Read tshwa Kuvululelwa 6 Bible Online

Kuvululelwa 6 - tshwa bible

Kuvululelwa 6

¹Mina nzi lo wona laha a Yivana yi nga namula xinwe xa zifungo lezi za ntlhanu ni zimbiri; na nzizwa xinwe xa ximahwa lezi za mune zi hanyako, xi wula hi gezu ga kudzinza, xiku: Tana!

²Nzi lo cuwuka, nzi wona a haxi go basa; ni loyi a nga khilele hehla ka gona i wa hi ni wura; i lo nyikwa xidlodlo, i lo huma kota muhluli a yako kuhluleni. [68]

³Laha yi nga namula a xifungo xa wumbiri, nzi lozwa a ximahwa xa wumbiri, xiku: Tana!

⁴Ku lo huma ginwani haxi, go pswhuka; loyi a nga khilele hehla ka gona i lo hiwa ntamu a kuva a susa kurula misaveni, kasi va dayana; i lo nyikwa a supado ya hombe. [69]

⁵Laha yi nga namula a xifungo xa wunharu, nzi lozwa a ximahwa xa wunharu, xiku: Tana! Nzi lo cuwuka nzi wona a haxi ga ntima, ni loyi a nga gi khilele i wa hi ni xikalo canjeni gakwe.

⁶Nzi lozwa ku khwatsi i gezu xikari ka zimahwa zi hanyako za mune, giku: A litro yinwe ya tirigo i cheleni, ni tilitro tinharu ta sevada i cheleni; kanilezi u nga onhi a mafura ni vinya. [70]

⁷Laha yi nga namula a xifungo xa wumune, nzi lozwa a gezu ga ximahwa xa wumune, giku: Tana!

⁸Nzi lo cuwuka nzi wona a haxi go balala; ni loyi a nga gi khilele a vito gakwe i wa hi Kufa, a wutshamu ga vafileko gi lo mu lanzela. Va lo nyikwa ntamu hehla ka xipanze xa wumune xa misava, kasi ku daya hi supado, ni ndlala, ni ntungu, ni zihari za misava! [71]

⁹Laha yi nga namula a xifungo xa wuntlhanu, nzi lo wona lahasi ka alati a mihefemulo ya lava va delweko hi kota ya mhaka ya Nungungulu, ni wukustumunyu legi va nga hi nago. [72]

¹⁰Va loba huwa hi gezu ga hombe, vaku: Hosi yo basa ni ya zinene, ku ta kala rini u nga lamuli u photela a nkhata wa hina ka lava va akileko misaveni ke? [73]

¹¹Ku lo hiwa ka munwe ni munwani wa vona a nguwo yo basa yo leha; va lo byeliwa a kuva va humula xikhatanyana, wu kala wu tatiseka a ntsengo wa malanza-kulobye ni vamakabye lava va ta nga dawa khwatsi hi vona. [74]

¹²Nzi lo wona laha yi nga namula a xifungo xa wuntlhanu ni xinwe, ku wa hi kona a kutsekatseka ka hombe ka misava; a gambo gi lo hunzuka gi maha ntima khwatsi hi nguwo ya xirilo, a hweti yontlhe yi lo maha ku khwatsi i nkhata. [75]

¹³A tinyeleti ta tilo ti lowa misaveni, kotisa nkuwu wu tlhatlhako a makuwu ya wona ya mambisi, loku wu ninginizwa hi mheho ya hombe.

¹⁴A tilo gi lo suswa khwatsi hi bhuku loku gi: songiwa; ni zitsunga zontlhe ni zihlale zi lo suswa wutshanwini ga zona. [76]

¹⁵A tihosi ta misava, ni tihosana, ni tinduna ta hombe, ni vanhu va fumileko, ni vanhu va ntamu, ni tikhumbi tontlhe ni lava va tlhatlhekileko, va lo fihlala mikovotlweni ni lomu maribyeni ya zitsunga; [77]

¹⁶vaku ka zitsunga ni le maribyeni: Wanani hehla ka hina, mu hi fihla nghoheni ya loyi a tshamileko xitshanwini xa wuhosi, ni khulweni ga Yivana. [78]

¹⁷Hakuva a siku ga hombe ga khulo gabye gi chikele, himani a zi kotako ku yima ke? [79]