Read tshwa Kuvululelwa 13 Bible Online

Kuvululelwa 13 - tshwa bible

Kuvululelwa 13

¹Nzi lo yima sekeni ga bimbi, nzi wona a xihari xi huma bimbini, na xi hi ni khume ga timhonzo ni ntlhanu wa tihloko ni timbiri. Le timhonzweni ta xona xi wa hi ni khume ga zidlodlo, ni le tihlokweni ta xona ku wa tsalilwe a mavito ya tihlamba. [149]

²A xihari lexi nzi nga xi wona xi wa kotisa yingwe, a milenge ya xona kotisa ya ursu, ni nomu wa xona wu ku khwatsi i nomu wa nghala. Drako i lo xi nyika ntamu wakwe, ni xitshamu xakwe xa wuhosi, ni wuhosi ga hombe. [150]

³Yinwe ya tihloko ta xona yi lo woneka a ku khwatsi yi tlhabyilwe yi lava kufa; kanilezi a mbanga ya xona ya hombe yi lo hola; a misava yontlhe yi lo xi lanzela yi hlamala.

⁴Va lo khozela drako, hakuva i wa nyikile xihari a ntamu wa xona; va khozela ni xihari vaku: Himani a fananako ni xihari, himani a zi kotako kulwa naxo ke? [151]

⁵Xi lo nyikiwa a nomu wa ku wulawula a timhaka ta hombe ni tihlamba; xi nyikiwa ni ntamu wa ku tira a 42 wa tihweti. [152]

⁶Xi lo ahlama nomu wa xona kasi ku wulawula tihlamba ha Nungungulu, ni ku rukatela vito gakwe, ni tabernakeli gakwe, ni lava va tshamako le tilweni. [153]

⁷Xi lo nyikiwa ntamu wa kuva zilwa ni vobasa, xi va hlula: xi nyikiwa ni ntamu hehla ka tontlhe tixaka, ni mifumo, ni tirimi, ni matiko. [154]

⁸Vontlhe lava va akileko misaveni va ta xi khozela, vontlhe lava a mavito yabye ma nga tsaliwangiko bhukwini ga wutomi ga Yivana leyi yi nga tlhabyiwa hi le kusanguleni ka tiko. [155]

⁹Loyi a nga ni tindleve, ngha a ingisa.

¹⁰Loyi a yisako vanwani wukhumbini, yenawu i ta mahiwa khumbi; loyi a dayako hi supado, i ta dayiwawu hi supado. Kwalaho ka woneka a kutimisela ni kukholwa ka vobasa. [156]

¹¹Zonake nzi lo wona xinwani xihari xi huma misaveni; xi hi ni timhonzo timbiri to fanana ni ta yivana, xi lo wulawula khwatsi hi drako.

¹²Xi tira hi ntamu wontihe wa xihari xo sangula mahlweni ka xona. Xi kurumeta misava ni lava va akileko ka yona a ku khozela a xihari xo sangula, lexi a phanja ya xona ya hombe yi nga holiswa.

¹³Xi maha masingita ya hombe, lezaku xi maha ni nzilo wu relela hi le tilweni hehla ka misava, na va kari va zi wona vanhu. [157]

¹⁴Xi pengisa lava va akileko misaveni hi masingita lawa xi nyikilweko ntamu ku maha wona mahlweni ka xihari; xi byela a vaaki va misava lezaku va xi mahela a xifananiso a xihari lexi xi nga hi ni phanja ya supado, xi tlhela xi hanya. [158]

¹⁵Zonake xi lo kuma ntamu wa ku nyika kuhefemula ka xifananiso xa xihari, lezaku a xifananiso xa xihari xi ta zi kota ku wulawula, ni kuva va dawa vontlhe lava va nga kala ku khozela a xifananiso xa xihari.

¹⁶Xi lo kurumeta vontlhe a vatsongwani ni vahombe, lava va fumileko ni lava va vumalako, a va tlhatlhekileko ni tikhumbi, lezaku va vekwa xifungo canjeni gabye ga xinene, kutani zimombyeni zabye; [159]

¹⁷lezaku ku ngavi na munhu a zi kotako ku xava kutani ku xavisa, saseka loyi a na nga ni xifungo, gi nga vito ga xihari, kutani xihlayo xa vito ga xona. [160]

¹⁸Laha ku laveka wutlhari! Loyi a nga ni kupima a hlaye a xihlayo xa xihari, hakuva xihlayo xa munhu; a xihlayo xa xona i 666. [161]