Read tshwa Jakobe 4 Bible Online

Jakobe 4 - tshwa bible

Jakobe 4

¹Kuta hi kwihi a kulwa ni kukanetisana xikari ka nwina ke? Xana a ku humi kumbilukeleni loku ku lwako zirweni za nwina ke? [43]

²Mu tele hi kumbilukela, kanilezi a mu na nchumu; ma daya, mu navela, kanilezi a mu na ku zi kuma; ma kanetisana ni ku holova, kanilezi a mu na nchumu, hakuva a mu kombeli.

³Nwina ma kombela, kanilezi a mu amukeliswi; hakuva mu kombela hi kubiha, kasi ma fela ku zi hangalasa kunaveleni ka nwina. [44]

⁴Nwina zibhayi, a mu zi tivi lezaku a wuxaka ni tiko mbulala ka Nungungulu ke? Hikwalaho kani hi wihi a nga ni wuxaka ni tiko i ti maha nala wa Nungungulu. [45]

⁵Kutani mu alakanya lezaku a Mitsalo yi wula mahala ke? Wa wu navela hi xiluse a moya lowu a wu mahileko lezaku wu tshama ka hina. [46]

⁶Kanilezi yena wa hi engetela tipswalo, hikwalaho a mutsalo wu ngalo: Nungungulu wa ala a vamatshanza, kanilezi a nyika tipswalo ka lava va ti koramisako. [47]

⁷Hikwalaho ti koramiseni ka Nungungulu; alani Satani, zonake i ta suka ka nwina. [48]

⁸Tshinelani ka Nungungulu, na yena i ta tshinela ka nwina. Hlambani mandla, nwina vaonhi; mu basisa timbilu ta nwina, nwina va timbilu timbiri. [49]

⁹Xanisekani, muba nkosi, mu rila; ngha kuhleka ka nwina ku hunzulwa kuva xirilo, ni kutsaka ka nwina ku hunzulwa kuva hlomulo. [50]

¹⁰Ti koramiseni mahlweni ka Hosi, yona yi ta mu kulisa. [51]

¹¹Mu nga hlevani, vamakabye. Loyi a hlevako makabye, kutani a lamula makabye, yena i hleva nayo, a lamula nayo; kanilezi loku u lamula nayo, a ku mumahi wa nayo, kanilezi u mulamuli wa wona. [52]

¹²Munwe ntsena a nga muyimisi wa milayo ni mulamuli; hi yena loyi a zi kotako ku hanyisa ni ku daya. Kanilezi hi wena mani loyi u lamulako a wakelene wa wena ke? [53]

¹³Ma nga zwani nwina lava mu wulako muku: Inyamutlha kutani manziko hi taya mutini wo kari, hi ya tshama lembe kona, hi xavisa, hi bhinzula;

¹⁴kasi lezo a mu zi tivi za manziko. Xini a wutomi ga nwina ke? Hakuva nwina mu hunguva, leyi yi wonekako xikhatanyana, yi nyamalala. [54]

¹⁵Kasi lezo mu fanele ku wula muku: Loku Hosi yi zi ranza, na hi kari hi hanya, hi ta maha zo kari ni zo kari. [55]

¹⁶Kanilezi makunu mo bhuma matshanzeni ya nwina; a kubhuma kontlhe ka kunghaho ku bihile. [56]

¹⁷Loyi a tivako ku maha zinene, a nga zi mahi, i na ni xionho. [57]