Read tshwa Maheberu 7 Bible Online

Maheberu 7 - tshwa bible

Maheberu 7

¹Melkizedeki loyi a nga hi hosi ya le Salema, tlhelo mupristi wa Nungungulu a nga Hehla-hehla, yena i lo tlhangana na Abrahama na a wuya hi le ko daya tihosi, a mu katekisa. [64]

²Zonake Abrahama i lo mu pambulela a xipanze xa wukhume xa muphango wontihe. Loku ku tlhamuselwa a vito gakwe, a kuranga i wa hi Hosi ya kululama, ni kambe i Hosi ya le Salema, lezo hi ku ngalo: I Hosi ya kurula.

³A nga hi na dadani, a nga hi na mamani, a nga hi na lixaka, a nga hi na kusangula ka masiku, hambu ni kugumelwa ka kuhanya kakwe, kanilezi i fanana ni Nʼwana wa Nungungulu, a simamisa a hi mupristi kala kupinzuka.

⁴Makunu pimani lezaku i kulisile kuyini a munhu loyi Abrahama, a nyapanze wa hina, a nga mu pambulela a xipanze xa wukhume xa muphango. [65]

⁵Hakunene a vana va Levi, lava va amukelako a xikhundla xa wupristi, va layilwe hi nayo a ku teka za wukhume ka vanhu, hi lezaku ka vamakabye vabye, hambu lezi vona va nga huma xiwunwini xa Abrahama. [66]

⁶Kanilezi loyi a nga hiko wa lixaka labye i lo teka za wukhume ka Abrahama, a katekisa loye a nga hi ni zitsumhiso. [67]

⁷Makunu a ku na ku kanetwa lezaku loyi tsongwani i katekiswa hi loyi wa hombe.

⁸Kwalaha lava va tekako za wukhume hi vanhu lava va fako, kanilezi leyo zi amukelwa hi munwe ku kustumunywako ha yena lezaku wa hanya.

⁹Kutani hi nga wula lezaku na yena Levi, loyi a tekako za wukhume, i humesile za wukhume ha yena Abrahama,

¹⁰hakuva i wa hi lomu xiwunwini xa kokwani wakwe laha a nga tlhangana na Melkizedeki.

¹¹Makunu loku a kumbheleliswa ku kumeka hi wupristi ga va ka Levi (hakuva hi gona gi nga yimisa a milayo ya tiko), xana ku wa ha lavekela yini lezaku ku huma munwani mupristi hi tshamela ga Melkizedeki, loyi a ta nga kala a nga hlayelwi a tshamela ga Aroni ke? [68]

¹²Hakuva loku a wupristi gi hunzuluswa, ku la eka lezaku ku hunzuluswa ni nayo kambe.

¹³Hakuva loyi a timhaka leti ti wulawulwako ha yena ngwa limbe lixaka, lolu ku nga humangiko ka lona a munhu wo khozela alatini.

¹⁴Hakuva zi la su dlunya lezaku a Hosi ya hina yi humile lixakeni la ka Juda; a lixaka lolu Mosi a nga wulangiko nchumu ha lona hi tlhelo ga wupristi. [69]

¹⁵Lezo zi te dlunya nguvu loku ku huma munwani mupristi wo fanana na Melkizedeki,

¹⁶loyi a yimisilweko a kuva mupristi hi kota ya ntamu wa wutomi gi nga mbheliko, na ku nga hi kota ya nayo wa kulaya ka nyama.

¹⁷Hakuva ku kustumunyilwe ha yena ku ngalo: Wena u mupristi kala kupinzuka, Hi tshamela ga Melkizedeki. [70]

¹⁸Hakuva a nayo wo ranga wu fuvisilwe hilezi a wu hi ni gome, wu nga vuni nchumu [71]

¹⁹(hakuva a nayo a wu mbhelelisangi nchumu), ku engheniswa a kutsumba ka chukwana, loku hi tshinelako ka Nungungulu ha kona. [72]

²⁰Kona a ku engheniswangi a handle ka kuhlambanya.

²¹Hakunene a vanwani va enghenisilwe xikhundleni xa wupristi a handle ka kuhlambanya, kanilezi yena i lo engheniswa hi kuhlambanya hi loyi a ngaku ngalo kakwe: A Hosi yi hlambanyile, yi nga ha ta hunzuluka, yite: Wena u mupristi kala kupinzuka. Tis. 110:4

²²Hizalezo Jesu i mahile a mutiyisi wa xivumelwano xi nene ku hunza lexi xa kale:

²³A vapristi vanwani va wa hi vanyingi, hakuva a va nga zi koti ku simamisa ntirweni wabye hi kota ya kufa;

²⁴kanilezi yena, kota lezi a tshamako kala kupinzuka, a wupristi gakwe a gi na ku hunzulwa.

²⁵Hi kota ya lezo i na ni ntamu wa ku hanyisa hi kumbheleleko vona lava va tshinelako ka Nungungulu ha yena, hakuva wa hanya xontlhe xikhati kasi ku va kombelela.

²⁶Hakuva hi wa fanele a kuva ni mupristi wa hombe wa kunghahi, loyi a basileko, a nga hiko na nanzu ni zivi, a hambanyisilweko ni vaonhi, a tlakuselweko hehla ka matilo; [73]

²⁷loyi ku nga lavekiko kakwe lezaku masiku ni masiku a humesa miphahlelo ya zionho zakwe kuranga, a tlhela a humesela ya zionho za vanhu, khwatsi hi vanwani vapristi va hombe; hakuva lezo i lo zi maha kanwe ku enela, laha a nga ti nyikela wutsumbu gakwe. [74]

²⁸Hakuva a nayo wu yimisa a vanhu lava va nga ni gome a kuva vapristi va hombe; kanilezi a mhaka ya kuhlambanya leyi yi ngata hi nzhako ka nayo, yi yimisa a Nʼwana a mbhelelisilweko kala kupinzuka.