Read tshwa Maheberu 5 Bible Online

Maheberu 5 - tshwa bible

Maheberu 5

¹Hakuva ni wihi wa vapristi va hombe, loku a langilwe xikari ka vanhu, i vekiwa kasi ku yimela vanhu ka zilo za Nungungulu, lezaku a nyikela minyikelo ni miphahlelo hi kota ya zionho. [44]

²Yena wa zi kota ku timisela ni lava va nga tiviko ni va hambukileko, hakuva na yena wutsumbu i na ni gome;

³hi kota ya gona, loku a phahlela hi kota ya zionho za vanhu, i yimelwe hi ku phahlela hi kota ya zakwe. [45]

⁴Kambe a ku na munhu a ti tekelako a xikhundla lexi, sine loku a vitanilwe hi Nungungulu, kota yena Aroni. [46]

⁵Hizalezo Kristu a nga ti tlakusangi ha yece a kuva mupristi wa hombe, kanilezi i lo yimiswa hi yena loyi a nga ku ngalo kakwe: Wena u Nʼwana wa mina, Nyamutlha nzi ku belekile. [47]

⁶Kota lezi a wulako kambe ka ginwani wutshamu, aku: Wena u mupristi kala kupinzuka Hi tshamela ga Melkizedeki. [48]

⁷A masikwini ya kuhanya kakwe nyameni, Jesu i lo khongela ni ku khongotela hi kurila ka hombe ni mihloti, ka loyi a nga zi kota ku mu hlanguta kufeni; yena i lo zwiwa hilezi a nga hi ni xichawo ka Nungungulu. [49]

⁸Hambu lezi a nga hi Nʼwana, i lo gonza kuingisa hi lezi a nga xaniseka ha zona; [50]

⁹na a mbhelelisilwe i lo maha a muvangi wa kuhanyiswa ka pinzukelwa, ka vontlhe lava va mu ingisako;

¹⁰na a wulilwe hi Nungungulu lezaku mupristi wa hombe hi tshamela ga Melkizedeki.

¹¹Hi na ni zinyingi ku wulawula ha yena, kanilezi za tsanza a ku zi tlhamusela, hakuva ma nonoka ku ingisa.

¹²Hakuva hambu lezi mu nga fanekele kale a kuva mu maha vagonzisi, ka ha laveka ka nwina lezaku munhu a mu gonzisa a zigonzo zo ranga za timhaka ta Nungungulu; ma ha hi lava va lavako masi, na ku nga hi kuga ku tiyileko. [51]

¹³Hakuva ni wihi loyi a hanyako hi masi basi, a nga zi koti ku tiva a mhaka ya kululama, hakuva wa ha hi xihlangi. [52]

¹⁴Hakuva a kuga ku tiyileko ku fanela a vanhu kulileko, lava ve toloveleko a ku tirisa kupima kabye va kala va zi kota ku hambanyisa a kusaseka ni kubiha. [53]