Read tshwa Jakobe 2 Bible Online

Jakobe 2 - tshwa bible

Jakobe 2

¹Vamakabye va mina, a kukholweni ka nwina hi Hosi ya hina Jesu Kristu, a Hosi ya kungangamela, mu nga hlawuli vanhu. [18]

²Hakuva loku kuta munhu mutlhanganweni wa nwina, loyi a nga ni phera ya nzalama, a ambeleko tinguwo to saseka; kuta kambe a munhu a vumalako, a ambeleko tinguwo ti nga ni chaka;

³mu khatalela loyi a ambeleko tinguwo to saseka, muku kakwe: Tshama laha mahlweni; mu wuya muku ngalo ka loyi a vumalako: Wena yima lahaya, kutani muku: Tshama lahasi mikonzweni ya mina.

⁴Xana a mu mahi xihlawulela xikari ka nwina ke, muva Valamuli va nga ni maalakanyo ya kubiha ke?

⁵Ingisani, vamakabye va mina va ranzekako; Xana Nungungulu a nga hlawulangi lava va vumalako hi za tiko, lezaku vava lava va fumileko kukholweni, ni kuva zigatshomba ya mufumo lowu a wu tsumbisileko vona lava va mu ranzako ke? [19]

⁶Kanilezi nwina mu kanyisa loyi a vumalako. Xana lava ya fumileko a hi vona va mu xanisako ke, a hi vona va mu kokoviselako tihubyeni ke? [20]

⁷Xana a va rukateli a vito legi gi nene mu vitanwako ha gona ke?

⁸Kanilezi mu maha khwatsi loku mu tatisa a nayo wa wuhosi, kota lezi Mitsalo yi nge ngalo: U ta ranza wakelene na wena kota lezi u ti ranzako wena. [21]

⁹Kanilezi ma onha loku mu hi ni kuhlawula vanhu, ma koniwa hi nayo lezaku mu vahambunyeti.

¹⁰Hakuva loku munhu a hlayisa nayo wontihe, kanilezi a khunguvanyeka hi mhaka yinwe, i na ni nanzu ka wona wontihe. [22]

¹¹Hakuva loyi a ngaku ngalo: U nga bhayi, i ngalo kambe: U nga dayi. Makunu loku u nga bhayi, kanilezi u daya, wena u muhambunyeti wa nayo. [23]

¹²Wulawuleni, mu maha kota zi faneleko vanhu lava va ta nga lamulwa hi nayo wa kutlhatlheka.

¹³Hakuva loyi a nga mahangiko wuxinji a nga ta mahelwa wuxinji kulamuleni; kanilezi a wuxinji gi ta ti kulisa hehla ka kulamula. [24]

¹⁴Vamakabye va mina, xana zi vuna yini loku munhu aku i na ni kukholwa, kanilezi a nga hi na mitiro? A kukholwa ka kunghaho ku nga mu hanyisa ke? [25]

¹⁵Loku a nakuloni kutani makwenu a hi ni wuna, va vumala kuga ka masiku ni masiku, [26]

¹⁶zonake munwe wa nwina aku kabye: Fambani hi kurula, mu kufumela, mu xura, na mu nga va nyikangi lezi zi lavekako mirini, zi vuna yini lezo ke?

¹⁷Lezo ni kukholwa, loku ku nga hi na mitiro, ku file a wutsumbu ga kona.

¹⁸Kanilezi munwani i taku ngalo: Wena u na ni kukholwa, mina nzi na ni mitiro. Nzi kombe a kukholwa ka wena na ku hi hava mitiro, mina nzi ta ku komba a kukholwa ka mina hi mitiro ya mina.

¹⁹Wa kholwa lezaku Nungungulu munwe, hizona lezo; a madimoni na wonawu ma kholwa ma rurumela. [27]

²⁰Xipumbu nzi wena, hikuyini u nga ranziko a ku tiva lezaku a kukholwa loku ku nga hava mitiro a ku vuni nchumu ke?

²¹A kokwani wa hina Abrahama, a nga hlayelwangi kululama hi mitiro ke, laha a nga nyikela Isaka a nʼwana wakwe hehla ka alati? [28]

²²Wa zi wona lezaku a kukholwa ku lo tira zinwe ni mitiro yakwe; a kukholwa ku lo mbheleliswa hi mitiro. [29]

²³Hizalezo wu lo tatiseka a mutsalo lowu wu nge ngalo: Abrahama i lo kholwa ka Nungungulu, ku lo hlayelwa ka yena lezaku kululama; i lo vitanwa lezaku i xaka ga Nungungulu. [30]

²⁴Ma zi wona lezaku a munhu i hlayelwa kululama hi mitiro yakwe, na ku nga hi kukholwa koce.

²⁵Hizalezo na Rahabi, a xibhayi, a nga hlayelwangi kululama hi mitiro ke, lezi a nga amukela a tihloli, a ti fambisa hi yinwani ndlela? [31]

²⁶Hakuva kota lezi wu fileko a miri lowu wu nga hava moya, hizalezo ni kukholwa loku ku nga hava mitiro ku file.