Read tshwa Valamuli 2 Bible Online

Valamuli 2 - tshwa bible

Valamuli 2

¹A ngelosi ya Jehova yi lo suka hi le Gilgale yi kanziha Bokima, yi ta ku ngalo: Nzi mu humesile le Gipite, nzi mu tisa ka tiko legi nzi hlambanyileko ku gi nyika ka vararu va nwina, nziku: Cima nzi nga ta tshova xivumelwano xa mina na nwina. [4]

²Nzi wa te ngalo: Mu nga mahi xivumelwano ni vaaki va tiko legi; kanilezi khungumulani maalati yabye. Kanilezi a mu ingisangi a gezu ga mina. Hi kuyini mu mahileko lezi ke?

³Hikwalaho minawu nzite: Nzi nga ta va hlongola mahlweni kanwina, kanilezi va ta kota mizwa lomu mareveni ya nwina, a vanungungulu vabye va tava ziyo ka nwina.

⁴Laha a ngelosi ya Jehova na yi wulile timhaka leti ka vanana vontlhe va ka Israeli, va loba huwa va rila.

⁵Hikwalaho a wutshamu lego va gi chula vito ga Bokima; va lo phahlela ka Jehova wutshanwini lego.

⁶Makunu laha Joxua a nga wa fambisilevanhu, a vanana va ka Israeli va lo famba, munwe ni munwani i loya tshombeni yakwe a ya fumela tiko.

⁷A vanhu va lo khozela Jehova masiku wontihe ya Joxua, ni masikwini wontihe ya masingalakati lawa ma nga hanya anzhako ka kufa ka Joxua, lawa ma nga wona a mitiro yontlhe ya hombe ya Jehova, leyi a nga yi maha ka vanana va ka Israeli.

⁸Joxua nʼwana Nuni, a nanza ga Jehova, i lofa na hi ni 110 wa malembe.

⁹I lo lahliwa lomu tshombeni yakwe le Timnati-Heresi, le zitsungeni za ka Efraime, hi tlhelo ga Nwalungu wa xitsunga xa Gaxi.

¹⁰A vanhu vontlhe va xizukulwana lexo va lo amukelwa ka vararu vabye. Ku lo lanzela xinwani xizukulwana anzhako ka lexo, leʼxi nga mu tiviko Jehova, hambu hi mitiro leyi a yi mahileko ka Israeli. [5]

¹¹A vanana va ka Israeli va lo maha kubiha mahlweni ka Jehova, va khozela maBaali.

¹²Va lo fularela Jehova, a Nungungulu wa vararu vabye, loyi a nga va humesa tikweni ga le Gipite, va lanzela vanwani vanungungulu va matiko lawa ma va ranzelekeleko, va va khizamela, va zangarisa Jehova.

¹³Va lo tsika Jehova va khozela Baali na Axtarte.

¹⁴A zanga ya Jehova yi lo vindlukela Israeli, a va nyikela canjeni ga vaphangi, lava va nga va phanga, a va nyikela mandleni ya valala vabye lava va va ranzeleko, laha kaku va tsanzeka ku yima mahlweni ka valala vabye. [6]

¹⁵Ni kwihi laha va yako, a canja ga Jehova gi wa va vukela, khwatsi hi lezi Jehova a nga wa wulile a hlambanya kabye. Hilezo va wa hi tikhuruxwini ta hombe.

¹⁶Hambulezo, Jehova i lo va vuxela Valamuli, lava va nga va hlanguta canjeni ga vaphangi vabye.

¹⁷Kanilezi a va ingisangi valamuli vabye, hakuva va lo ti nyiketela wuoswini zinwe ni vanungungulu vanwani, va va khizamela. Va lo hatlisa ku hambuka va huma ndleleni leyi vararu vabye va nga wa famba ha yona, na va ingisa milayo ya Jehova; kanilezi vona a va mahangi lezo.

¹⁸Loku Jehova a va vuxele valamuli, i wa tshama ni mulamuli munwe ni munwani a va hlanguta valaleni vabye masikwini ya mulamuli loye, hakuva Jehova i wa va zwela wusiwana zirilweni zabye, lezi va nga wa tshekulela hi vaxanisi vabye.

¹⁹Kanilezi loku a mulamuli loye afa, va wo engeta kambe va ti nyenyezisa ku hunza vararu vabye, hi ku lanzela vanungungulu vanwani ni ku va khozela va va khizamela. A va tsikangi ni xinwe xa zimaho zabye, ge hambu xikanikani xabye.

²⁰Hilezo Jehova i lo zangarela va ka Israeli, aku: Lezi vanhu lava va hambunyetako a Xivumelwano lexi nzi xi maheleko vararu vabye, va nga ingisi a gezu ga mina,

²¹minawu nzi nga ta ha hlongola kambe ni ginwe ga matiko lawa ma siyilweko hi Joxua kufeni kakwe.

²²Nzi ta ringa ha wona va ka Israeli, kasi ku wona lezaku va ta hlayisa a ndlela ya Jehova va famba ha yona, khwatsi hi vararu vabye, kutani va nga ta zi maha.

²³Zinghaho Jehova i lo siya matiko lawo, a nga hatlisi ku ma hlongola, ge hambu ku ma nyikela canjeni ga Joxua.