Read tshwa Kuvululelwa 14 Bible Online

Kuvululelwa 14 - tshwa bible

Kuvululelwa 14

¹Zonake nzi lo cuwuka nzi wona Yivana na yi yimile xitsungeni xa Zioni, na yi hi ni 144,000 lava va tsalilweko a vito ga yona ni vito ga Dadani wa yona laha zimombyeni zabye. [162]

²Nzi lozwa a gezu ga le tilweni kotisa mati manyingi, ni kotisa guwa ga kudzinza ka hombe; ni gezu legi nzi nga gizwa gi wo khwatsi i gezu ga magubhu loku ma biwa: hi venyi va wona.

³Va wa yimbelela lisimu liswa mahlweni ka xitshamu xa wuhosi, ni mahlweni ka mune wa zimahwa zi hanyako ni manghanakana; ku wa nga hi kona munhu a zi kotako ku gonza lisimu lelo, saseka lava va 144,000, lava va xabyilweko misaveni. [163]

⁴Lava hi vona va nga kala ku ti nyenyezisa hi vavasati, hakuva va basile; hi lava va lanzako Yivana ni kwihi laha yi yako kona. Va xabyilwe vanhwini a kuva mbhanzo wo ranga ka Nungungulu ni ka Yivana. [164]

⁵A ku kumiwangi mawunwa milonwini yabye; a va na nanzu. [165]

⁶Zonake nzi lo wona yinwani ngelosi na yi puruma xikari ka tilo, na yi hi ni ivangeli ya pinzukelwa a kuva yiba hungu ha yona ka lava va akileko misaveni, ni ka wontihe matiko ni tixaka ni tirimi ni mifumo.

⁷Yiku ngalo: Chavani Nungungulu, mu mu dumisa; hakuva a xikhati xakwe xa ku lamula xi chikele. Khizamelani loyi a nga maha tilo ni misava ni bimbi ni tihlowo ta mati. [166]

⁸Ni ngelosi yinwani ya wumbiri, yi lo lanzela, yiku: I wile, i wile, Babuloni loyi wa hombe, loyi a nwisileko matiko wontihe a vinya ga zanga ga kubhaya kakwe. [167]

⁹Ni yinwani ngelosi, a ya wunharu yi ti lanzela, yiku hi gezu ga hombe: Loku munhu a khozela xihari ni xifananiso xa xona, a vekwa xifungo ximombyeni xakwe, kutani canjeni gakwe, [168]

¹⁰yenawu i tanwa a vinya ga zanga ya Nungungulu, legi gi chelilweko gombeni ga zanga yakwe gi nga luhlanywangiko; i ta xaniswa hi nzilo ni solufa mahlweni ka tingelosi to basa ni mahlweni ka Yivana. [169]

¹¹A musi wa kuxaniseka kabye wu tuvika kala kupinzuka ni kupinzuka; a va na kuhumula mumu ni wusiku lava va khozelako xihari ni xifananiso xa xona, ni wihi loyi a tekako a xifungo xa vito ga xona. [170]

¹²Hi laha ku wonekako a kutimisela ka vobasa, lava va hlayisako milayo ya Nungungulu ni kukholwa ka Jesu.

¹³Nzi lozwa a gezu ga le tilweni, giku: Tsala uku: Va katekile a vafileko lava va felako Hosini ku sukela lezi! A Moya wuku: Ina, va ta humula mitirweni yabye, hakuva a mitiro yabye ya va lanzela. [171]

¹⁴Nzi lo cuwuka nzi wona a refu go basa, hehla ka refu ku wa tshamile munwe wo fana ni Nʼwana wa munhu, na hi ni xidlodlo xa nzalama hlokweni yakwe, ni sikela go kariha canjeni gakwe. [172]

¹⁵Yinwani ngelosi yi lo huma tempeleni, yi vitana hi gezu ga hombe ka loyi a tshamileko hehla ka refu, yiku: Ruma sikela ga wena, u tshovela, hakuva a xikhati xa kutshovela xi chikele, hilezi ma womile a mavele ya misava. [173]

¹⁶Loyi a nga tshamile hehla ka refu i lo hoxa sikela gakwe misaveni, ni misava yi lo tshovelwa.

¹⁷Yinwani ngelosi yi lo huma tempeleni ya le tilweni, yonawu yi wa hi ni sikela go kariha.

¹⁸Ni yinwani ngelosi yi lo huma alatini, na yi hi ni ntamu hehla ka nzilo. Yi lo vitana hi gezu ga hombe ka leyi yi nga ni sikela go kariha, yiku: Ruma a sikela ga wena go kariha, u khaya zitata za xivina xa misava; hakuva a mauva ya xona ma buvile. [174]

¹⁹A ngelosi yi lo tsema hi sikela ga yona laha misaveni, yi khayela a mihanzu ya xivina xa misava, yi yi cheletela xigowolweni lexi xa hombe xa zanga ya Nungungulu.

²⁰A mihanzu yi lo kamelwa lomo xigowolweni lahandle ka muti, wu huma nkhata hi lomu xigowolweni wu maha ntalo kala wu chikela matonwini ya mahaxi, a pfhuka wa 1,600 ya mastadiu. [175]