Read tshwa Kuvululelwa 7 Bible Online

Kuvululelwa 7 - tshwa bible

Kuvululelwa 7

¹Anzhako ka lezo nzi lo wona mune wa tingelosi na ti yimile matlhelweni ya mune ya misava, na ti tsimbetela a mune wa timheho ta misava, lezaku ku nga pupuxi mheho misaveni, kutani le bimbini, hambu ni ka sinya yinwe. [80]

²Zonake nzi lo wona yinwani ngelosi na yi huma hi le Mutsuwuka-gambo, yi hi ni xifungo xa Nungungulu a hanyako. Yi loba hungu hi gezu ga hombe ka tingelosi leti ta mune ti nyikilweko a ntamu wa ku onha a misava ni bimbi,

³yiku: Mu nga onhi misava, kutani bimbi, hambu ni tisinya, hi kala hi veka zifungo zimombyeni za malanza ya Nungungulu wa hina. [81]

⁴Nzi lozwa a ntsengo wa lava va nga vekwa zifungo, va wa hi 144,000 va nga fungiwa va tixaka tontlhe ta vanana va ka Israeli: [82]

⁵Le lixakeni la ka Juda lava va nga vekiwa xifungo va wa hi 12,000; Le lixakeni la ka Rubeni lava va nga vekiwa xifungo va wa hi 12,000; Le lixakeni la ka Gadi lava va nga vekiwa xifungo va wa hi 12,000;

⁶Le lixakeni la ka Axeri lava va nga vekiwa xifungo va wa hi 12,000; Le lixakeni la ka Naftali lava va nga vekiwa xifungo va wa hi 12,000; Le lixakeni la ka Manase lava va nga vekiwa xifungo va wa hi 12,000;

⁷Le lixakeni la ka Simeoni lava va nga vekiwa xifungo va wa hi 12,000; Le lixakeni la ka Levi lava va nga vekiwa xifungo va wa hi 12,000; Le lixakeni la ka Isakari lava va nga vekiwa xifungo va wa hi 12,000;

⁸Le lixakeni la ka Zebuloni lava va nga vekiwa xifungo va wa hi 12,000; Le lixakeni la ka Josefa lava va nga vekiwa xifungo va wa hi 12,000; Le lixakeni la ka Benjamini lava va nga vekiwa xifungo va wa hi 12,000.

⁹Anzhako ka lezo nzi lo cuwuka, nzi wona a xidlemo xa tsanza-vahlayi, xa matiko wontihe, ni tixaka, ni mifumo, ni tirimi, na xi yimile mahlweni ka xitshamu xa wuhosi ni mahlweni ka Yivana, na va ambele a tinguwo to basa to leha, na va hi ni micinzu mandleni yabye; [83]

¹⁰va kanyuluka hi gezu ga hombe, vaku: A kuhanyisa ku lumba Nungungulu wa hina loyi a tshamileko xitshanwini xa wuhosi ni Yivana. [84]

¹¹A tingelosi tontlhe leti ti nga yimile ti ranzela xitshamu xa wuhosi, ni manghanakana, ni zimahwa zi hanyako za mune, zi lowa hi tinghohe mahlweni ka xitshamu xa wuhosi, zi khozela Nungungulu,

¹²ziku: Amen! A kukhesa, ni wudzunzo, ni wutlhari, ni kubonga, ni wudumo, ni wuhosi, ni ntamu, a zive ka Nungungulu wa hina kala kupinzuka ni kupinzuka. Amen.

¹³Zonake ku lo wula nghanakana ginwe ka mina, giku: Lava va ambeleko a tinguwo leti ta kubasa to leha mbamani, vata hi kwihi ke?

¹⁴Nziku ka gona: Hosi yanga, wa zi tiva wena. Giku ka mina: Lava hi vona va humako kuxanisekeni ka hombe, va hlazile tinguwo tabye va ti basisa nkhateni wa Yivana. [85]

¹⁵Hikwalaho va yimile mahlweni ka xitshamu xa wuhosi xa Nungungulu, va mu tirela mumu ni wusiku tempeleni yakwe. Loyi a tshamileko xitshanwini xa wuhosi i ta tshambuluta tabernakeli gakwe hehla kabye. [86]

¹⁶Va nga ha tazwa ndlala, hambu ni tora, va nga ha ta tlahulwa hi gambo ni kuhisa. [87]

¹⁷Hakuva a Yivana yi nga laha xikari mahlweni ka xitshamu xa wuhosi yi tava murisi wabye, yi va hletela tihlobyeni ta mati ya wutomi; Nungungulu i ta hlanguta mihloti yontlhe mahlweni yabye. [88]