Read tshwa 2 Pedro 3 Bible Online

2 Pedro 3 - tshwa bible

2 Pedro 3

¹Varanzekako, legi i papilo ga wumbiri nzi mu tsalelako gona; hi wumbiri ga wona nzi vuxa a kupima ka nwina loku ku basileko hi ku mu alakanyisa,

²lezaku mu ehleketa a timhaka leti ti nga kanelwa kale hi vaprofeti vo basa, ni xileletelo xa Hosi tlhelo Muhanyisi lexi mu nyikilweko xona hi vapostoli va nwina. [32]

³A kuranga tivani lezaku a masikwini ya kugumesa ku tata a vatseketseli va wulawula kutseketsela, na va famba kumbilukeleni kabye, [33]

⁴vaku: Hi kwihi a kuwuya kakwe ku tsumbisilweko ke? Hakuva cima ka lezi vadadani va nga etlela, zontlhe za ha tshamisile zalezo zi nga tshamisile zona hi le kusanguleni ka kuvangiwa.

⁵Hakuva a va ranzi ku vumela lezaku a matilo ma wa hi kona kusukela kaleloko, ni misava yi wumbilwe yi huma matini, na yi tshama xikari ka mati hi gezu ga Nungungulu. [34]

⁶A misava leyi yi nga hi kona hi lexo xikhati yi lo khulungelwa hi mati lawa, yi lova. [35]

⁷Kanilezi a matilo laya ma nga kona makunu, ni misava, zi hlayiselwe nzilo hi gezu gwalego, zi gongelwa a siku ga kulamulwa ni ga kulobyiswa ka vanhu, lava va nga chaviko Nungungulu. [36]

⁸Kanilezi vamakabye, mu nga kohlwi hi mhaka leyi, yaku: A ka Hosi a siku ginwe gi khwatsi hi khume ga mazana ya malembe, ni khume ga mazana ya malembe me khwatsi hi siku ginwe. [37]

⁹A Hosi a yi hlweli ku maha lezi yi nga tsumbisa zona, kota lezi vanwani va alakanyako lezaku ya hlwela. Kanilezi yi timisela ha nwina, hakuva a yi ranzi lezaku ku lova ni munwe, kanilezi yi ranza lezaku vontlhe va hunzuluka. [38]

¹⁰Kanilezi a siku ga Hosi gi tata kota khamba; a matilo ma ta hunza ha gona hi guwa ga hombe, ni tinyeleti ti ta nyunguluka hi kuhisa ka hombe, a misava ni mitiro yi nga ka yona yi taswa yi mbhela. [39]

¹¹Kota lezi zontlhe lezi zi ta nga nyamalaliswa, nwina mu fanele a kuva vanhu ba kuyini mahanyeleni wontihe yo basa ni wukhongeli!

¹²Nwina lava mu langutelako mu hatlisisa a kuta ka siku ga Nungungulu, legi a matilo ma ta nga hiswa ha gona ma nyunguluka, ni tinyeleti ti ta nga nyeka hi kuhisa ka hombe. [40]

¹³Kanilezi hi kota ya xitsumbiso xakwe, hiha ha langutela a matilo maswa ni misava yiswa, lomu a kululama ku tshamileko kona. [41]

¹⁴Hikwalaho, varanzekako, kota lezi nwina mu langutelako lezi zilo, chelani kota lezaku mu ta kumiwa hi yena na mu hi ni kurula, mu nga hi na bala na khwanga mahlweni kakwe. [42]

¹⁵Pimani lezaku a lihlaza-mbilu la Hosi ya hina kuhanyisa, kota lezi a makabye wa hina a ranzekileko Paule, a nga tsala ka nwina hi kutlhariha loku a nyikilweko kona; [43]

¹⁶i maha lezo mapapilweni yakwe wontihe, loku a wulawula hi timhaka leti. A xikari ka wona ti kona timhaka tinwani leti ti tsanzako ku pimiwa, leti lava va nga gonzangiko ni va nga tiyangiko va ti hunzuluselako va lahleka, kota lezi va mahako hi yinwani mitsalo. [44]

¹⁷Hikwalaho, varanzekako, kota lezi mu byelilweko zilo lezi na zi nga se ku maheka, tlharihani, mu nga dzuka mu kokiwa hi zihambuko za vakubiha, mu retemuka kutiveni ka nwina. [45]

¹⁸Kanilezi kutani tipswalweni ni kutiveni ka Hosi ni Muhanyisi wa hina Jesu Kristu. Ka yena a kuve wudzunzo makunu ni kala kupinzuka. Amen. [46]