Read tshwa Valamuli 6 Bible Online

Valamuli 6 - tshwa bible

Valamuli 6

¹A vanana va ka Israeli va lo engeta kambe va maha kubiha mahlweni ka Jehova. Yena i lo va nyikela mandleni ya vaMidiani ntlhanu wa malembe ni mambiri,

²A vaMidiani va lo xanisa nguvu va ka Israeli. A vanana va ka Israeli va lo tsutsumela mikovotlweni yi nga le zitsungeni ni lomu timhakweni, ni lomu makhokholeni, hi ku chava vaMidiani.

³Ku waku loku va byalile, a vaMidiani ni vaAmaleki ni va le Mutsuwuka-gambo, va kanziha va ta va hlasela.

⁴Va wa chikela va gova kusuhani navo, va lovisa wontihe mavele ya masimu kala le Gaza, va nga siyi ne ni xakuga ka Israeli, ge hambu yivu, kutani homu, kutani mbongola.

⁵Hakuva vona va wota ni mitlhambi yabye ni matenda yabye. Va wata khwatsi i humbi yi nga hiko na kuhlayiwa, va lota ni makameli yabye va ta xakela tiko.

⁶Hilezo Israeli i lo mahiwa xisiwana xa hombe hi vaMidiani. A vanana va ka Israeli va lo rila ka Jehova.

⁷Laha a vanana va ka Israeli Jehova va nga wa rilile hi kota ya vaMidiani,

⁸Jehova i lo rumela muprofeti ka vanana va ka Israeli, a yaku kabye: Jehova Nungungulu wa ka Israeli i ngalo: Nzi mu humesile le Gipite, nzi mu humesa le ndlwini ya wukhumbi.

⁹Nzi mu tlhatlhisa canjeni ga vaGipite, ni canjeni ga vontlhe vaxanisi va nwina, nzi va hlongola mahlweni ka nwina, nzi wuya nzi mu nyika a tiko gabye.

¹⁰Nzi wa te ngalo ka nwina: Hi mina Jehova Nungungulu wa nwina; mu nga dzuki mu chava vanungungulu va vaAmori, lava mu akileko lomu tikweni gabye. Kanilezi a mu ingisangi a gezu ga mina. [15]

¹¹Zonake a ngelosi ya Jehova yi lota yi ta tshama lahasi ka nkuhlu lowu wu nga le Ofra, ka Joaxi a muAbiezeri. A nʼwana wakwe Gideoni i wa kari a phopha mavele lomu xigowolweni, kasi ku fihlela vaMidiani.

¹²A ngelosi ya Jehova yi lo woneka ka yena, yiku: Jehova i na wena, wena wanuna wa nhenha.

¹³Gideoni aku ka yona: O, hosi yanga, loku Jehova a wa hi zinwe na hina, hi kuyini zontlhe lezi zi hi humeleleko? Zi kwihi zontlhe zihlamaliso zakwe lezi a vararu va hina va nga hi hlawutela zona, vaku: A hi yena Jehova a hi humesileko Gipite ke? Kanilezi makunu Jehova i hi hoxile, a hi nyikela mandleni ya vaMidiani.

¹⁴Kanilezi Jehova i lo hunzuluka a mu cuwuka, aku: Famba hi ntamu lowu wa wena, u ya hlanguta vaIsraeli mandleni ya vaMidiani. Kasi a nzi ku rumangi ke? [16]

¹⁵Gideoni aku kakwe: Hosi yanga, nzi ta va hlangutisa kuyini vaIsraeli ke? Cuwuka ngango wa hina, hi wona wa lahasi ka lixaka la ka Manasa; mina nzi xisiva-marumbu xa kona ndlwini ya dadani.

¹⁶Jehova aku kakwe: Hizinene nzi tava na wena. U ta hlasela vaMidiani khwatsi i munhu munwe. [17]

¹⁷Gideoni aku kakwe: Loku mina hakunene nzi kumile thomo mahlweni ka wena, hi nga nzi wonisa xikombiso xi kombisako lezaku hi wena u wulawulako na mina.

¹⁸U nga suki laha kala nzi wuya nzi ku nehela xinyikiwo xa mina, nzi ta xi veka mahlweni ka wena. Aku kakwe: Nzi ta rinzela kala u wuya.

¹⁹Gideoni i famba a ya longisa a ximhutana, a maha zibaba zi nga comelwangiko hi efa yinwe ya mapa: a nyama i lo yi chela lomu xirunzwini, a chela muro lomu ka mbita. I lota nazo kakwe lahasi ka nkuhlu a ta mu nyika.

²⁰A ngelosi ya Nungungulu yiku kakwe: Teka a nyama ni zibaba lezi zi nga comelwangiko u zi veka laha ka ribye legi, u chela muro hehla ka zona. Yena i lo maha lezo.

