Read tshwa 1 Johani 3 Bible Online

1 Johani 3 - tshwa bible

1 Johani 3

¹Langutani lezaku liranzo la kuyini leli Dadani a hi ranzileko ha lona, lezaku hi vitanwa aku hi vana va Nungungulu; hakuva hi hina vona. A tiko a gi hi tivi, hakuva yenawu a gi mu tivangi. [28]

²Varanzekako, makunu hina hi vana va Nungungulu; kanilezi a zi se ku wonekeliswa lezi hi ta ngava zona. Ha zi tiva lezaku loku yena a wonekeliswa, hi ta fanana naye; hakuva hi ta mu wona kota lezi a nga zona. [29]

³Ni wihi loyi a nga ni kutsumba loku ha yena, wa ti basisa, kota lezi yena a basileko.

⁴Ni wihi loyi a onhako i hambunyeta nayo; hakuva a kuonha hi ku hambunyeta nayo.

⁵Nwina ma zi tiva lezaku yena i lo wonekeliswa kasi ku susa zionho za hina; a ka yena a ku na xionho. [30]

⁶Kani hi wihi a tshamako ka yena a nga onhi; kani hi wihi a onhako a nga mu wonangi, ge ni ku mu tiva. [31]

⁷Vana vanga, ngha mu nga kanganyiswi hi munhu; loyi a mahako lezi zi lulamileko i lulamile, kota lezi yena a lulamileko. [32]

⁸Loyi a onhako ngwa Satani, hakuva Satani i onhile hi le kusanguleni. Kanilezi a Nʼwana wa Nungungulu i lo wonekeliswa lezaku a fela ku mbhetisa a mitiro ya Satani. [33]

⁹Kani hi wihi a belekilweko hi Nungungulu a nga onhi, hakuva a mbewu ya Nungungulu yi tshamile ka yena; a nga zi koti ku onha, hakuva i belekilwe hi Nungungulu. [34]

¹⁰Hi xwalexo xi kombisako lava va nga vana va Nungungulu ni lava va nga vana va Satani: kani hi wihi loyi a nga mahiko lezi zi lulamileko a hi wa Nungungulu, ge ni loyi a nga ranziko makabye wakwe.

¹¹Hakuva a mhaka leyi mu yi zwileko hi le kusanguleni hi leyi, lezaku hi ranzana; [35]

¹²hi nga koti Kana, loyi a nga hi nʼwana wa loyi wa kubiha, a daya nakulobye. Xana i lo mu daya hikuyini ke? Hilezi a mitiro yakwe yi wa bihile, ni ya nakulobye yi wa lulamile. [36]

¹³Mu nga hlamali, vamakabye, loku a tiko gi mu venga. [37]

¹⁴Hina ha zi tiva lezaku hi humile kufeni hi enghena kuhanyeni, hakuva ha ranza vamakabye. Loyi a nga ranziko wa ha tshamile kufeni.

¹⁵Kani hi wihi a vengako makabye wakwe, mudayi; nwina ma zi tiva lezaku a ku kona mudayi a nga ni wutomi ga pinzukelwa, legi gi tshamileko ka yena. [38]

¹⁶Ha li tiva liranzo hi kota ya lexi, lezaku Jesu i lo nyikela kuhanya kakwe hi kota ya hina; hikwalaho hi yimelwe hi ku nyikela a kuhanya ka hina hi kota ya vamakabye. [39]

¹⁷Kanilezi kani hi wihi a nga ni zilo za tiko legi, a wona makabye na a vumala, a nga mu hawukeli, a liranzo la Nungungulu li nga tshamisa kuyini ka yena? [40]

¹⁸Vana vanga, ngha hi nga ranzi hi kuwulawula, kutani hi lirimi, kanilezi a hi ranzeni hi kumaha ni zinene. [41]

¹⁹Hi kona hi ta nga zi tiva lezaku hi va zinene, hi tiyisa timbilu ta hina mahlweni ka yena. [42]

²⁰Hakuva loku a timbilu ta hina ti hi kona, Nungungulu wa hombe ku hunza timbilu ta hina, wa zi tiva zontlhe. [43]

²¹Varanzekako, loku timbilu ta hina ti nga hi koni, hi na ni kutsumba ku tiyileko mahlweni ka Nungungulu; [44]

²²zonake ni xihi lexi hi xi kombelako, ha amukeliswa hi yena, hakuva ha hlayisa milayo yakwe, hi maha lezi zi mu xalalisako. [45]

²³A kuleletela kakwe hi loku, lezaku hi kholwa vitweni ga Nʼwana wakwe Jesu Kristu, hi ranzana kota lezi yena a nga hi leletela. [46]

²⁴Loyi a hlayisako a zileletelo zakwe i tshama ka yena, na yena i tshama kakwe. Ha zi tiva lezaku i tshamile ka hina hi Moya lowu a hi nyikileko wona. [47]