Read tshwa Valamuli 5 Bible Online

Valamuli 5 - tshwa bible

Valamuli 5

¹Gwalego siku Debora na Barake nʼwana Ahinoame va lo yimbelela, vaku:

²Kota lezi a varangeli va rangeleko Israeli, Vonawu vanhu va nyikela wutsumbu gabye hi kumbheleleko, Khesani Jehova!

³Zwanani, nwina tihosi! dembani ndleve, nwina tihosana! Yena mina, nzi ta yimbelela ka Jehova; Nzi ta yimbelela nzi dzunza Jehova, Nungungulu wa ka Israeli!

⁴Jehova, laha u nga huma hi le Seire, A kufeni ka wena hi le tikweni ga Edome, A misava yi lo tsekatseka, a matilo ma dona, Ina, a marefu ma lo chulula mati. [11]

⁵A zitsunga zi lo khulunga mahlweni ka Jehova, Na yena Sinai, le mahlweni ka Jehova Nungungulu wa ka Israeli.

⁶Xikhatini xa Xamgare nʼwana Anate, Ni xikhatini xa Jaeli, a tindlela ti wa fuvile; A vafambi va wa famba hi tindlela to gombonyeka.

⁷Ku lo vumaleka ni varangeli xikari ka Israeli, Kala nzi suka mina Debora, Nzi yima kota nyine wa muni wa ka Israeli.

⁸Va wa ti hlawutela vanungungulu vaswa, Zonake ku lwiwa lomu tinyangweni. Ku wa na nga kumeka a xitlhangu kutani tlhari Xikari ka 40,000 wa va ka Israeli ke? [12]

⁹A mbilu ya mina yi ka vafumeli va ka Israeli, Ni ka vanhu lava va ti nyikeleko hi kuranza kabye. Khesani Jehova!

¹⁰Nwina lava mu khileleko timbongola to basa, Nwina lava mu tshamileko masangweni, Na nwina lava mu fambako hi ndlela, yimbelelani!

¹¹Le kule ni guwa ga vaweleli va mawura, le tihlobyeni ta mati, Va dumisa mitiro yo lulama ya Jehova, A mitiro yakwe yo lulama xikari ka va ka Israeli. Zonake a vanhu va Jehova va lo chikela tinyangweni.

¹²Vuka, vuka, Debora! Vuka, vuka u yimbelela lisimu! Suka, Barake, u fambisa lava u va khomileko, wena nʼwana Abinoame!

¹³Xwalexo xikhati a misalela ya ti ko yi lo hlasela tinhenha, Jehova i lo nzi maha nzi rangela tinghwazi.

¹⁴Ku lota vanhu hi le Efraime, a zisumbulwa za le Amaleki; Benjamini i lo lanzela na hi xikari ka vanhu va wena. Le Makira ku lo huma varangeli; Ni; Zabuloni ku lo huma vaweleli va nhonga ya wuhosi.

¹⁵A tihosana ta Isakari ti wa hi zinwe na Debora, Barake i lo fanana na Isakari; va lo lanza le nzhelelweni, Le xicongwaneni xa ka Rubeni, Ku mahilwe makungo ya hombe ya mbilu.

¹⁶U wa tshamela yini le marangeni ke? U wo ingisela miloti ya varisi va mitlhambi ke? Le congwaneni wa ka Rubeni Ku mahilwe makungo ya hombe ya mbilu.

¹⁷Gileade i lo tshama le tlhatuko wa Jordani. Dani i wa tshamela yini le matarwini ke? Axeri i wa ti tshamele le fungwini wa bimbi, A ti tshamela kusuhani ni zicongwana zakwe.

¹⁸Kanilezi Zabuloni i tiko gi nga chaviko kufa; Zinghaho na Naftali, le migangeni ya xiwula.

¹⁹A tihosi ti lo chikela tilwa; Zonake kulwa a tihosi ta le Kanani, Le Taanake kusuhani ni le matini ya Megido; Kanilezi a va kumangi a muphango ni siliva.

²⁰Ku wa hi kona kulwa hi le tilweni, A tinyeleti lomu tindleleni ta to na ti lolwa na Sisera. [13]

²¹A congo wa Kixoni wu lo va kukuleta; A congo lowu wa kale, a congo wa Kixoni. O muhefemulo wanga, u kanzihele mintamu.

²²Zonake a makhanzo ya mahaxi ina lo pfhuruma-pfhuruma Hi kudlaladlalama ka tinhenha tabye.

²³Rukatelani Meroza, ku lo wula a ngelosi ya Jehova; Rukatelani nguvu a vaaki va kona; Hakuva a va tangi ku ta vunetela Jehova, A ku ta vunetela Jehova a kulwa ni tinhenha.

²⁴Jaeli i ta dzunziwa xikari ka vavasati, A sati wa Hehera a muKeni. A dzunziwe xikari ka vavasati va akileko matendeni.

²⁵Sisera i lo kombela mati, yena a mu nyika masi; I lo mu nehela mawomba hi ngelo wa wukosi.

²⁶I lo teka xikhongwani hi canja gakwe, Hi canja gakwe ga xinene a welela a nkono wa vafuli. I lo balela Sisera hi nkono, a hetela a phondlisa hloko yakwe; Ina, i lo mu phondlisa lomu zitlongweni zakwe.

²⁷Sisera i lo korama mikonzweni yakwe, awa, aku nakanaka. I lo korama mikonzweni yakwe, awa. Laha a nga koramela kona, i lo wela kwalaho afa.

²⁸A nyine wa Sisera i lo hlomela hi njhanela a rila; I lo cuwuka hi laha njhaneleni a rila: Hi kuyini a kareta yakwe yi hlwelako ku wuya? Hi kuyini a tikareta takwe ti nonokako?

²⁹A vavasati vakwe vo tlhariha va lo mu hlamula, Ina, i lo ti hlamula ha yece, aku:

³⁰Ina hambu vona a va lo kuma muphango va avelana? A wanuna munwe ni munwani a nga nyikwangi a nhwana kutani vanhwana vambiri ke? Sisera a ngava a nyikilwe tinguwo ta mivala yi hambeneko, A muphango wa tinguwo ta mavalavala ti komelweko, A tinguwo ta mivala yi lukelweko matlhelo mambiri, to bombisa a nhamu ya muhluli.

³¹Zinghaho Jehova, ngha valala va wena vontlhe va lobyiswa. Kanilezi ngha lava va ku ranzako va fanana ni gambo loku gi tsuwuka hi ntamu wa gona. [14] Zonake a tiko gi lo humula 40 wa malembe.