Read tshwa Maheberu 11 Bible Online

Maheberu 11 - tshwa bible

Maheberu 11

¹Makunu a kukholwa hi kona ku tiyisako hi zilo lezi zi languteliwako, a xikholwiso xa zilo zi nga woniwiko. [137]

²Hakuva a vakale va lo mahelwa a wukustumunyu gi nene ha kona.

³Hi kukholwa ha pima lezaku a misava yi lo vangiwa hi gezu ga Nungungulu, lezaku lezi zi woniwako zi mahilwe hi zilo zi nga wonekiko. [138]

⁴Hi kukholwa Abeli i lo nyikela ka Nungungulu a muphahlelo wu nene ku hunza lowu wa Kana, lowu a nga mahelwa wukustumunyu ha wona lezaku i lulamile; Nungungulu wutsumbu i lo maha wukustumunyu hi kota ya minyikelo yakwe; hi kukholwa loko wa ha wulawula hambu lezi a fileko. [139]

⁵Hi kukholwa Enoki i lo tekiwa, kasi a nga woni kufa; a nga kumiwangi hakuva i wa tekilwe hi Nungungulu. Hakuva na a nga se ku tekiwa i wa mahelwe wukustumunyu lezaku i wa tsakisile Nungungulu. [140]

⁶Kanilezi ahandle ka kukholwa a zi koteki ku mu tsakisa; hakuva loyi a tshinelako ka Nungungulu i yimelwe hi ku kholwa lezaku ku kona Nungungulu, ni lezaku yena wa chachazela lava va mu lavako.

⁷Hi kukholwa Noa na a byelilwe hi Nungungulu hi zilo zi nga kala zi nga se woniwa, i lo ingisa, a aka a taru kasi ku hanyisa a nghamu yakwe; hi ku maha lezo i lo kona a tiko, a maha xiga-tshomba ya kululama loku ku nga ka kukholwa. [141]

⁸Hi kukholwa Abrahama i lo ingisa laha a nga vitanwa, a suka aya tikweni lego a ta nga ya nyikwa gona giva tshomba yakwe: i lo rura na a nga ku tivi laha a yako kona. [142]

⁹Hi kukholwa i lo maha muluveli tikweni ga xitsumbiso, a ku khwatsi i tiko ga vambe; a tshama lomu matendeni zinwe na Isaka na Jakobe, va nga ziga-tshomba zinwe naye ya xitsumbiso lexo. [143]

¹⁰Hakuva yena i lo cuwukela a muti lowu wu nga ni ziseketelo, lowu Nungungulu a nga muaki ni mumahi wa wona. [144]

¹¹Hi kukholwa Sara i lo kuma ntamu wa ku xura nyimba, hambu lezi a xikhati xakwe xi nga hunzile, hilezi i lo alakanya aku i tsumbekile loyi a nga mu tsumbisa. [145]

¹²Hikwalaho ka wanuna munwe, loyi a ngaku khwatsi i file, ku lo huma vanyingi khwatsi hi tinyeleti ta tilo, ni ku khwatsi hi seke ga le fungwini wa bimbi, legi gi nga hiko na ku hlayiwa. [146]

¹³Vontlhe lava va lofa kukholweni, na va nga se ku amukela lezi zi tsumbisilweko, kanilezi va wa zi wonile, va zi tsakela na zi hi kule, va ti wula lezaku vapfhumba ni vaenzi laha misaveni. [147]

¹⁴Kunene lava va wulako zakunghahi va wonisa lezaku va lava a tiko gi nga gabye.

¹⁵Hakunene loku a va kari va alakanya hi tiko lego va nga sukile ka gona, ngha va kumile xikhati xa ku tlhelela ka gona.

¹⁶Kanilezi makunu va navela a tiko gi nene ku hunza gona, legi gi nga le tilweni; hi kota ya lezo Nungungulu a nga na tingana a ku vitanwa lezaku i Nungungulu wabye; hakuva i va longisele muti. [148]

¹⁷Hi kukholwa Abrahama i lo phahlela ha Isaka a siku a nga ringiwa; ina, loyi a amukeleko a zitsumhiso i lo nyikela a nʼwana wakwe a belekilweko yece; [149]

¹⁸loyi ku nga wulilwe ha yena ku ngalo: A pswalo wa wena wu ta vitanwa ha Isaka. [150]

