Read tshwa Valamuli 14 Bible Online

Valamuli 14 - tshwa bible

Valamuli 14

¹Samsoni i lo relela aya le Timna; i lo ya wona wasati xikari ka vanhwana va maFilistia.

²I lo wuya a ta tivisa raru wakwe ni nyine wakwe, aku: Nzi wonile wasati xikari ka vanhwana va maFilistia le Timna, hikwalaho nzi lowoteni.

³Zonake a raru ni nyine wakwe va te ngalo kakwe: A ku na wasati xikari ka vanhwana va vamakabye va wena, kutani lomu tikweni ga hina ke, ko kala uya teka wasati wa maFilistia lawa ma nga makhuna? Samsoni aku ka raru wakwe: Nzi lowoteni yena, hakuva i nzi xalalisile. [41]

⁴Kanilezi a raru ni nyine wakwe va wa nga zi tivi lezaku a mhaka leyo yita hi ka Jehova, lezaku kasi Samsoni a kuma ndlela yo vukela ha yona maFilistia; hakuva lexo xikhati a maFilistia ma wa fumela va ka Israeli.

⁵Zonake Samsoni i lo relela aya Timna ni raru ni nyine wakwe. Laha na va chikele la zivineni za Timna, a role ga nghala gi lo dzuma gi mu vukela.

⁶Zonake a Moya wa Jehova wu lota ka yena hi ntamu. I lo pfhemula a nghala khwatsi hi loku a pfhemula a ximhutana, na nga hi na nchumu mandleni yakwe. Kanilezi a nga byelangi raru ni nyine wakwe lezi a zi mahileko.

⁷I lo relela a ya wulawula ni wasati; a wasati i lo xalalisa Samsoni.

⁸Anzhako ka xikhatana i lo tlhela ku ya teka a sati wakwe. I lo hambuka a ya wona a xirumbi xa nghala, a ya kuma a tsunzu wa tinyoxi na ti hi hehla ka nghala, ni wulombe lomu mirini wa yona.

⁹I lo gi teka a famba na a kari aga; laha a nga chikela ka raru ni nyine wakwe, i lo va khemela vaga. Kanilezi a nga va byelangi lezaku a wulombe lego i gi hakule xirumbini xa nghala.

¹⁰A raru wakwe i lo relela aya le ka wasati. Samsoni i lo maha mubuzo leyo, kota kutolovela ka majaha.

¹¹Laha va nga mu wona, va lo mu nehela 30 wa vapangalati.

¹²Samsoni i te ngalo kabye: Nza ha mu byela liteketelo. Loku mu li lanzula khwatsi lomu ka ntlhanu wa masiku ni mambiri ya mubuzo, nzi ta mu nyika a 30 wa mavemba ya wukene, ni 30 wa tinghanju ta mubuzo.

¹³Kanilezi loku mu tsanzeka ku li lanzula, hi nwina mu ta nga nzi nyika 30 wa mavemba, ni 30 wa tinghanju ta mubuzo. Vona va te ngalo: Hi byele liteketelo la wena hi lizwa!

¹⁴Yena i te ngalo kabye: Hi ka mugi ku lo huma zakuga. Hi ka wa ntamu ku lo huma kutsombela. Va lo tsanzeka ku lanzula liteketelo lomu ka masiku manharu.

¹⁵Makunu hi siku ga wuntlhanu ni mambiri, va te ngalo ka sati wa Samsoni: Xengetela a nuna wa wena, kasi a fela ku hi tlhamusela a liteketelo lakwe. Loku u nga mahi lezo, hi ta ku hisa ni yindlu ya raru wa wena. Kasi mu hi vitanele ku ta hi tekela za hina; a hi zona ke?

¹⁶Kata Samsoni i lo rila mahlweni kakwe, aku: Hizinene wa nzi ala; a ku nzi ranzi. U wulile a liteketelo ka va ka hina, kanilezi mina a ku nzi byelangi tlhamuselo wa lona! Samsoni aku kakwe: Hambu dadani na mamani a nzi va tlhamuselangi. Nzi nga ku tlhamusela wena ke?

¹⁷Kanilezi a sati wakwe i lo mu rilela, ntlhanu wa masiku ni mambiri ya mubuzo wabye. Hi legi ga wuntlhanu ni mambiri, i lo mu tlhamusela, hakuva i lo mu kurumeta. Zonake yena i lo ya tlhamusela liteketelo lelo ka va ka kabye.

¹⁸Na gi nga se pela a siku ga wuntlhanu ni mambiri, a vanhu va muti va lo ta lanzula, vaku: Xini xi tsombelako ku hunza wulombe ke? Xini xa ntamu ku hunza nghala ke? Yena aku kabye; Loku mu nga rimangi hi rogana ga mina, Ngha mu nga lanzulangi liteketelo la mina.

¹⁹A Moya wa Jehova wu lota ka yena. I lo relela aya le Axkeloni, a ya daya 30 wa vanhu; a phanga tinguwo tabye a ta nyika lava va nga lanzula liteketelo lakwe. I lo zangara nguvu, a tlhela aya ka raru wakwe.

²⁰Kanilezi kata Samsoni i lo nyikelwa ka munghana wakwe, loyi a nga hi mupangalati wakwe.