Read tshwa 2 Johani 1 Bible Online

2 Johani 1 - tshwa bible

2 Johani 1

¹A singalakati ga rungula a muzinza loyi a hlawulilweko hi vana vakwe, lava nzi va ranzako zineneni; na ku nga hi mina nzoce, kanilezi ni vontlhe lava va tivako zinene. [1]

²Ha va ranza hi kota ya zinene lezi zi tshamileko ka hina, lezi zi ta nga tshama ka hina kala kupinzuka.

³A tipswalo ni wuxinji ni kurula, lezi zi tako hi le ka Nungungulu Dadani, ni ka Jesu Kristu a Nʼwana wa Dadani, zi ta tshama na hina zineneni ni liranzweni.

⁴Mina nza nengela nguvu hilezi nzi kumileko a vanwani va vana va wena na va kari va famba hi zinene, kota lezi hi nga layiwa hi Dadani. 3 Joh. 3

⁵Makunu nza ku khongotela, wena muzinza, na ku nga hi ku khwatsi nzi ku tsalela a nayo muswa, kanilezi hi walowu hi nga hi nawo hi le kusanguleni, waku ngha hi ranzana. [2]

⁶A liranzo hi leli, lezaku hi famba hi milayo yakwe. A nayo hi lowu, lezaku mu famba liranzweni, kota lezi mu nga zizwa hi kusanguleni. [3]

⁷Hakuva vakhohlisi vanyingi va humele vaya tikweni, lava va nga vumeliko lezaku Jesu Kristu i tile nyameni. Hi yena mukanganyisi tlhelo Mukaneti wa Kristu; [4]

⁸Ti woneleni, lezaku mu nga lahlekelwi hi lezi mu zi tirileko, kanilezi mu amukela a nchachazelo wu teleko. [5]

⁹Kani hi wihi loyi a hambukako, a nga namareli gonzweni ya Kristu, a nga na Nungungulu; kani loyi a namarelako gonzweni i na ni Dadani ni Nʼwana kambe. [6]

¹⁰Loku ata munwani ka nwina, na a nga nehi a gonzo leyi, mu nga mu amukeli tindlwini ta nwina, hambu ku mu losa; [7]

¹¹hakuva loyi a mu losako wa hlengela naye mitirweni yakwe ya kubiha.

¹²Nza ha hi ni timhaka to tala, kanilezi a nzi ranzi a ku mu tsalela ha tona hi papilo ni tinta; hilezi nza tsumba lezaku nzi tata, ka nwina, hi ta wulawula hi milomu, kasi a kutsaka ka nwina ka mbhelela.

¹³A vana va makwenu a hlawulilweko va ku rungula.