Read tshwa Valamuli 21 Bible Online

Valamuli 21 - tshwa bible

Valamuli 21

¹Makunu a vavanuna va ka Israeli va wa hlambanyile le Mizpa, vaku: Ku nga ta kuva kona ni munwe wa hina a ta nga nyikela a nhwana wakwe a tekwa hi va ka Benjamini.

²A vanhu va loya Beteli va tshama mahlweni ka Nungungulu kala laha gambyeni, va rila, va tsikwila hi hlomulo wa hombe,

³vaku: Jehova Nungungulu wa ka Israeli, zi mahelwe yini lezi lomu ka Israeli, a ku vumaleka linwani lixaka lomu ka Israeli?

⁴Hi siku gi gamelako a vanhu va lo vuka ni mixo va aka a alati laho, va maha miphahlo ya kuhiswa ni ya kurula.

⁵Zonake a va ka Israeli vaku: Himani xikari ka tixaka tontlhe ta ka Israeli a nga kanzihangiko ata hlengeletanweni wa Jehova ke? Va wula lezo hakuva va wa hlambanyile hi xifungo xa hombe xungetano ni loyi a ta nga kala a ngati ka Jehova le Mizpa, vaku: Hizinene i ta dawa.

⁶A va ka Israeli va lo zwela wusiwana vamakabye vabye va ka Benjamini, vaku: Ku kona lixaka linwe li tsemilweko lomu ka Israeli nyamutlha.

⁷Hi ta mahisa kuyini hi lava va seleko kasi va kuma vasati, lezi hi hlambanyileko ka Jehova, hiku: Cima hi nga ta va nyika vanhwana va hina va tekana navo?

⁸Va te ngalo: Hi vahi va tixaka ta ka Israeli va nga kanzihangiko vata ka Jehova laha Mizpa ke? A va le Jabexi-Gileade a nga kona ni munwe wabye a nga wa kanzihile ata hlengeletanweni;

⁹hakuva laha a vanhu va nga hlayiwa a ku kumekangi ni munwe wa vaaki va le Jabexi-Gileade.

¹⁰A hlengeletano wu lo rumela 12,000 wa tinhenha, va ti leletela, vaku: Fambani mu ya hlasela a vanhu va le Jabexi-Gileade hi wutlha ga supado, ni vavasati ni vanana.

¹¹Mu ta mahisa lezi: Mu ta daya vontlhe vavanuna ni vontlhe vavasati lava va tivileko wanuna. [50]

¹²Xikari ka vaaki va le Jabexi-Gileade va lo ya kuma 400 wa vanhwana va nga tivangiko wanuna, va va neha le wugovelweni le Xilo, a tikweni ga Kanani.

¹³Zonake a hlengeletano wu lo rumela vanhu ku ya wulawula ni va ka Benjamini lava va nga wa hi le ribyeni ga Rimoni, va va tivisa lezaku a kuve kona kurula.

¹⁴A siku lego a va ka Benjamini va lo tlhela, va ta nyikiwa a vavasati lava va nga poniswa le Jabexi-Gileade; kanilezi a va va enelangi.

¹⁵A vanhu va lo xanisekela va ka Benjamini, hakuva Jehova i wa vangile wusweti lomu tixakeni ta ka Israeli.

¹⁶Zonake a masingalakati ya mutlhangano ma te ngalo: Lezi a vavasati va ka Benjamini va nga lobyiswa, hi ta mahisa kuyini hi lava va nga sala, kasi vonawu va fela ku kuma vasati?

¹⁷Va te ngalo: A va ka Benjamini lava va ponileko, va fanele kuva ni tshomba, kasi a lixaka lelo li nga fuvi xikari ka Israeli.

¹⁸Hambulezo hi nga ta va nyika vanhwana va hina va tekana navo, hakuva a va ka Israeli va hlambanyile, vaku: A khombo a give hehla ka loyi a ta nga nyikela a nhwana wakwe ka va ka Benjamini!

¹⁹Va te ngalo: Lembe ni lembe ku na ni mubuzo wa Jehova le Xilo, hi tlhelo ga Nwalungu wa Beteli, hi Mutsuwuka-gambo wa gonzo legi gi sukako hi le Beteli gi kanziha Xekemi, ni tlhelo ga Dzonga ga Lebona.

²⁰Va lo leletela a va ka Benjamini, vaku: Fambani mu ya xiyelela lomu masinwini ya zivina.

²¹Loku mu wona a vanhwana va le Xilo na va huma ku ta kina, mu ta humawu lomu zivineni, munwe ni munwani wa nwina a ti khomela sati xikari ka vanhwana va le Xilo, zonake mu ta tlhelela tikweni ga nwina le Benjamini.

²²Loku a vararu kutani vamakabye vabye vata ka hina ku ta kecara, hi taku kabye: Mahani tipswalo mu hi nyika vona, hakuva xikhatini xa yimpi a hi na nga khoma vavasati hi nyika wanuna munwe ni munwani. Na nwinawu a mu zi kotangi ku va nyika a vanhwana va nwina, hakuva ngha mu wa tava ni nanzu.

²³Zonake a va ka Benjamini va lo maha lezo, va ti tekela vasati hi tsengo wabye, xikari ka lava va nga wa kina, va tlhelela tshombeni yabye va ta aka miti va tshama ka yona.

²⁴Xwalexo xikhati vonawu va ka Israeli va lo tlhelela makaya, loyi ni loyi aya lixakeni la ka kabye, lomu titshombeni tabye.

²⁵Masikwini lawo Israeli i wa nga hi na hosi; munhu ni munhu i wo ti mahela lezi zi nga wa lulamile kuwoneni kakwe.