Read tshwa Valamuli 12 Bible Online

Valamuli 12 - tshwa bible

Valamuli 12

¹A vanhu va ka Efraime va lo tsombana vaya tlhelo ga Nwalungu ka Jefta, va yaku: A siku lego u nga yalwa ni va ka Amoni, hi kuyini u nga kala ku hi vitana hi famba hontlheni? Hi ta hisa a yindlu ya wena.

²Jefta aku ka vona: Mina ni vanhu va mina hi wa phikizana nguvu ni vanana va ka Amoni. Nzi mu vitanile, kanilezi a mu tangi mu ta nzi tlhatlhisa mandleni yabye.

³Lezi nzi nga wona lezaku a mu nzi tlharihisi, a nzi wulangi nchumu hi wutomi ga mina, nzi loya mahlweni ka vanana va ka Amoni; kanilezi Jehova i lo va nyikela mandleni ya mina. Hi kuyini nyamutlha muta ku talwa na mina ke? [37]

⁴Zonake Jefta i lo tsombanyisa vontlhe vavanuna va ka Gileade, alwa ni va ka Efraime. A vavanuna va ka Gileade va lo hlula va ka Efraime, hakuva va waku: Nwina va ka Gileade mu valuveli va ka Efraime, mu tshamile xikari ka Efraime na Manasa.

⁵Zonake va ka Gileade va lo hlongola va ka Efraime, va ya vala mapelo ya le Jordani. Ku waku loku a munhu wa ka Efraime a tsutsuma, a taku: Nzi lava ku tlhatuka, a vanana va ka Gileade va mu wutisa, vaku: U muEfraime ke? Loku aku: Ahihi,

⁶zonake va waku kakwe: Wula uku: Xibbolete! loku yena a su: Sibbolete; hakuva i wa nga zi koti ku ecanyisa ku wulawula khwatsi, va si khoma va mu daya le mapelweni ya Jordani. Xikhatini xwalexo ku lo dawa 42,000 wa va ka Efraime.

⁷Jefta i lo maha mulamuli wa va ka Israeli ntlhanu wa malembe ni ginwe, zonake afa, a lahliwa ka wunwe wa miti ya ka Gileade.

⁸Anzhako ka Jefta, Ibzani wa le Betlehema i lo maha mulamuli wa ka Israeli.

⁹I wa hi ni 30 wa vafana ni 30 wa vanhanyana. I lo lowolisa vanhanyana ni ku lowota vafana vakwe.

¹⁰I lo maha mulamuli wa ka Israeli ntlhanu ni mambiri malembe, zonake afa, a lahliwa le Betlehema.

¹¹Anzhako kakwe, Eloni a muZebuloni i lo maha mulamuli wa ka Israeli. I lo lamula va ka Israeli 10 wa malembe.

¹²Zonake Eloni a muZebuloni i lofa, a lahliwa le Aijaloni, tikweni ga ka Zebuloni.

¹³Anzhako kakwe, Abdoni nʼwana Hileli, a muPiratoni, i lo maha mulamuli wa ka Israeli.

¹⁴I wa hi ni 40 wa vafana ni 30 wa vazukulu, va nga wa khilela 70 wa timbongola. I lo lamula va ka Israeli 8 wa malembe.

¹⁵Zonake Abdoni nʼwana Hileli, a muPiratoni, i lofa, a lahliwa tikweni ga ka Efraime le xitsungeni xa ka Amaleki.