Read tshwa Kuvululelwa 2 Bible Online

Kuvululelwa 2 - tshwa bible

Kuvululelwa 2

¹Tsalela a ngelosi ya bandla ga le Efesusi, uku: Loyi a khomileko a ntlhanu wa tinyeleti ni timbiri canjeni gakwe ga xinene, loyi a fambako xikari ka timeza ta nzalama ta ntlhanu ni timbiri to veka tikandiya, i ngalo:

²Nza yi tiva mitiro ya wena, ni kupinyama ka wena ni kutimisela ka wena, ni lezaku a ku na kuhonisela hi vanhu va kubiha; u va hlolile lava va ti wulako vaku vapostoli, na va nga hi vona, u kumile lezaku vo hemba. [19]

³U na ni kutimisela, na u xaniseka hi kota ya vito ga mina, a ku karatangi.

⁴Kanilezi nzi na ni xisolo lexi ha wena, lezaku u tsikile a liranzo la wena lo sangula.

⁵Hikwalaho alakanya laha u wileko ha kona, u hunzuluka, u maha mitiro yo sangula; loku u nga mahi lezo nzi tata ka wena, nzi ta susa a meza ya wena ya kandiya a wutshanwini ga yona, loku u nga hunzuluki. [20]

⁶Kanilezi wudzunzo ginwe u nga nago, gaku wa venga a mitiro ya vaNikolatani, leyi nzi yi vengako na minawu.

⁷Loyi a nga ni tindleve, ngha a ingisa lezi a Moya wu byelako mabandla. Loyi a hlulako nzi ta mu nyika a kuva aga sinya ya wutomi, leyi yi nga kona Paradiseni ga Nungungulu. [21]

⁸Tsalela a ngelosi ya bandla ga le Smirna, uku: Loyi wa kusangula ni wa kugumesa, loyi a nga file a tlhela a hanya, i ngalo:

⁹Nza tiva a kuxaniseka ka wena, ni wusiwana ga wena, kasi lezo u fumile, ni ku rukatelwa hi vona lava va nge ngalo vaJuda, na va nga hi vona, kanilezi na va hi va sinagoga ga Satani. [22]

¹⁰U nga chavi nchumu ka lezi u ta nga xaniseka ha zona. Languta, Satani i ta khotsela vanwani va nwina paxweni, a kuva mu ringiwa, mu xaniswa khume ga masiku. Tsumbeka kala kufeni, nzi ta ku nyika xidlodlo xa wutomi. [23]

¹¹Loyi a nga ni tindleve, ngha a ingisa lezi a Moya wu byelako mabandla. Loyi a hlulako a nga ta bayiswa hi kufa ka wumbiri. [24]

¹²Tsalela a ngelosi ya bandla ga le Pergamumi, uku: Loyi a nga ni supado yo kariha ya wutlha gimbiri, i ngalo:

¹³Nza ku tiva laha u tshamako kona, laha xi nga kona a xitshamu xa wuhosi xa Satani. Hambu zi hi tano, u khomisile a vito ga mina, a ku kanetangi a kukholwa ka mina, hambu masikwini ya Antipasi, a kustumunyu wa mina a kholekileko, loyi a nga dawa xikari ka nwina, laha Satani a akileko kona.

¹⁴Kanilezi nzi na ni zisolo zinwani ha wena, hakuva laho u na ni vanwani lava va namarelako a gonzo ya Balami, loyi a nga gonzisa Balaki a ku veka xikhunguvanyiso mahlweni ka vanana va Israeli, lezaku vaga zakuga lezi zi phahlelweko zifananisweni, ni ku bhaya. [25]

¹⁵Hizalezo u navo vanwani lava va namarelako kugonziseni ka vaNikolatani.

¹⁶Hunzuluka! Loku u nga hunzuluki nzi ta hatlisa nzita ka wena, nzi talwa navo hi supado ya nomu wa mina. [26]

¹⁷Loyi a nga ni tindleve, ngha a ingisa lezi a Moya wu byelako mabandla. Loyi a hlulako nzi ta mu nyika a manna ma fihlilweko, nzi mu nyika ni ribye go basa, legi ku tsalilweko ka gona a vito giswa; a ku na munhu a gi tivako, saseka loyi a gi amukelako. [27]

¹⁸Tsalela a ngelosi ya bandla ga le Tiatira, uku: A Nʼwana wa Nungungulu loyi a nga ni mahlo yo khwatsi malangavi ya nzilo, ni mikonzo yo khwatsi i suku wu ngangamelako, i ngalo:

¹⁹Nza yi tiva mitiro ya wena, ni liranzo la wena, ni kukholwa ka wena ni kutira ni kutimisela, ni lezaku mitiro ya wena yo gumesa yi hunza leyi yo ranga.

²⁰Kanilezi nzi na ni xisolo lexi ha wena, lezaku u vumela Jezebeli, a wasati loyi a ti wulako ku muprofeti, a gonzisa ni ku xengetela a malanza ya mina a kuva ma bhaya, ni kuga nyama yi phahlelweko zifananisweni. [28]

²¹Nzi mu nyikile xikhati a kuva a hunzuluka, kanilezi a nga zi ranzi a ku hunzuluka kubhayeni kakwe. [29]

²²Languta, nzi ta mu wisela sangweni ga wubabyi, ni ku yisa lava va bhayileko naye kuxanisekeni ka hombe, loku va nga hunzuluki mitirweni yakwe.

²³A vana vakwe nzi ta va daya hi kufa; zonake a mabandla wontihe ma ta zi tiva lezaku hi mina nzi hlolako tiswa ni timbilu, nzi ta nyika munwe ni munwani wa nwina khwatsi hi mitiro yakwe. [30]

²⁴Kanilezi ka vanwani va nwina va nga le Tiatira, nwentlhe lava mu nga vumeliko a gonzo leyi, lava mu nga tiviko a kueta ka Satani, kota lezi va wulako vona, mina nzi ngalo: Nzi nga ta mu rwexa munwani nzhwalo, [31]

²⁵ntsena khomisisani lezi mu nga nazo nzi kala nzi chikela.

²⁶Loyi a hlulako, a kholeka mitirweni ya mina kala kugumesa, nzi ta mu nyika ntamu hehla ka matiko. [32]

²⁷I ta ma risa hi nhonga ya xiketse, a ma fayetela zipanzana khwatsi hi zibya za wumba; khwatsi hilezi na minawu nzi nga nyikiswa zona hi Dadani wa mina. [33]

²⁸Nzi ta mu nyika Mahlahle wa mixo. [34]

²⁹Loyi a nga ni tindleve, ngha a ingisa lezi a Moya wu byelako mabandla.