Read tshwa Rute 2 Bible Online

Rute 2 - tshwa bible

Rute 2

¹Naomi i wa hi ni xaka ga nuna wakwe, a nga hi munhu wa hombe wo fuma, wa le ngangweni wa ka Elimeleki. A vito gakwe i wa hi Boazi.

²Rute, a muMoabi, i te ngalo ka Naomi: Nza kombela kuya masinwini nzi ya kutsula zipupu za mavele ka loyi a ta nga nzi mahela tipswalo. A nwingi wakwe i lo hlamula, aku: Famba, nwananga! [2]

³I lo famba a ya enghena lomu masinwini a kutsula hi lenzhako ka vatshoveli, kasi lezo a simu gwalego ga Boazi a xaka ga Elimeleki.

⁴Boazi i lo chikela na ata hi le Betlehema, aku ngalo ka vatshoveli: Jehova ave na nwina! Vonawu vaku: Jehova a ku katekise!

⁵Zonake Boazi aku ka nanza gakwe, gi nga hi nduna ya vatshoveli: Hi nwamani a pswatsana loyi ke?

⁶A nduna ya vatshoveli yiku: I pswatsana wa muMoabi, loyi a nga wuya na Naomi hi le tikweni ga Moabi.

⁷I lo taku ka hina: Nzi kombela ku kutsula, nzi hlengeletela tinyanza lenzhako ka vatshoveli. Hikwalaho i tile; kusukela ni mixo kala lezi, ahandle ka xikhatana xi tsongwani lexi a nga humula le ndlwini.

⁸Zonake Boazi i te ngalo ka Rute: Ingisa, nwananga! U nga humi lomu sinwini legi, u ya kutsula ka manwani masimu; tshama ni malanza ya mina ya xisati.

⁹U ta cuwuka a simu legi va ta nga tshovela ka gona, u va lanzela hi lenzhako. Nzi layile majaha ya mina lezaku ma nga ku khumbi; ni loku uzwa tora, yana zibyeni u yanwa a mati lawa ma khilweko hi majaha ya mina.

¹⁰Zonake i lowa lahasi hi nghohe yakwe, a khizama aku: Hi kuyini u rizi mahela tipswalo, laha na u wona lezaku mina nzi wa matiko ke?

¹¹Boazi aku kakwe: Nzi bikelwe zilo zontlhe lezi u zi mahileko ka nwingi wa wena, kusukela kufeni ka nuna wa wena; lezaku u tsikile a raru ni nyine wa wena, ni tiko ga wena ga maheleko, uta ka tiko legi u nga kala u nga gi tivi.

¹²Jehova a ku tlhelisele mitiro ya wena, u amukela nchachazelo wa hombe hi ka Jehova Nungungulu wa ka Israeli, loyi u tileko hasi ka tipapa takwe kasi ku ta kuma wuponelo. [3]

¹³Zonake yena aku: Hosi yanga, u nzi mahele tipswalo; hakuva u nzi tangalisile, u wulawula hi wuxinji ka nanza ga wena; hambu loku nzi nga ringani ni ginwe ga malanza ya wena ya xisati.

¹⁴Hi xikhati xa kuga, Boazi i lo engeta aku kakwe: Tshinela u taga zakuga; covela xikhemu xa wena ni vinagre. I lo tshama ni vatshoveli. I lo mu nyika mavele ma katingilweko aga, a xura, a veka lawa ma seleko.

¹⁵Laha a ngaya kukutsuleni, Boazi i lo byela majaha, aku: Hambu lomu ka tinyanza mu tsikeni a kutsula; mu nga mu beleteli.

¹⁶Ni kambe mu wa taya hi ku pambula zi tsongwani lomu ka tinyanza, kasi a fela ku kutsula. Mu nga mu kawuki!

¹⁷Zinghaho i lo kutsula lomu masinwini kala laha gambyeni. I lo phopha a mavele lawa a nga wa kutsule, a kuma xipimo xa efa ya sevada.

¹⁸I lo teka mavele lawo a famba nawo kaya. A nwingi wakwe i lo wona lezi a nga wa kutsule. I lo humesa ni zakuga lezi a nga wa zi siyile, a mu nyika.

¹⁹A nwingi wakwe aku kakwe: U kutsule kwihi nyamutlha? U wa tira kwihi? A katekiswe a munhu loye a ku amukeleko! Yena i lo byela a nwingi wakwe aku: A munhu loyi nzi nga tira kakwe nyamutlha a vito gakwe hi Boazi.

²⁰Naomi aku ka katamwane wakwe: A katekiswe hi Jehova, hakuva i mahile wuxinji ka vahanyako ni ka vafileko. Naomi a engeta aku: A munhu loyi i xaka ga hina; munwe wa maxaka ya hina ya zinene.

²¹Rute a muMoabi aku: Ina, i te ngalo ka mina: U nga hambani ni malanza ya mina, kala va mbheta ku tshovela mavele ya mina.

²²Naomi aku ka katamwane wakwe Rute: Nwananga, zi sasekile a kuva u famba ni malanza yakwe ya xisati, kasi va nga ku kumi ka manwani masimu.

²³Zinghaho kukutsuleni kakwe i lo namarela ka malanza ya xisati ya Boazi kala va mbheta ku hula sevada ni mavele. Kanilezi i wa tshama ni nwingi wakwe.