Read tshwa Maheberu 6 Bible Online

Maheberu 6 - tshwa bible

Maheberu 6

¹Hikwalaho a hi tsikeni ku wulawula hi timhaka to sangula ta gonzo ya Kristu, hi komama mahlweni kumbheleni; hi nga ha aki a xiseketelo, ku nga kuhunzuluka mitirweni leyi yi fileko, ni kukholwa ka Nungungulu, [54]

²ni gonzo ya kubapatiza, ni kutlhatekwa ka mandla, ni kuvuka ka vafileko, ni kulamula ka pinzukelwa. [55]

³Lezi hi ta zi maha loku Nungungulu a vumela.

⁴Hakuva lava va nga woningelwa kale, va ringile a kunanziha ka xinyikiwo xa le tilweni, va nyikilweko a Moya wa ku Basa, [56]

⁵vazwa a kunanziha ka mhaka yi nene ya Nungungulu, ni mintamu ya xikhati xa ha tako,

⁶zonake va tlhela vawa, a zi koteki lezaku va tlheliselwa kambe kuhunzulukeni, kota lezi va ti belelako luswa a Nʼwana wa Nungungulu, va mu vangela tingana.

⁷Hakuva a misava leyi yi nwako a vula leyi yi nako kanyingi hehla ka yona, loku yi milisa a zibyalo zi vunako lava yi rimelweko vona, yona misava yi katekiswa hi Nungungulu.

⁸Kanilezi loku yi milisa mizwa ni zihlehlwani, ya tsikwa, yi kusuhani ni ku rukateliwa, a magumo ya yona hi ku hiswa.

⁹Kanilezi, varanzekako, hina hi cuwukele a zilo za chukwana ka nwina, lezi zi xungeteneko ni kuhanyiswa, hambu loku hi wulawulisa lezo.

¹⁰Hakuva Nungungulu a hi loyi a nga lulamangiko wo kala a rivala a mitiro ya nwina, ni liranzo leli mu nga li kombisa vitweni gakwe, laha mu nga vunetela lava vo basa, kota lezi ma ha vunetelako ni zalezi. [57]

¹¹Hina ha xuva lezaku munwe ni munwani wa nwina a simamisa ku pinyama kota lezi, lezaku ava ni kutsumba ku tiyileko kala kugumeseni; [58]

¹²kasi mu ngavi matolo, kanilezi muva vaecanyisi va lava va gako tshomba ya zitsumhiso, hi kota ya kukholwa ni kutimisela kabye.

¹³Hakuva laha Nungungulu a nga tsumbisa ka Abrahama, i lo hlambanya hi wutsumbu gakwe, kota lezi ku nga hi hava a wahombe ku hunza yena wa ku hlambanya ha yena.

¹⁴I te ngalo: Hakunene nzi ta ku katekisa nguvu, nzi anzisa nguvu a pswalo wa wena. [59]

¹⁵Zinghaho Abrahama na a timisele hi lihlaza-mbilu, i lo kuma lezi a tsumbisilweko zona.

¹⁶A vanhu va hlambanya hi loyi a nga wahombe ku hunza vona, ni kuhlambanya loku ku tiyisako a mhaka ka heta a kukanetana kontlhe. [60]

¹⁷Hikwalaho laha Nungungulu a nga ranza ku kombisa ka zigatshomba lezaku a khungo gakwe hi legi gi nga hunzulukiko, i lo gi tiyisa hi kuhlambanya; [61]

¹⁸lezaku kasi hi zilo lezi zimbiri zi nga hiko na kuhunzuluka, lezi Nungungulu a nga zi kotiko ku hemba ha zona, hina hi fela kuva ni kutiyiswa ka ntamu, hina lava hi tsutsumeleko wuponelweni ku ta khoma a kutsumba loku ku vekilweko mahlweni ka hina.

¹⁹A kutsumbeni loku hi na ni xirikhiso xa muhefemulo, lexi xi tsumbekileko ni ku tiya, lexi xi enghenako hi lenzhako ka xisirelo, [62]

²⁰lomu Jesu a nga enghena kona hi kota ya hina, a hi murangeli wa hina, na a mahilwe mupristi wa hombe hi tshamela ga Melkizedeki. [63]