Read tshwa Valamuli 3 Bible Online

Valamuli 3 - tshwa bible

Valamuli 3

¹Makunu lawa hi matiko lawa Jehova a nga ma siyile kasi ku ringa ha wona va ka Israeli, lava va nga wonangiko tontlhe tiyimpi ta Kanani,

²kasi a zizukulwana za ka Israeli zi ta tiva ku gonza tiyimpi, nguvunguvu lava va nga kala va nga ti tivi hi mahlweni.

³Ku lo sala ntlhanu wa tihosi ta maFilistia, ni vaKanani vontlhe, ni vaSidoni, ni vaHivi lava va akileko xitsungeni xa Lebanoni, kusukela xitsungeni xa Baal-hermoni kala kuya le Hamate.

⁴Ma wa hi ya ku ringa ha wona va ka Israeli, kasi ku tiva lezaku va ta ingisa milayo ya Jehova, leyi a nga leletela vararu vabye hi nomu wa Mosi.

⁵Hikwalaho a vaIsraeli va lo aka xikari ka vaKanani, ni vaHiti, ni vaAmori, ni vaPerezi, ni vaHivi, ni vajebusi.

⁶Va lo tekana ni vanhanyana vabye, vonawu va nyikela vanhanyana vabye ka vana vabye, va khozela vanungungulu vabye. [7]

⁷A va ka Israeli va lo maha kubiha mahlweni ka Jehova, va rivala Jehova Nungungulu wabye, va khozela maBaali na Axtarte.

⁸Makunu a zanga ya Jehova yi vindlukela va ka Israeli, a va nyikela canjeni ga Kuxani-Rixataime, a hosi ya le Mesopotamia. A vanana va ka Israeli va lo fumelwa 8 wa malembe hi Kuxani-Rixataime.

⁹Kanilezi laha a vanana va ka Israeli va nga rila ka Jehova, yena i lo va vuxela muhlanguti loyi a nga va hlanguta, a nga Otnieli nʼwana Kenazi, a nzisana ya Kalebi.

¹⁰A Moya wa Jehova wu lota hehla kakwe, a maha mulamuli wa Israeli. I lo hlomisa yimpi, Jehova a nyikela Kuxani-Rixataime a hosi ya Mesopotamia canjeni gakwe. A canja gakwe gi lo khozisa Kuxani-Rixataime.

¹¹A tiko gi lo humula 40 wa malembe. Otnieli nʼwana Kenazi i lofa.

¹²A vanana va ka Israeli va lo engeta va maha kubiha mahlweni ka Jehova. Jehova i lo nyika ntamu ka hosi Egloni a hosi ya Moabi kasi ku vukela va ka Israeli, hilezi va wa mahile kubiha mahlweni ka Jehova.

¹³Egloni i lo tsombanyisa a vanana va ka Amoni ni va ka Amaleki; va lo ya khozisa va ka Israeli, va teka a muti wa micinzu.

¹⁴A vanana va ka Israeli va lo fumelwa 18 wa malembe hi Egloni a hosi ya vaMoabi.

¹⁵Kanilezi laha a vanana va ka Israeli va nga rila ka Jehova, yena i lo va vuxela muhlanguti, a nga Ehudi nʼwana Gera, a muBenjamini, a wanuna wa libhabha. A vanana va ka Israeli va lo rumela nzuvo ha yena ka Egloni a hosi ya vaMoabi.

¹⁶Ehudi i lo ti mahela mukwana wa wutlha matlhelo mambiri, wu nga hi khono munwe kuleha, a wu bohelela laha nyongeni ya tlhelo ga xinene, hi lahasi ka nguwo yakwe.

¹⁷I lo ya nyikela a nzuvo ka Egloni a hosi ya vaMoabi. Egloni i wa hi munhu wo kuluka nguvu.

¹⁸Laha Ehudi a nga wa mbhetile ku hendleleta a nzuvo, i lo tlhelisa a vanhu lava va nga wa rwele a nzuvo ya kona.

¹⁹Kanilezi yena i lo tlhela hi le wutshanwini ga zifananiso le Gilgale, a yaku: Hosi, nzi na ni mahungu ya fihlakalo a ku ku byela, wena hosi. A hosi yiku: Wa nga miyela! Vontlhe lava va nga wa hi kusuhani kakwe, va lo huma lahandle.

²⁰Ehudi i lo enghena lomu a nga wa tshamile yece, lomu ndlwini yo pepemela aku kakwe: Nzi ku nehela mahungu ya Nungungulu. Egloni i lo suka xitshanwini xakwe a yima.

²¹Ehudi i lo nawuluta a canja gakwe ga xibhabha a teka mukwana laha nyongeni yakwe ya tlhelo ga xinene a mu tlhava rumbu,

²²a xihinza xi nyupela zinwe ni mukwana wa kona, a mafura ma fenengeta a xiketse, hakuva i wa nga hlomulangi a mukwana rumbyini gakwe, kanilezi wu lo phondla se nzhako.

²³Zonake Ehudi i lo huma laha nyangweni, a valela hosi le xitezi, a khotsa tivati.

²⁴Laha a nga wa fambile, a malanza yakwe ma lota ma ta kuma a tivati na ti khotsilwe, vaku: Kutani wa ho hambuka lomu kwarutwini yakwe ya le hehla. [8]

²⁵Va lo rinzela kala va hlamala, hakuva i wa nga vululi tivati ta yindlu. Hikwalaho va lo teka pfhungulo va vulula tivati. Languta, a hosi yabye yi wa no lakahla lahasi, na yi file.

²⁶Ehudi i lo nyemuka na va ha rinzele, a tsemakanya wutshamu ga zifananiso, a tsutsumela le Seira.

²⁷Laha a nga wa chikele, i loba a mpunzu le xitsungeni xa ka Efraime, a vanana va ka Israeli va lo relela naye hi le xitsungeni, na a rangile mahlweni kabye.

²⁸Aku kabye: Nzi lanzeleni, hakuva Jehova i nyikele a valala va nwina va ka Moabi mandleni ya nwina. Va lo relela va mu lanzela vaya mapelweni ya Jordani ngomama ni vaMoabi, va nga vumeli munhu ku tlhatuka.

²⁹Ka xwalexo xikhati va lo hihirita vaMoabi va daya xipimo xa 10,000 wabye, a vavanuna va wulaka, a tinhenha ta kulwa; a ku ponangi ni munwe.

³⁰Zinghaho va ka Moabi va lo khoziswa hi va ka Israeli a siku lego. A tiko gi lo humula 80 wa malembe.

³¹Anzhako ka Ehudi ku lo lanzela Xamgare nʼwana Anati, loyi a nga hihirita 600 wa vaFilistia hi mbhanya wa tikavi. Yenawu i lo hlanguta Israeli.