku tsoma. [131]

³⁵Hikwalaho ngha mu nga lahlekelwi hi kutiya ka nwina, loku ku nga ni nchachazelo wa hombe. [132]

³⁶Hakuva za laveka lezaku mu hi ni kutimisela, kasi loku mu mahile a kuranza ka Nungungulu, mu fela ku kuma lezi zi nga tsumbisiwa. [133]

³⁷Hakuva ka hi kona xikhatanyana, Zonake i ta chikela loyi a ta ngata, a nga ta hlwela. [134]

³⁸Loyi a lulamileko wa mina i ta hanya hi kukholwa; Kanilezi loku a tlhelela nzhako, a muhefemulo wa mina a wu tsaki ha yena. [135]

³⁹Kanilezi hina a hi lava va tlhelelako nzhako kulobyisweni; kanilezi hina hi vona lava va nga ni kukholwa, a ku kasi ku hanyiswa a mihefemulo ya hina. [136]