Read tshwa Jakobe 1 Bible Online

Jakobe 1 - tshwa bible

Jakobe 1

¹Mina Jakobe, a nanza ga Nungungulu, ni ga Hosi Jesu Kristu, nza rungula ka khume ga tixaka ni timbiri leti ti hangalakileko. [1]

²Vamakabye va mina, ngha mu wula lezaku kutsaka ntsena loku mu wela lomu minzhingweni yi tsalangeneko; [2]

³na mu tiva lezaku a kuringwa ka kukholwa ka nwina ku vanga kutimisela. [3]

⁴Kanilezi a kutimisela a kuve ni ntiro lowu wu mbheleleko, lezaku mu mbhelela ni ku tala, mu nga kiyelelwi ha nchumu.

⁵Kanilezi loku munwani wa nwina a vumala wutlhari, a kombele ka Nungungulu, loyi a nyikako vontlhe hi matsenya na a nga soli, zonake i ta nyikiwa. [4]

⁶Kanilezi ngha a kombela hi kukholwa, a nga kanakani; hakuva loyi a kanakanako i fanana ni mabyandlati ya bimbi ma kukuletwako hi mheho ma ndlengandlengiswa. [5]

⁷A munhu wa kunghaho ngha a nga tsumbi lezaku i ta hiwa nchumu hi Hosi,

⁸munhu loyi a nga ni timbilu timbiri, wa ndlengandlengiswa tindleleni takwe tontlhe.

⁹Ngha makabye loyi a koramileko a ti kulisa hi kota ya kutlakuswa kakwe;

¹⁰ni loyi a fumileko a ti kulise hi kota ya kukoramiswa kakwe; hakuva i ta hunza khwatsi hi xitsangi xa byanyi. [6]

¹¹Hakuva a gambo gi tsuwuka, gi neha mumu gi wunisa a byanyi, a zitsangi za gona zi tlhatlheka, ku nwalala a kusaseka ka gona; zinghaho ni munhu a fumileko, i ta wuna mitirweni yakwe yontlhe.

¹²I katekile a munhu loyi a timiselako minzhingweni; hakuva loku a ringilwe a kumeka na a tiyile, i ta amukeliswa a xidlodlo xa wutomi, lexi a Hosi yi tsumbisileko lava va yi ranzako. [7]

¹³Loku munhu a ringwa ngha a nga wuli, aku: Nzi ringwa hi Nungungulu; hakuva Nungungulu a nga zi koti ku ringwa hi kubiha, yena wutsumbu a nga na ku ringa munhu.

¹⁴Kanilezi munwe ni munwani i ringwa hi kunavela kakwe ntsena, a kokiwa ni ku xengwa.

¹⁵Zonake a kunavela, loku ku xurile nyimba ku pswala kuonha; ni kuonha laha na ku kulile ku pswala kufa. [8]

¹⁶Mu nga ti kanganyisi, vamakabye va mina va ranzekako.

¹⁷Zontlhe zinyikiwo zo saseka ni zinyikiwo zontlhe zi mbheleleko zita hi le hehla, zi relela hi ka Dadani wa kuwonekela, loyi a nga hiko na kuhunzuluka, a ka yena a ku na kuhunzuka-hunzuka kuva kuwonekela ni munyama. [9]

¹⁸Hi kuranza kakwe i hi belekile hi mhaka ya zinene, kasi hi tava a mihanzu yo rangula ya zivangwa zakwe. [10]

¹⁹Nwina ma zi tiva lezi vamakabye va mina va ranzekako. Kanilezi ngha munwe ni munwani a hatlisa kuzwa, a nonoka ku wulawulela nonoka ku zangara; [11]

²⁰hakuva a zanga ya munhu a yi tiri a kululama ka Nungungulu.

²¹Hikwalaho hoxani a zivi zontlhe ni kubiha kontlhe, mu amukela hi kutikoramisa a mhaka leyi yi byalilweke ka nwina, leyi yi zi kotako ku hanyisa a mihefemulo ya nwina. [12]

²²Kanilezi ngha mu hi vamahi va mhaka, mu nga hi vazwi ntsena, mu ti kanganyisa. [13]

²³Hakuva loku munhu azwa a mhaka, a nga yi mahi, i fanana ni munhu loyi a wonako a nghohe yakwe lomu wonini; [14]

²⁴wa ti cuwuka yena wutsumbu, kanilezi loku a suka wa kohlwa lezaku i munhu wa ku yiniyini,

²⁵Kanilezi loyi a cuwukako nayweni wu mbheleleko, lowu wa kutlhatlheka, a nonohisa ka wona, na a nga hi muzwi a rivalako, kanilezi na hi loyi a tirako, a munhu loyi i ta katekiswa kumaheni kakwe; [15]

²⁶Loku a hi kona loyi a alakanyako ku ngalo mukholwa, na a nga khomi lirimi lakwe, kanilezi a khohlisa mbilu yakwe, a kukholwa ka munhu loye a ku vuni nchumu. [16]

²⁷A kukholwa ku basileko, loku ku nga hiko na kusoleka mahlweni ka Nungungulu wa hina a Dadani, hi loku: A kuya kamba zisiwana ni tinoni kuxanisekeni kabye, ni ku ti hlayisa a nga hi na bala hi za tiko. [17]