Read tshwa Maheberu 13 Bible Online

Maheberu 13 - tshwa bible

Maheberu 13

¹Ngha li simamisa a liranzo la nwina la wumakabye.

²Mu nga rivali ku amukela vafambi, hakuva hi ku maha lezo a vanwani va rurele tingelosi na va nga ti tivi. [194]

³Alakanyani lava va nga makhotsweni, muku khwatsi mu bohilwe zinwe navo; alakanyani ni lava va xaniswako, kota lezi na nwinawu mu nga ni mimiri, [195]

⁴Ngha na kutekana ku dzunzeka ka vanhu vontlhe, ngha sango gi nga nyenyeziswi; hakuva a zirembi ni zibhayi Nungungulu i ta zi lamula.

⁵Ngha na mahanyela ya nwina ma ngavi ya ku ranza mali; eneliswani hi lezi mu nga nazo; hakuva Nungungulu i ngalo: Cima nzi nga ta ku tsika, hambu ku ku siya. [196]

⁶Hikwalaho hi nga wula na hi tiyilehlana, hiku: A Hosi hi muvuni wa mina, nzi nga ta chava; A vanhu va nga nzi mahela yini ke? [197]

⁷Alakanyani varangeli va nwina, lava va mu byelileko mhaka ya Nungungulu; pimani a kugumesa ka kuhanya kabye, mu ecanyisa a kukholwa kabye.

⁸Jesu Kristu hi yaloyi wa tolo ni nyamutlha ni ku kala kupinzuka. [198]

⁹Mu nga pengiswi hi tixaka ti tsalangeneko ta tigonzo leti ti nga tibyiwiko; hakuva zi sasekile loku a mbilu yi tiyiswa hi tipswalo, na ku nga hi zakuga, lezi zi nga vuniko nchumu lava va zi tsumbako. [199]

¹⁰Hina hi na ni alati, laha va nga faneliko a ku gela kona lava va khozelako tabernakeli. [200]

¹¹Hakuva a zihari lezi a nkhata wa zona wu yiswako Wutshanwini go Basabasa hi mupristi wa hombe hi kota ya zionho, a nyama ya zona yi hiswa lahandle ka wugovelo. [201]

¹²Hizalezo na Jesu i lo xaniseka lahandle ka nyangwa, lezaku a fela ku basisa vanhu hi nkhata wakwe. [202]

¹³Hikwalaho a hi humeni hiya kakwe lahandle ka wugovelo, na hi rwele a kurukwa kakwe. [203]

¹⁴Hakuva seno a hi na muti wu simamisako, kanilezi hi lava lowu wu ta ngata. [204]

¹⁵Hikwalaho a hi maheleni Nungungulu ha Jesu a muphahlo wa kubonga lowu wu simamisako, lezo hiku ngalo, a mbhanzo wa milomu leyi yi dumisako vito gakwe. [205]

¹⁶Kanilezi mu nga rivali a ku maha kusasa ni kuha zisiwana; hakuva Nungungulu wa tsaka khwatsi hi miphahlelo ya kunghaho. [206]

¹⁷Ingisani a varangeli va nwina, mu ti koramisa ka vona; hakuva va rinzela a mihefemulo ya nwina, hakuva va ta ti hlamulela ha yona. Va ingiseni lezaku va fela ku tira hi kutsaka, na ku nga hi kuketa; hakuva lezi zi nga ta mu vuna nchumu. [207]

¹⁸Hi khongeleleni, hakuva ha tsumba lezaku hi na ni livalo li nene, na hi xuva kuva ni mahanyela ma nene matlhelweni wontihe. [208]

¹⁹Nza mu khongotela nguvu ku maha lezo, kasi nza fela ku wuyiselwa ka nwina lokuloku.

²⁰Makunu ngha Nungungulu wa kurula, loyi a wuyisileko hi ka vafileko a Hosi ya hina Jesu, loyi a nga murisi wa hombe wa tiyivu, hi nkhata wa xivumelwano xa pinzukelwa, [209]

²¹a mu maha mu mbhelela mitirweni yontlhe yo saseka, kasi mu maha kuranza kakwe; na a tira ka nwina ha Jesu Kristu lezi zi tsakisako mahlweni ka yena. A wudzunzo a give ka yena kala kupinzuka ni kupinzuka. Amen! [210]

²²Kanilezi nza mu khongotela, vamakabye, timiselani ni mhaka leyi ya ku mu luleka; hakuva nzi mu tsalele hi timhaka ti tsongwani. [211]

²³Tivani lezaku a makabye wa hina Timote i tlhatlhilwe; loku a hatla ata nzi ta ta mu wona na nzi hi zinwe naye. [212]

²⁴Rungulani vontlhe lava va mu rangelako, ni vobasa vontlhe. Lava va le Italia va mu rungula.

²⁵A tipswalo a tive na nwina nwentlhe. Amen!