Read tshwa 1 Pedro 3 Bible Online

1 Pedro 3 - tshwa bible

1 Pedro 3

¹Hizalezo na nwina vasati, ingisani vanuna va nwina; lezaku kasi hambu loku va hi kona lava va nga ingisiko mhaka, va fela ku kokiwa hi mahanyela ya vasati vabye hi handle ka mhaka; [37]

²na va wona a mahanyela ya nwina ya kubasa zinwe ni xichawo.

³A kubomba ka nwina ngha mu nga bombi hi lahandle hi ku luka misisi, ni ku bomba hi zilo za nzalama, kutani hi ku ambala tinguwo; [38]

⁴kanilezi ngha mu bombisa a munhu loyi a fihlilweko wa mbilu, hi tinguwo leti ti nga boliko ta moya wa kurula ni kuolova, lowu wu nga ni tsengo wa hombe mahlweni ka Nungungulu. [39]

⁵Hakuva a kale a va bombisa lezo a vavasati va kubasa, lava va nga tsumba Nungungulu, va ingisa vanuna vabye.

⁶Kota lezi Sara a nga ingisa Abrahama, a mu vita aku i hosi yakwe; loyi mu nga vana vakwe makunu loku mu maha zinene, mu nga dzukiswi hi nchumu. [40]

⁷Hizalezo na nwina vanuna, tshamani ni vasati va nwina hi ku chela kota, na mu tiva lezaku a wasati xibya xa wukheta, mu va dzunza kota lezi va nga zigatshomba-kuloni ya tipswalo ta wutomi, kasi a mikhongelo ya nwina yi nga tsanzekiswi. [41]

⁸Hi kugumesa, ngha nwina nwentlhe mu hi ni mbilu yinwe, mu zwelana, mu ranzana ni vamakabye, mu hi ni wuxinji, mu ti koramisa. [42]

⁹Mu nga tlheliseli a kubiha hi kubiha, hambu ku tlhelisela a nzhukano hi nzhukano; kanilezi katekisani vanhu, hakuva mu vitanelwe lezo, lezaku mu taga a tshomba ya kukateka. [43]

¹⁰Hakuva: Yena loyi a lavako a kuva a tsakela wutomi Ni ku wona a masiku ya kusaseka, Ngha a tsimbetela a lirimi lakwe ka za kubiha, Ni milomu yakwe lezaku yi nga wulawuli kukhohlisa. [44]

¹¹Ngha a fularela a za kubiha, a maha kusaseka; A lave kurula, a ku lanzela. [45]

¹²A mahlo ya Hosi ma cuwuka a valulamileko, Ni tindleve ta yona ti kangatele mikombelo yabye; Kanilezi a nghohe ya Hosi yi tsuvile ka vona lava va mahako kubiha. [46]

¹³Xana himani a ta nga mu mahela kubiha loku mu pangamela lezi za zinene ke?

¹⁴Kanilezi mu katekile loku mu xaniseka hi kota ya kululama; mu nga chavi a kudzukisa kabye, hambu ni ku karateka. [47]

¹⁵Dzunzani Kristu kota Hosi timbilwini ta nwina; na mu longile ku hlamula hi kurula ni xichawo ni wihi munhu loyi a mu wutisako hi xigelo xa kutsumba ka nwina, [48]

¹⁶na mu hi ni livalo li nene, kasi va fela ku telwa hi tingana hi lezi va mu hlevako ha zona, lava va rukatelako a mahanyela ya nwina ya ma nene ka Kristu. [49]

¹⁷Hakuva i chukwana a kuva mu xaniseka hi kota ya ku maha kusaseka, loku Nungungulu a ranza lezo, ku hunza a ku xaniseka hi kota ya kubiha.

¹⁸Hakuva na Kristu i lo xaniseka kanwe hi kota ya zionho; yena loyi a lulamileko i lo xanisekela lava va nga lulamangiko, kasi a fela ku hi yisa ka Nungungulu; na a dayilwe nyameni, i lo hanyiswa hi ka moya; [50]

¹⁹lowu a nga famba ha wona a ya kanela ka mimoya leyi yi nga hi makhotsweni, [51]

²⁰leyi a kale yi nga kala yi nga ingisi, laha Nungungulu a nga rinzela hi lihlaza-mbilu a masikwini ya Noa, na ka ha akiwa a taru, legi ku nga hanyiswa ha gona matini a ntlhanu wa vanhu ni vanharu ntsena, [52]

²¹a ku fanana ni mati lawa ma mu hanyisako makunu hi kubapatizwa, na ku nga hi ku susa a chaka ga miri, kanilezi hi ku kombela a livalo li nene ka Nungungulu, hi kuvuka ka Jesu Kristu; [53]

²²loyi a yileko tilweni, a ya tshama reveni ga xinene ga Nungungulu; a tingelosi ni tihosi ni mintamu na zi vekilwe a lahasi kakwe. [54]