Read tshwa 1 Johani 5 Bible Online

1 Johani 5 - tshwa bible

1 Johani 5

¹Kani hi wihi loyi a kholwako lezaku Jesu hi Kristu i belekilwe hi Nungungulu; ni loyi a ranzako Dadani wa ranza ni loyi a belekilweko hi yena. [63]

²Ha zi tiva lezaku hi ranza a vana va Nungungulu, loku hi ranza Nungungulu, hi hlayisa milayo yakwe.

³Hakuva a ku mu ranza Nungungulu hi ku hlayisa milayo yakwe; ni milayo yakwe a yi karati. [64]

⁴Hakuva kani hi xihi lexi xi belekilweko hi Nungungulu xa hlula tiko; a kuhlula loku ku hlulileko tiko hi kukholwa ka hina. [65]

⁵Himani loyi a hlulako tiko, loku ku nga hi yena loyi a kholwako lezaku Jesu i Nʼwana wa Nungungulu ke? [66]

⁶Jesu Kristu hi yena loyi a ngata hi mati ni nkhata; a nga tangi hi mati woce, kanilezi hi mati zinwe ni nkhata. [67]

⁷A Moya hi wona wu mahako wukustumunyu, hakuva a Moya hi zinene. [68]

⁸Hakuva a vakustumunyu mbanharu, hi Moya, ni mati, ni nkhata; lezi zinharu zi na ni wukustumunyu ginwe.

⁹Loku hi vumela wukustumunyu ga vanhu, a wukustumunyu ga Nungungulu gi hunzeletile; hakuva a wukustumunyu ga Nungungulu hi legi a nga gi mahela Nʼwana wakwe. [69]

¹⁰Loyi a kholwako ka Nʼwana wa Nungungulu i na ni wukustumunyu nzeni kakwe; loyi a nga kholwiko ka Nungungulu i mu mahile muhembi; hakuva a nga kholwangi a wukustumunyu legi Nungungulu a nga yimela ha gona Nʼwana wakwe. [70]

¹¹A wukustumunyu ga kona hi legi, gaku Nungungulu i hi nyikile a wutomi ga pinzukelwa, a wutomi legi gi kona ka Nʼwana wakwe.

¹²Loyi a nga ni Nʼwana i na ni wutomi, loyi a nga hiko na Nʼwana wa Nungungulu a nga na wutomi. [71]

¹³Nzi tsalile a timhaka leti ka nwina lava mu kholwako vitweni ga Nʼwana wa Nungungulu, lezaku kasi mu fela ku zi tiva lezaku mu na ni wutomi ga pinzukelwa. [72]

¹⁴A kutsumba loku hi nga nako ka yena hi loku, kaku i ta hizwa loku hi kombela nchumu lowu wu yelanako ni kuranza kakwe.

¹⁵Loku hina hi zi tiva lezaku wa hizwa, kani hi xihi lexi hi xi kombelako, zonake ha zi tiva lezaku hi sina hi hi nazo lezi hi zi kombelileko ka yena.

¹⁶Loku munhu a wona makabye wakwe na a kari a maha a xionho lexi xi nga yisiko kufeni, ngha a mu kombelela, na Nungungulu i ta mu nyika kuhanya, loku a xionho xi hi lexi xi nga yisiko kufeni. Xi kona a xionho xi yisako kufeni, a nzi wuli lezaku ku kombelelwa xona. [73]

¹⁷Kontlhe kungalulami kuonha; kanilezi xi kona xionho lexi xi nga yisiko kufeni.

¹⁸Hina ha zi tiva lezaku kani hi wihi a belekilweko hi Nungungulu a nga onhi; kanilezi loyi a nga belekiwa hi Nungungulu wa ti hlayisa, ni loyi wa kubiha a nga na ku mu henya. [74]

¹⁹Hina ha zi tiva lezaku hi va ka Nungungulu, ni lezaku a tiko gontlhe gi le ntanwini wa loyi wa kubiha.

²⁰Ha zi tiva lezaku a Nʼwana wa Nungungulu i tile, i hi nyikile kupima kasi ha mu tiva loyi wa zinene, hi kona ka loyi wa zinene, ka yena Nʼwana wakwe Jesu Kristu. Hi yena Nungungulu wa zinene, ni wutomi legi ga pinzukelwa. [75]

²¹Vana vanga, chavani a zifananiso za vanungungulu va mawunwa. [76]