Read tshwa Rute 1 Bible Online

Rute 1 - tshwa bible

Rute 1

¹Xikhatini xa kufuma ka valamuli, ku wa hi ni ndlala lomu tikweni ga ka Israeli. A munhu wo kari wa le Betlehema-Juda i loya ni sati wakwe ni vafana vakwe va vambiri le Moabi aya luvela.

²A vito ga munhu loye i wa hi Elimeleki; a vito ga sati wakwe i wa hi Naomi; a mavito ya vafana vakwe va vambiri hi Mahloni na Kilioni. Va wa hi vaEfrate ya le Betlehema-Juda. Va loya aka le Moabi.

³Elimeleki, a nuna wa Naomi, i lofa. Naomi i lo sala ni vafana vakwe va vambiri.

⁴Va lo teka vasati ka va ka Moabi: a munwe ku wa hi Orpa, a munwani ku wa hi Rute. Va tshamile lomo Xipimo xa 10 wa malembe.

⁵Mahloni na Kilioni vonawu hi wumbiri gabye va lofa, a wasati i sala yece hi ku felwa hi vafana vakwe va vambiri ni nuna wakwe.

⁶Zonake i lo suka ni vakatamwane vakwe le tikweni ga Moabi, hakuva i wa zwile lomu tikweni ga Moabi lezaku Jehova i enzele vanhu vakwe, hi ku va nyika zakuga.

⁷I lo rura lomu tikweni legi a nga hi ka gona, zinwe ni vakatamwane vakwe va vambiri. Kanilezi laha na va tlhelela tikweni ga Juda,

⁸Naomi i te ngalo ka vakatamwane vakwe: Tlhelani! Loyi ni loyi a famba ndlwini ya mamani wakwe, Jehova a mu hlayisa hi wuxinji, khwatsi hi lezi mu nga maha ka vamatsuva ni ka mina.

⁹Jehova ngha a muha kurula, munwe ni munwani wa nwina, lomu tindlwini ta vanuna va nwina. Zonake i lo va pswopswa. Va lo rila, vaku kakwe:

¹⁰Kokwihi, hi ta famba na wena le tikweni ga nwina.

¹¹Naomi aku ka vona: Tlhelani, vana vanga! Mu ta nzi lanzela yini ke? Mu alakanya lezaku nza ha tava ni vana lava va ta nga maha vanuna va nwina ke? [1]

¹²Tlhelani, vana vanga! Nzi kumbile, a nza ha zi koti ku tekiwa. Hambu loku nzi wa tsumba lezaku zi koteka, nzi ti nyikela ka wanuna wusiku legi, nzi pswala vana,

¹³mu wa ta va rinzela kala va kula ke? Mu wa ta ti boha mu nga tekwi hi vanwani vavanuna ke? A hi zona, vana vanga! Zona za nzi vangela nguvu hlomulo ku hunza nwina, hakuva a canja ga Jehova gi nzi tlhelisele nzhako.

¹⁴Va lo engeta va rila. Orpa i lo pswopswa a nwingi wakwe a tlhela, kanilezi Rute i lo namarela ka yena.

¹⁵Naomi aku kakwe: Katamwane, a katakuloni i tlhelile a famba kabye ni ka nungungulu wa ka kabye. Hikwalaho tlhelawu kota katakuloni!

¹⁶Kanilezi Rute i lo hlamula, aku: U nga nzi khongoteli ku ku tsika nzi tlhela. Hakuva ni kwihi laha u yako kona, minawu nzi taya; ni kwihi laha u tshamako kona, minawu nzi ta tshama laho. A vanhu va wena mbanhu va minawu; a Nungungulu wa wena i Nungungulu wa minawu.

¹⁷Laha u ta nga fela kona, minawu nzi ta fela laho, nzi lahliwa kwalaho. Ngha Jehova a nzi tsayisa nguvu loku nzi vumela a xilo xo kari ku nzi hambanyisa na wena, ahandle ka kufa.

¹⁸Naomi i lo miyela laha a nga wona lezaku a katamwane wakwe i tiyisile ku mu lanzela.

¹⁹Zinghaho va lo famba hi wumbiri gabye kala va ya chikela Betlehema. Laha va nga wa chikele Betlehema, a muti wontihe wu lo va hlamala, a vavasati vaku: A hi Naomi loyi ke?

²⁰Yena i lo va hlamula, aku: Mu nga nzi vitani kambe ku Naomi, nzi vitaneni ku Mara; hakuva Nyamintamu i nzi tlulisile mihumbo ya hombe nguvu.

²¹Nzi sukile na nzi tele, kanilezi Jehova i nzi wuyisile na nzi hi phanga. Mu ta nzi vitanela yini ku Naomi, na mu wona lezaku Jehova i nzi hoxile, ni Nyamintamu i nzi vangele hlomulo ke?

²²Zinghaho Naomi i lo wuya ni katamwane wakwe Rute a muMoabi, na va sukela le Moabi. Va lo chikela Betlehema hi xikhati xa kusangula ka kuhulwa ka sevada.