Read tshwa 1 Pedro 5 Bible Online

1 Pedro 5 - tshwa bible

1 Pedro 5

¹Hikwalaho nza khongotela a masingalakati lawa ma nga xikari ka nwina, na nzi hi singalakati-kulobye, ni kustumunyu wa kuxaniseka ka Kristu, hi xihlengeli xa kungangamela loku ku ta nga vululwa, nziku ngalo: [70]

²Risani a ntlhambi wa Nungungulu lowu mu nga nawo, mu nga wu hlayisi hi kukurumetwa kanilezi hi ku zi ranza; na ku nga hi ku tirela bhinzu, kanilezi hi matsenya; [71]

³na ku nga hi ku khwatsi mu tihosi hehla ka zipanze lezi mu avelweko zona, kanilezi mu maha zikombiso ka ntlhambi. [72]

⁴Kasi laha a Murisi wa hombe a ta nga wonekeliswa, mu ta kuma a xidlodlo xa kungangamela lexi xi nga guhaliko. [73]

⁵Hizalezo na nwinawu vaswa, ingisani a masingalakati. Ina, nwentlhe ti boheni hi kutikoramisa, mu tirelana; hakuva Nungungulu wa ala a vamatshanza, kanilezi i nyika tipswalo ka lava va ti koramisako.

⁶Hikwalaho ti koramiseni lahasi ka canja ga ntamu wa Nungungulu, kasi yena wa fela ku mu kulisa hi xikhati xi faneleko. [74]

⁷Vekani hehla ka yena kontlhe a kukarateka ka nwina, hakuva wa mu khatalela. [75]

⁸Ti khomeni, mu rinzela; hakuva a nala wa nwina Satani wa fambafamba kota nghala leyi yi dzumako, a hlota loyi a ta nga mu khadamula. [76]

⁹Mu kaneteni hi kutiya kukholweni ka nwina, na mu tiva lezaku a kuxaniseka ka kunghahi ku humelela a vamakabye va nwina vontlhe va nga lomu misaveni. [77]

¹⁰A Nungungulu wa tipswalo tontlhe, loyi a nga mu vitanela a kungangameleni kakwe ka pinzukelwa ka Kristu, i ta mu mbhelelisa a mu tiyisa, ni ku mu nyika ntamu, anzhako ka kuva mu xanisekile a xikhatanyana. [78]

¹¹A ntamu a wuve ka yena kala kupinzuka ni kupinzuka. Amen.

¹²Mina nzi tsalile a timhaka leti ti tsongwani ha yena Silvanusi, a nakulori a tsumbekileko hi kuwona ka mina, kasi ku mu khongotela ni ku maha wukustumunyu lezaku a tipswalo ti nene ta Nungungulu hi leti. Yimani muku nde ka tona. [79]

¹³A bandla ga le Babuloni, legi gi hlawulilweko zinwe na nwina, ga mu rungula; na Marku nwananga. [80]

¹⁴Losanani hi kupswopswa ka Liranzo. A kurula a kuve na nwina nwentlhe lava mu nga ka Kristu.