¹⁹Hakuva i lo alakanya lezaku Nungungulu i na ni ntamu hambu ni ku vuxa hi ka vafileko; lomo a nga mu tlheliselwa ha kona, loku hi wulawula hi ku fananisa. [151]

²⁰Hi kukholwa Isaka i lo katekisela Jakobe na Esau hi zilo za ha tako. [152]

²¹Hi kukholwa Jakobe laha a nga kari afa, i lo katekisa a vana vambiri va Josefa, a khongela na a khegele hehla ka chetengelo wakwe. [153]

²²Hi kukholwa Josefa na a hi kusuhani ni kufa, i lo wulawula hi kuhuma ka vanana va ka Israeli, a va lelela hi marambu yakwe. [154]

²³Hi kukholwa Mosi na a belekilwe, i lo fihlwa tihweti tinharu hi vabeleki vakwe, hakuva va lo wona lezaku i nwanana a sasekileko; a va chavangi nchumu hi kulaya ka hosi. [155]

²⁴Hi kukholwa Mosi loku a kulile, i lo ala ku vitanwa aku i nʼwana nwaFaro; [156]

²⁵a ti hlawutela a kuva a xaniswa Zinwe ni vanhu va Nungungulu, ku hunza kuva ni litsako la kuonha ka xikhatanyana. [157]

²⁶I lo alakanya lezaku a kurukwa ka Kristu i pfuno wa hombe ku hunza a kufuma ka le Gipite; hakuva i wa langutela a nchachazelo.

²⁷Hi kukholwa i lo suka le Gipite, na a nga chavi a zanga ya hosi; hakuva i lo timisela aku khwatsi hi loku a mu wona loyi a nga woniwiko. [158]

²⁸Hi kukholwa i lo yimisa a pasika ni ku nwatsekelwa hi nkhata, lezaku kasi a mudayi wa matewula a nga henyi ya vaIsraeli. [159]

²⁹Hi kukholwa va lo tsemakanya a Bimbi go Pswhuka kota lomu misaveni yi womileko; kanilezi laha a vaGipite va nga ringa ku maha lezo va lo mhemba. [160]

³⁰Hi kukholwa ku lowa a ligingisi la Jeriko, anzhako ka kuva na va li renzelekele a ntlhanu wa masiku ni mambiri. [161]

³¹Hi kukholwa Rahabi a xibhayi a nga fangi zinwe ni lava va nga ingisangiko, hilezi a nga amukela a tihloli hi kurula. [162]

³²Xana nza ha ta wula yini kambe ke? Hakuva a xikhati a xi nzi eneli a kuva nzi hlawutela ha Gideoni, na Baraki, na Samsoni, na Jefta, na Davida, na Samueli ni vaprofeti; [163]

³³lava va nga hlula matiko hi kukholwa, va lamula hi kululama, va kuma lezi va tsumbisilweko zona, va vala milomu ya tinghala, [164]

³⁴va lo tima a ntamu wa nzilo, va pona a wutlha ga supado, na va hi ni gome va lo nyikwa ntamu, va maha tinhenha kulweni, va panzanya a tiyimpi ta valala. [165]

³⁵A vavasati vanwani va lo tlheliselwa a vafileko vabye hi kuvuxwa hi ka vafileko; a vanwani va lo xaniswa nguvu, va nga vumeli ku hlangutwa, lezaku kasi va fela ku kuma a kuvuka ku nene. [166]

³⁶Vanwani va lo ringwa hi kutseketselwa ni kubiwa; ina, va bohiwa ni ku valelwa paxweni. [167]

³⁷Va lo gandliwa hi maribye, va sahiwa hi tisaruti, va ringwa, va dawa hi supado; va lo nzulanzula na va ambele a mabhebhe ya tiyivu ni timbuti; va lo pswhelekelwa, va xaniseka, ni ku khomiwa hi kubiha, [168]

³⁸lava a tiko gi nga kala gi nga va fanelangi, va lo nzulanzula lomu xiwuleni, ni le zitsungeni ni lomu mikovotlweni ni minkeleni ya lomu misaveni. [169]

³⁹Hambu lezi vona vontlhe va nga mahelwa wukustumunyu hi kota ya kukholwa kabye, a va amukelangi lezi va tsumbisilweko zona,

⁴⁰hakuva Nungungulu i hi longiselele a xilo xi nene xe hunzeleta, lezaku a va na ku mbheleliswa na hina hi nga hi kona.