Read tshwa Kuvululelwa 16 Bible Online

Kuvululelwa 16 - tshwa bible

Kuvululelwa 16

¹Zonake nzi lozwa a gezu ga hombe gi huma tempeleni, giku ka tingelosi ta ntlhanu ni timbiri: Fambani mu ya halata misaveni a ntlhanu wa mikhelo ni yimbiri ya zanga ya Nungungulu. [182]

²Leʼyo ranga yi lo famba, yi ya halata a mukhelo wa yona misaveni; zonake a vanhu lava va nga hi ni xifungo xa xihari, ni lava va khozelako xifananiso xa xona, va lo huma zilonza zo biha zi bayisako. [183]

³Leʼya wumbiri yi lo halata mukhelo wa yona bimbini; gi lo hunzuka nkhata wo khwatsi wa munhu a fileko; kufa zontlhe lezi zi hanyako zi nga lomo bimbini. [184]

⁴Leʼya wunharu yi lo halata mukhelo wa yona micongweni ni lomu tihlobyeni ta mati, ma hunzuka ma maha nkhata.

⁵Nzi lozwa a ngelosi ya mati, yiku: U lulamile, wena Loyi u nga kona, Loyi u nga hi kona, wena Wobasa, hakuva u lamulisile lezo. [185]

⁶Hakuva va halatile a nkhata wa vobasa ni wa vaprofeti; u va nyikile nkhata a kuva vanwa, va fanele lezo.

⁷Nzi lozwa alati gi wulawula, giku: Kunene, Hosi Nungungulu wa Ntamu-wontlhe, a kulamula ka wena ku nene, ku lulamile.

⁸Leʼya wumune yi lo halata mukhelo wa yona a gambyeni; gi nyikwa ntamu wa ku tlahulela vanhu hi nzilo.

⁹Ni vanhu va lo tlahulwa hi mumu wa hombe; va lo rukatela a vito ga Nungungulu loyi a nga ni ntamu hehla ka zixaniso lezo; a va hunzulukangi va mu dumisa. [186]

¹⁰Leʼya wuntlhanu yi lo halata mukhelo wa yona xitshanwini xa wuhosi xa xihari; ni mufumo wa xona wu lo phumiswa, a vanhu va lo lumetela tirimi tabye hi kota ya kubayisa, [187]

¹¹va rukatela Nungungulu wa tilo hi kota ya kubayisa kabye ni zilonza zabye; a va hunzulukangi mitirweni yabye.

¹²Leʼya wuntlhanu ni yinwe yi lo halata mukhelo wa yona le congweni lowu wa hombe Eufrate; ni mati ya wona ma lopswha, lezaku ku longiselwa ndlela ya tihosi ta le Mutsuwuka-gambo. [188]

¹³Nzi lo wona mimoya yinharu yo biha, yo khwatsi makhele, yi huma nonwini wa drako, ni nonwini wa xihari, ni nonwini wa muprofeti wa mawunwa. [189]

¹⁴Hakuva mimoya ya madimoni yi mahako zirewukiso, leyi yi yako tihosini ta misava yontlhe yi ya ti tsombanyisela a kulwa ka siku lego ga hombe ga Nungungulu wa Ntamu-wontlhe. [190]

¹⁵(Languta, nzata khwatsi hi khamba; i katekile loyi a rinzelako a hlayisa tinguwo takwe, lezaku a nga fambi a hi ximbyiri, va wona tingana takwe.) [191]

¹⁶A mimoya leyo yi lo tsombanyisa a tihosi wutshanwini legi hi xiHeberu va nge i Har-Magedoni.

¹⁷Leʼya wuntlhanu ni timbiri yi lo halata mukhelo wa yona ndengelengeni; ku lo huma a gezu ga hombe gita hi le xitshanwini xa wuhosi lomu tempeleni, giku: Zi mbhelile. [192]

¹⁸Ku wa hi kona a kuhatima, ni kuvuma, ni kudzinza, ni kutsekatseka ka hombe ka misava, loku cima ku nga tsekatsekisangiko nguvu kota lezo a ku sukela lezi vanhu va nga vangiwa laha misaveni. [193]

¹⁹A muti lowu wa hombe wu lo avanyeka zipanze zinharu, zonake ku khungumuka a miti ya matiko. Zonake Nungungulu i lo alakanya a Babuloni loyi wa hombe, a mu nwisa a gombe gi nga ni vinya ga zanga yakwe leyi yo tshisa. [194]

²⁰A zihlale zontlhe zi lo tsutsuma, ni zitsunga zi wa nga ha kumiwi.

²¹Ku lona vula ya maralala ya hombe hi le tilweni hehla ka vanhu, a kutika ka ginwe ni ginwani ku wa hi talenta; ni vanhu va lo rukatela Nungungulu hi kota ya xixaniso xa maralala, hakuva xi wa hi xa hombe nguvu. [195]