Read tshwa Valamuli 20 Bible Online

Valamuli 20 - tshwa bible

Valamuli 20

¹Zonake vontlhe a vanana va ka Israeli va lo huma, kusukela le Dani kala le Berexeba, le tikweni ga le Gileade, va tsombana khwatsi munhu munwe le Mizpa mahlweni ka Jehova.

²A vahombe va tiko va tixaka tontlhe ta ka Israeli, va lota le hlengeletanweni wa vanhu Va Nungungulu, na va hi 400,000 va fambako hi milenge na va hlomile matlhari.

³Makunu a vanana va ka Benjamini va lozwa lezaku a vanana va ka Israeli va kanzihile vaya le Mizpa. A va ka Israeli vaku: Hi nga hi byelani, ku mahekisile kuyini loku kubiha ke?

⁴A muLevi, a nuna wa wasati loyi a delweko, i lo hlamula aku: Nzi lo hambuka nziya le Gibea ga ka Benjamini zinwe ni mundlukulu wa mina a ku ya etlela kona.

⁵A vanhu va le Gibea va lo nzi vukela hi ntamu va ta ranzela a yindlu ni wusiku va lava ku nzi daya, va kurumeta mundlukulu wa mina kala afa.

⁶Zonake nzi lo teka a mundlukulu wa mina nzi mu phaphulela zipanze nzi zi rumela tikweni gontlhe ga tshomba ya ka Israeli, hakuva a vanhu va le Gibea va mahile kubiha ni manyala xikari ka Israeli.

⁷Makunu nwina nwentlhe va ka Israeli mu kona laha; hi nga hlolisiseni mhaka leyi mu humesa wusungukati ga nwina.

⁸Vontlhe vanhu va lo vumelana va bohana, vaku: Ku nga tlheli ni munwe wa hina aya tendeni gakwe, ge hambu ndlwini yakwe.

⁹Kanilezi lexi hi to maha ka vanhu va 16 Gibea, hi tolwa navo.

¹⁰Ka tontlhe tixaka ta ka Israeli, hi ta teka 10 wa vavanuna kada 100, ni 100 kada 1,000, ni 1,000 kada 10,000, kasi ku ya teka timbuva ta vanhu, hiya le Gibea ga ka Benjamini hi ya phota lezi va maheleko Israeli.

¹¹Zinghaho vontlhe vavanuna va ka Israeli va lo tsombana va bohana hi moya munwe, va vukela a muti lowo.

¹²A tixaka ta ka Israeli ti lo rumela vavanuna ka vontlhe va ka Benjamini; va yaku: Hi kuyini mu maha kubiha ko maha lezi xikari ka nwina ke?

¹³Hi nyikeni vanyamijiri lavo va nga lomo Gibea hi Va daya, hi hlaza kubiha xikari ka Israeli. Kanilezi a va ka Benjamini va lo ala ku ingisa vamakabye vabye va ka Israeli.

¹⁴A va ka Benjamini va lo tsombana, va huma lomu mitini yabye, vata Gibea ku talwa ni va ka Israeli.

¹⁵Ava ka Benjamini va lo hlayiwa lego siku lomo mutini, ku huma 26,000 wa vavanuna lava va zi kotako ku hloma matlhari, ahandle ka vaaki va le Gibea va 700 wa tinhenha.

¹⁶Xikari ka vanhu lava ku wa hi kona a 700 wa milangelwa ya tinhenha, a vavanuna va libhabha, lava va nga zi kota kuba hi fixga va nga hulusi.

¹⁷Ahandle ka va ka Benjamini, a va ka Israeli va wa hi 400,000 wa vavanuna va zi kotako ku hloma matlhari; vontlhe va wa hi zilwa-matlhari.

¹⁸A va ka Israeli va lo suka va kanziha Beteli ku ya kombela wusungukati ka Nungungulu, vaku: Himani xikari ka hina a ta nga rangela mahlweni a ku yalwa ni va ka Benjamini? Jehova aku: Ku ta rangela Juda.

¹⁹Zonake a va ka Israeli va lo vuka ni mixo va ya gova kusuhani ni le Gibea.

²⁰Va lo huma kasi ku yalwa ni va ka Benjamini; va lo yimisa yimpi kusuhani ni Gibea.

²¹A va ka Benjamini va lo huma hi lomu Gibea siku lego, va daya 22,000 wa vavanuna va ka Israeli.

²²Hambulezo a va ka Israeli va lo ti tiyisa-hlana, va engeta va hlomisa yinwani yimpi yi longela kuya kwalaha yi nga ranga yi lwela kona.

²³Va lo kanziha va ya rila mahlweni ka Jehova kala laha gambyeni, na va wutisa, vaku: Hi engeta hi yalwa ni nakulori Benjamini ke? Jehova aku: Kanzihani mu yalwa naye!

²⁴Zonake a va ka Israeli va lota ga wumbiri ka va ka Benjamini.

²⁵A va ka Benjamini va lo huma ga wumbiri lomu Gibea va ya tlhangana ni va ka Israeli va hihirita 18,000 wabye, a vakhomi va matlhari.

²⁶Zonake vontlhe va ka Israeli ni vanhu vontlhe va tiko, va lo kanziha vaya Beteli va ya rila, va tshama mahlweni ka Jehova, va yila siku lego kala gambyeni, va nyikela ka Jehova a miphahlo ya kuhiswa ni ya kurula.

