Read tshwa Maheberu 8 Bible Online

Maheberu 8 - tshwa bible

Maheberu 8

¹A tshinya ga timhaka leti hi ti wulako hi legi: Hi na ni mupristi wa hombe loyi a tshamileko hi le reveni ga xinene ga xitshamu xa wuhosi xa Wukulu le matilweni; [75]

²loyi a khozelako lomu ndlwini yo basa yi nga tabernakeli ga zinene, legi gi yimisilweko hi Hosi, na ku nga hi munhu.

³Hakuva vontlhe vapristi va hombe va yimiselwe ku nyikela minyikelo ni miphahlelo; hikwalaho ku lavekile na yenawu lezaku a hi ni xa ku nyikela ha xona. [76]

⁴Makunu loku a wa hi kona misaveni ngha a nga hi mupristi, hakuva va kona lava va nyikelako minyikelo kota nayo;

⁵lava va khozelako wutshanwini legi go basa, legi gi nga xifananiso ni xiruti xa zilo za le tilweni. Hakuva Mosi i lo layiwa hi Nungungulu na a nga se ku sangula ku maha a tabernakeli, ku ngalo: Cuwuka lezaku u maha zilo zontlhe kota a lezi u nga kombisiwa zona le xitsungeni. [77]

⁶Kanilezi makunu Kristu i kumile a wukhozeli ga hombe go hunza ga vona, kota lezi a nga mulamuli wa xivumelwano xa hombe ku hunza lexi xa kale, lexi xi seketelweko hi zitsumhiso za zinene nguvu. [78]

⁷Hakuva loku a xivumelwano xe sangula xi wa nga hi na kusoleka, zonake ngha ku nga lavekangi a wutshamu ga xa wumbiri.

⁸Kanilezi Nungungulu i lo va sola, aku: Languta, a masiku ma tata, ku wula Hosi, Lawa nzi to maha a xivumelwano xiswa ni yindlu ya ka Israeli, ni yindlu ya ka Juda; [79]

⁹Na ku nga hi ku kota a xivumelwano lexi nzi xi mahileko ni vararu vabye, A sikwini legi nzi nga va khoma hi canja nzi va humesa a tikweni ga Gipite; Hakuva a va simamisangi xivumelwaneni xa mina, Na minawu a nzi va khatalelangi, ku wula Hosi.

¹⁰Hakuva lexi hi xivumelwano nzi to xi maha ni yindlu ya ka Israeli Anzhako ka lawo masiku, ku wula Hosi: Nzi ta veka milayo ya mina kupimeni kabye, Nzi yi tsala timbilwini tabye; Nzi tava Nungungulu wabye, Na vona va tava vanhu va mina. [80]

¹¹A vaakelani va nga ta ha gonzisana, Munhu a nga ta gonzisa makabye, aku: Tiva Jehova! Hakuva vontlhe va ta nzi tiva, Kusukela ka vatsongwani vabye kala vahombe [81]

¹²Hakuva nzi ta maha wuxinji nzi va tsetselela a kubiha kabye, Cima nzi nga ta ha alakanya a zionho zabye. [82]

¹³Lezi a nge ngalo: A xivumelwano xiswa, i kombisa lezaku lexi xo ranga xa kale makunu. Kanilezi lexi xi mahako xa kale xi guhala xi le kusuhi ni ku nwalala. [83]