Read tshwa 1 Johani 2 Bible Online

1 Johani 2 - tshwa bible

1 Johani 2

¹Vana vanga, nza mu tsalela timhaka leti lezaku kasi mu fela ku kala mu nga onhi. Kanilezi loku munhu a onha, hi na ni Muyimeli ka Dadani, a nga Jesu Kristu a lulamileko. [8]

²Hi yena a nga nzhiho wa ku susa zionho za hina, na ku nga hi za hina ntsena, kanilezi ni za tiko gontlhe kambe: [9]

³Hi laha hi zi tivako ha kona lezaku ha mu tiva, loku hi hlayisa a milayo yakwe.

⁴Loyi a wulako aku: Nza mu tiva, na a nga hlayisi a milayo yakwe, wa hemba, ni zinene a zi kona ka yena.

⁵Kanilezi ni wihi a hlayisako a mhaka yakwe, hakunene a liranzo la Nungungulu li mbhelelisilwe ka yena. Hi laha hi zi tivako lezaku hi kona ka yena. [10]

⁶Loyi a wulako aku i tshama ka yena, i yimelwe hi ku famba kota lezi yena a nga fambisa zona. [11]

⁷Varanzekako, a nzi mu tsaleli a nayo muswa, kanilezi i nayo wa kale lowu mu nga hi nawo hi kusanguleni; a nayo lowu wa kale hi mhaka leyi mu yi zwileko. [12]

⁸Ahembalezoke, nza mu tsalela a nayo muswa, lowu wu nga zinene a ka yena ni ka nwina; hakuva a munyama wa hunza, ni kuwonekela ka zinene ka woninga. [13]

⁹Loyi a wulako aku i le kuwonekeleni, na a venga a makabye wakwe, wa ha hi munyameni ni lezi.

¹⁰Loyi a ranzako makabye wakwe i le kuwonekeleni, a ku na xikhunguvanyiso ka yena. [14]

¹¹Kanilezi loyi a vengako makabye wakwe i le munyameni, i famba munyameni, a nga ku tivi laha a yako kona, hakuva a munyama wu dele a mahlo yakwe. [15]

¹²Nza tsala ka nwina, vanana va tsongwani, hakuva a zionho za nwina zi tsetselelwe hi kota ya vito gakwe. [16]

¹³Nza tsala ka nwina, vadadani, hakuva ma mu tiva loyi a nga hi kona hi le kusanguleni. Nza tsala ka nwina, majaha, hakuva mu hlulile loyi wa kubiha. Vanana, nzi mu tsalele, hakuva ma mu tiva Dadani.

¹⁴Vadadani, nzi mu tsalele, hakuva ma mu tiva loyi a nga hi kona hi le kusanguleni. Majaha, nzi mu tsalele, hakuva mu na ni ntamu; a mhaka ya Nungungulu yi tshamile ka nwina, mu mu hlulile loyi wa kubiha. [17]

¹⁵Mu nga ranzi tiko, hambu ni zilo lezi zi nga lomu tikweni. Loku munhu a ranza tiko, a liranzo la Dadani a li kona ka yena. [18]

¹⁶Hakuva zontlhe lezi zi nga laha tikweni: a kunavela ka nyama, ni kunavela ka mahlo, ni kutikulisa hi kota ya zilo za loku kuhanya, a ziti hi ka Dadani, kanilezi zita hi lomu tikweni.

¹⁷Kanilezi a tiko ga hunza, ni kunavela ka gona; kanilezi loyi a mahako kuranza ka Nungungulu i ta tshama kala kupinzuka. [19]

¹⁸Vana vanga, makunu xikhati xo gumesa; kota lezi mu nga zizwa lezaku wata Mukaneti wa Kristu, hambu ni lezi va kona vanyingi vakaneti va Kristu; hi kota ya lezo ha zi tiva lezaku xikhati xo gumesa. [20]

¹⁹Va humele xikari ka hina, kanilezi va wa nga hi va hina; hakuva loku va wa hi va hina, ngha va simamisile zinwe na hina; kanilezi va lo huma kasi ku fela ku woneka lezaku vontlhe a hi va hina. [21]

²⁰Nwina mu totilwe hi Loyi wa Kubasa, ma zi tiva zilo zontlhe. [22]

²¹Nzi mu tsalele, na ku nga hi lezaku mo kohlwa hi zinene, hakuva ma zi tiva, mu tiva ni lezaku a wunwa a gi humi lomu zineneni.

²²Himani Muhembi, loku ku nga hi yena loyi a kanetako lezaku Jesu hi Kristu ke? A Mukaneti wa Kristu hi yena loyi a kanetako Dadani ni Nʼwana.

²³Kani himani a kanetako Nʼwana, yaloye a nga na Dadani; loyi a vumelako a Nʼwana i na ni Dadani kambe. [23]

²⁴Lezi mu nga zizwa hi kusanguleni a zi tshame ka nwina. Loku zi tshama ka nwina lezi mu nga zizwa hi kusanguleni, nwinawu mu ta tshama ka Nʼwana ni ka Dadani. [24]

²⁵A xitsumbiso lexi a nga hi tsumbisa xona hi lexi, a wutomi ga pinzukelwa. [25]

²⁶Nzi mu tsalele a timhaka leti hi kota ya vona lava va lavako ku mu kanganyisa.

²⁷Kanilezi a kutotiwa loku mu ku amukeleko hi ka yena ku tshamile ka nwina, a za ha laveki lezaku mu gonziswa hi munhu; kanilezi kota lezi a kutota kakwe ku mu gonzisako zontlhe zi nga zinene, na ku nga hi na wunwa, tshamani ka yena kota lezi ku mu gonzisileko. [26]

²⁸Makunu, vana vanga, tshamani ka yena; lezaku hi fela kuva ni kutiya hi siku legi a ta nga wonekeliswa ha gona, hi nga hi na tingana mahlweni ka yena a kuwuyeni kakwe.

²⁹Loku mu tiva lezaku yena i lulamile, zi tiveni lezaku ni wihi loyi a mahako lezi zi lulamileko i belekilwe hi yena. [27]