Read tshwa 3 Johani 1 Bible Online

3 Johani 1 - tshwa bible

3 Johani 1

¹A singalakati ga rungula Gaiusi a ranzekako, loyi nzi mu ranzako zineneni. [1]

²Xiranzwa, nza khongela lezaku u fela ku hanya khwatsi u vuvuma zilweni zontlhe, kota lezi wu vuvumako a muhefemulo wa wena.

³Hakuva nzi lo tsaka nguvu, laha ku ngata vamakabye va ta kustumunya hi zinene lezi zi nga ka wena, kota lezi u fambako zineneni. [2]

⁴A nzi na kutsaka ka hombe ku hunza loku nzi nga nako, laha nzi zwako lezaku vana va mina va famba zineneni. [3]

⁵Xiranzwa, u kholekile ka zontlhe lezi u mahelako vamakabye lava va nga vaenzi.

⁶Vona va mahile wukustumunyu hi liranzo la wena mahlweni ka bandla. U ta maha khwatsi loku u va hlomisa lwenzweni labye kota lezi ku faneleko ntiro wa Nungungulu.

⁷Hakuva va lo famba hi kota ya Vito, na va nga amukeli nchumu xa vamatiko. [4]

⁸Hikwalaho hi yimelwe hi ku amukela va kunghaho, kasi ha fela ku tirela navo a zinene.

⁹Mina nzi lo tsalela bandla, kanilezi Diotrefesi, loyi a ranzako a kuva wahombe xikari kabye, a nga hi amukeli.

¹⁰Hikwalaho loku nzita, nzi ta mu alakanyisa hi mitiro leyi a yi mahako hi ku hi hleva hi timhaka to biha. A nga eneliswi hi ku maha lezo, yena wutsumbu a nga amukeli vamakabye, ni lava va ranzako ku maha lezo wa va tsimbetela, a va hlongola bandleni.

¹¹Xiranzwa, u nga pimanyisi lezi za kubiha, kanilezi pimanyisa lezi zo saseka. Loyi a mahako kusaseka ngwa Nungungulu; kanilezi loyi a mahako kubiha a nga mu wonangi Nungungulu. [5]

¹²Demetriusi i mahelwa wukustumunyu go saseka hi vanhu vontlhe, na zona zinene za mu kustumunyela. Na hinawu ha mu mahela wukustumunyu; wena wa zi tiva lezaku a wukustumunyu ga hina gi nene. [6]

¹³Nzi wa hi ni timhaka tinyingi, kanilezi a nzi zi ranzi ku ku tsalela ha tona hi tinta ni pena. [7]

¹⁴Kanilezi nza tsumba lezaku nzi ta ku wona lokuloku, zonake hi ta wulawula hi milomu. A kurula a kuve na wena. A maxaka ma ku rungula. Rungula maxaka hi mavito yabye.