²⁷A va ka Israeli va lo wutisa ka Jehova, (hakuva a arke ga xivumelwano xa Nungungulu gi wa hi kona seyo ka lawo masiku,

²⁸Fineasi nʼwana Eleazare wa Aroni na a yimile mahlweni ka gona masikwini lawo), vaku: Hi engeta kambe hi huma ku yalwa ni vanana va nakulori Benjamini, kutani hi tsika ke? Jehova aku: Kanzihani, hakuva manziko nzi ta va nyikela mandleni ya nwina. [49]

²⁹Zonake a va ka Israeli va lo veka vavanuna ka wontihe matlhelo ya Gibea kasi ku maha xijumani.

³⁰Va lo kanziha ga wunharu khati va ya vukela va ka Benjamini, va ya yimisa yimpi mahlweni ka Gibea, kota zinwani zikhati.

³¹A va ka Benjamini va lo huma a ku ya tlhangana ni yimpi, kanilezi va lo kokelwa ni muti. Va lo sangula ku daya vo kari va ka Israeli khwatsi hi zinwani zikhati, lomu magonzweni lawa a ginwe ga kona gi yako Beteli, a ginwani gi yako Gibea, lomu xikari ka nkova. Va lo daya 30 wa vona.

³²A va ka Benjamini vaku: Ha va hlula, khwatsi hi makhati laʼyo ranga! Kasilezo a va ka Israeli va waku: A hi tsutsumeni hi va kokela kule ni muti, va humela le magonzweni.

³³Zonake vontlhe va ka Israeli va lo suka lomo va nga wa hi kona, va yimisa yimpi Baal-Tamari; a va ka Israeli lava va nga wa xiyelela va lo hatlisa va huma hi lomu va nga wa hi kona, le livaleni la Gibea.

³⁴Zonake a 10,000 wa milangelwa ya tinhenha ta vavanuna va ka Israeli ti lo vumbuluka mahlweni ka Gibea. Yi wa hi yimpi ya hombe; kanilezi va wa nga gi tivi a khombo legi gi tova wela.

³⁵Jehova i lo lamata Benjamini mahlweni ka va ka Israeli; a va ka Israeli va lo hihirita 25,100 wa vavanuna va zilwa-matlhari za ka Benjamini lego siku,

³⁶zinghaho a va ka Benjamini va lo zi wona lezaku va khozisilwe. Hakuva a va ka Israeli va wa tsutsumile mahlweni ka va ka Benjamini, kasilezo va wa tsumba lava ya nga wa maha xijumani le Gibea.

³⁷Lava va nga wa juma va lo hatlisa va tsutsumela Gibea, va ya hlasela vontlhe vanhu va muti hi wutlha ga supado.

³⁸A va ka Israeli va wa mahile xikombiso ni lava va nga wa juma, vaku: Tuvikisani a refu ga hombe ga musi le mutini.

³⁹Hikwalaho a vavanuna va ka Israeli va lo hlehla, kasi a va ka Benjamini va sangula kulwa ni va ka Israeli; va lo daya xipimo xa 30 wabye, na vaku: Va panzanyeka khwatsi hi yimpi yo sangula!

⁴⁰Laha a refu ga musi gi nga sangula ku tuvika le mutini, na gi hi mhinga ya hombe, a va ka Benjamini va lo cuwuka lenzhako va wona a musi wa muti wontihe na wu tlakukela tilweni.

⁴¹Hi kona a vavanuna va ka Israeli va nga va hunzulukela; a va ka Benjamini va lo tsutsuma laha va nga wona lezaku va le mhangweni.

⁴²Hikwalaho va lo panzanyeka hi ndlela yi yako xiwuleni, va chava Israeli; kanilezi a yimpi yi lo tsimbeketa yi va lanza, ni vanhu va miti va lo daya lava va nga hi lomu xikari.

⁴³Va lo ranzela va ka Benjamini va va hlasela ni ku va kanzihelela wutshanwini legi va nga xuvile ku humula ka gona, kala ku chikela Gibea le Mutsuwuka-gambo.

⁴⁴A va ka Benjamini lava va nga dawa va wa hi 18,000 wa vavanuna; vontlhe va wa hi tinhenha.

⁴⁵A vanwani va lo renzeleka va tsutsumela xiwuleni, kala va ya chikela le ribyeni ga Rimoni. Lomu magonzweni ku lo dawa 5,000 wabye. Va lo va hlongolisa kala le Gidomi, va daya kambe 2,000 wa vavanuna.

⁴⁶Vontlhe va ka Benjamini va nga dawa lego siku va wa hi 25,000 wa vavanuna va tinhenha.

⁴⁷Kanilezi 600 wa vavanuna va lo tsutsumela xiwuleni le ribyeni ga Rimoni, va ya tshama leyo mune wa tihweti.

⁴⁸Kanilezi a va ka Israeli va lo tlhela vaya ka va ka Benjamini lava va nga wa sele, va ya va hlasela hi wutlha ga supado, a vanhu vontlhe, ni zifuyo, ni zontlhe zi nga kumeka lomo. Tlhatakumbiri, va lo hisa yontlhe miti leyi yi nga wa hi lomo.