²¹Zonake a ngelosi ya Jehova yi lo zi xungameta hi magumo ka nhonga leyi yi nga wa welele canjeni ga yona, yi khumba a nyama ni zibaba zi nga comelwangiko. Laho ku lo vura nzilo na wu huma hi lomu ribyeni, wu hisa a nyama ni zibaba zi nga comelwangiko; zonake a ngelosi ya Jehova yi lo nyamalala. [18]

²²Gideoni i lo wona lezaku i ngelosi ya Jehova, aku: Hosi, Nungungulu yanga, nzi le khombyeni hakuva nzi wonile a ngelosi ya Jehova nghohe ni nghohe.

²³Jehova aku kakwe: A kurula a kuve na wena! U nga chavi, cima u nga tafa!

²⁴Zonake Gideoni i lo aka alati ga Jehova laho, a gi chula vito ga Jehova-xalome (Jehova wa kurula). Ni lezi ga hi kona le Ofra wa vaAbiezeri.

²⁵Gwalego wusiku Jehova i te ngalo kakwe: Teka a honwana ya raru wa wena, ni yinwani honwana ya 7 wa malembe wukale, u khungumula a alati ga Baali legi a raru wa wena a nga nago, u tsemelela ni xifananiso xa Axtarte lexi xi nga lomo. [19]

²⁶U aka a alati ga Jehova Nungungulu wa wena hehla ka ribye lego, u gi aka khwatsi. U ta teka a honwana ya wumbiri u maha muphahlo wo hiswa hi tihunyi ta xifananiso lexi u nga xi tsemelela.

²⁷Zonake Gideoni i lo teka a 10 ga vavanuna va malanza yakwe, a maha khwatsi hi lezi Jehova a mu byelileko. Hi kota ya ku chava va laha ngangweni wa raru wakwe ni vanhu va muti, a nga zi mahangi ni hlikanhi; i lo zi maha ni wusiku.

²⁸Laha a vanhu va muti va nga vuka ni mixo, va lo wona a alati ga Baali na gi khungumulwe, a xifananiso xa kona na xi tsemelelwe, a honwana ya wumbiri na yi mahilwe muphahlelo laha alatini legi gi nga wa akilwe.

²⁹Va lo wutisana, vaku: Himani a mahileko lezi? Laha va nga wa wutisisile hi kuxiyisisa, va te ngalo: Hi Gideoni nʼwana Joaxi a nga maha lezi.

³⁰Zonake a vanhu va muti vaku ka Joaxi: Humesa a nʼwana wa wena kasi wafa, hakuva i khungumule a alati ga Baali, a tsemelela a xifananiso xa Axtarte.

³¹Joaxi i lo hlamula vontlhe lava va nga wa mu vukela, aku: Hi nwina mu yimelako Baali ke? Mu lava ku mu ponisa ke? Loyi a mu yimelako a dawe na ga ha hi mixo. Loku a hi mingungulu, a ti lwele ha yece, hakuva a alati gakwe gi khungumulweko.

³²Hikwalaho a siku lego Gideoni i lo chuliwa vito ga Jerubaali, vaku: Ngha Baali a ti lwela hi lezi va khungumuleko a alati gakwe.

³³Zonake vontlhe vaMidiani ni vaAmeleki ni vanana va le Mutsuwuka-gambo va lo tsombana khatiginwe va tlhatuka Jordani, va ta gova le minzhelelweni ya Jezreeli.

³⁴A Moya wa Jehova wu lota ka Gideoni. I loba a mpunzu, a vanhu va Abiezeri va tsombana khatiginwe kakwe. [20]

³⁵I lo rumela a mitsumi ka vontlhe va ka Manasa, vonawu va lo tsombana khatiginwe naye. I lo rumela yinwani mitsumi ka va ka Axeri, ni ka va ka Zabuloni, ni ka va ka Naftali; vonawu va lo kanziha ku ya tlhangana zinwe naye.

³⁶Gideoni aku ka Nungungulu: Loku hakunene u ta ponisa Israeli hi canja ga mina, kota kuwula ka wena,

³⁷nzi ta veka a dzowo ga yivu gi nga ni woya laha lilonzeni la wuhulelo. Loku a nzhokati yiwa laha ka dzowo koce, kanilezi a lilonze lontlhe li sala li womile, nzi ta zi tiva lezaku u ta ponisa Israeli hi canja ga mina, khwatsi hi lezi u wulileko.

³⁸Zi lova tano, hakuva laha na vukile mixweni i lo ya kama dzowo ku huma mati ya nzhokati, ma tata guwana.

³⁹Gideoni aku ka Nungungulu: Ngha zanga ya wena yi nga nzi vindlukeli, nza ha ta wulawula khatiginwe basi; nzi lava xinwani xikombiso hi gona dzowo legi. Ngha gona goce gi woma, kanilezi a nzhokati yiwa hehla ka lilonze lontlhe. [21]

⁴⁰Nungungulu i lo maha lezo wusiku gwalego. A dzowo gona goce gi wa womile, kanilezi a nzhokati na yi wile hehla ka lontlhe lilonze.