Read tshwa Kuvululelwa 11 Bible Online

Kuvululelwa 11 - tshwa bible

Kuvululelwa 11

¹Zonake nzi lo nyikiwa a lihlanga lo fana ni nhonga, nzi byeliwa ku ngalo: Suka, u pima a tempeli ya Nungungulu, ni alati, zinwe ni lava va khozelako kona. [121]

²Kanilezi a hubye leyi yi nga lahandle ka tempeli, yi tsike, u nga yi pimi; hakuva yi nyikelwe a vamatiko; va ta kanzihela a muti wo basa a mune wa makume ya tihweti ni timbiri. [122]

³Zonake nzi ta nyika a vakustumunyu vambiri va mina, a kuva va profeta a 1,260 wa masiku, na va ambele tinguwo ta tisakwa. [123]

⁴Lava hi tona tisinya timbiri ta maoliva ni timeza timbiri to veka tikandiya leti ti yimileko mahlweni ka Hosi ya misava. [124]

⁵Loku munhu a lava ku va bayisa, ku huma nzilo kanwini kabye, wu khadamula valala vabye; ni loku munhu a lava ku va bayisa i ta dayiswa zalezo. [125]

⁶Vona va na ni ntamu wo vala tilo, lezaku a vula yi ngani masikwini lawo va profetako ha wona; va na ni ntamu a ku hunzula mati ma maha nkhata; ni wa kuba misava hi zixaniso zi tsalangeneko, kota lezi va zi ranzako. [126]

⁷Zonake loku va hetile wukustumunyu gabye a xihari lexi xi humako nkeleni wa lieswila xi talwa navo, xi va hlula, xi va daya. [127]

⁸Ni zirumbi zabye zi ta su chanjala lomu ruweni ga muti wa hombe, lowu wu chuliwako hi moya, aku i Sodoma ni Gipite, laha Hosi yabye yi nga belelwa kona. [128]

⁹A vanhu va mifumo ni tixaka ni tirimi ni matiko va ta cuwuka zirumbi zabye a masiku manharu ni khihlanya, va nga vumeli a zirumbi zabye a ku lahliwa.

¹⁰Ni lava va akileko misaveni va tava ni migiyo ha vona, va tsaka, va rumelana zinyikiwo; hilezi a vaprofeti lava vambiri va lo karata lava va akileko misaveni. [129]

¹¹Loku ku hunzile masiku manharu ni khihlanya a moya wa wutomi wu tako hi ka Nungungulu wu lo enghena ka vona, va yima hi milenge yabye; ni lava va nga va wona va lo telwa hi kuchava ka hombe. [130]

¹²Va lozwa a gezu ga hombe gita hi le tilweni giku ka vona: Ngonani leno hehla. Va lo tlakukela tilweni hi refu, na va woniwa hi valala vabye. [131]

¹³Hi xwalexo xikhati ku wa hi kona a kutsekatseka ka hombe ka misava, ku lo khungumuka a xipanze xa wukhume xa muti; ku dawa a 7,000 wa vanhu hi kutsekatseka loko; lava va nga sele va lo chava, va dumisa Nungungulu wa tilo. [132]

¹⁴A khombo ga wumbiri gi hunzile, languta, a khombo ga wunharu gata lokuloku.

¹⁵A ngelosi ya wuntlhanu ni timbiri yi loba mpunzu wa yona; ku zwakala a magezu ya hombe le tilweni, maku ngalo: Makunu a mufumo wa misava wu lumba Hosi ya hina, na Kristu wa yona; yena i ta fuma kala kupinzuka ni kupinzuka. [133]

¹⁶Zonake a 24 wa manghanakana, lawa ma tshamileko zitshanwini za wona za wuhosi mahlweni ka Nungungulu, ma lowa hi tinghohe ta wona, ma khozela Nungungulu,

¹⁷maku: Ha ku bonga, Hosi Nungungulu wa Ntamu-wontlhe, Loyi u nga kona, Loyi u nga hi kona, hilezi u tekile a ntamu wontihe wa wena wa hombe, u sangule ku fuma. [134]

¹⁸A matiko ma lo zangara, kanilezi a zanga ya wena yi chikele, na xona xikhati xa ku lamula vafileko, ni xa ku chachazela a malanza ya wena a vaprofeti, ni vobasa, ni vona lava va chavako a vito ga wena, a vatsongwani ni vahombe, u tlhela u lovisa lava va onhako misava. [135]

¹⁹Ku lo vululiwa a tivati ta tempeli ya Nungungulu leyi yi nga le tilweni, ku woniwa a nghaxa ya xivumelwano xakwe lomu tempeleni yakwe. Zonake ku wa hi kona a kuhatima, ni kuvuma, ni kudzinza, ni kutsekatseka ka misava, ni vula ya hombe ya maralala. [136]