Read tshwa 1 Samueli 11 Bible Online

1 Samueli 11 - tshwa bible

1 Samueli 11

¹Zonake Nahaxi, a muAmoni, i lo ta gova kusuhani ni Jebexe-Gileade, kasi a va hlasela; a vanhu vontlhe va le Jebexe-Gileade vaku ka Nahaxi: Maha xivumelwano na hina, hina hi ta ku khozela.

²Nahaxi, a muAmoni, i lo va hlamula, aku: Nzi ta maha xivumelwano na nwina hi ndlela leyi: Nwina nwentlhe, a munwe ni munwani nzi ta mu bhoxa a tihlo ga xinene, nzi veka lexo xiruko hehla ka vontlhe va ka Israeli.

³A masingalakati ya le Jebexe-Gileade ma te ngalo kakwe: Hi nyike ntlhanu wa masiku ni mambiri, kasi hi fela ku rumela mitsumi tikweni gontlhe ga ka Israeli; zonake loku hi nga kumi a munhu wa ku hi hlanguta, hi ta ta ti nyikela ka wena.

⁴Zonake a mitsumi yi loya le Gibea wa Saule, yi ya tivisa vanhu hi timhaka leti. Vontlhe vanhu va lo kanyuluka va rila.

⁵Saule i wa wuya hi le masinwini, na a lanza tinkavi takwe. A nge ngalo: Xini xi mahekileko xikari ka vanhu lavo va rilisako lezo? Zonake va lo mu hlawutela a timhaka ta va le Jebexe,

⁶Laha a nga wa zwile timhaka leto, a Moya wa Nungungulu wu lo ta enghena ka yena hi ntamu, a zanga yakwe yi vindlukiswa nguvu.

⁷Zonake i lo tlhava a patswa wa tinkavi, a ti maha zitlubyana a zi rumela tikweni gontlhe ga ka Israeli hi canja ga mitsukano, aku: Kani himani a to kala ku huma a lanza Saule na Samueli, a tihomu takwe ti ta mahiwa kota lezi. A xichabyo xa ka Jehova xi lota hehla kabye, a vanhu va huma na va bohene hi moya munwe. [22]

⁸Saule i lo va hlaya le Bezeka. A vana va ka Israeli va wa hi 300,000, ni vanhu va ka Juda va wa hi 30,000.

⁹Vona va te ngalo ka mitsumi leyo yi nga wa tile: Mu taya byela a vanhu va le Jebexe-Gileade, muku: Manziko, hi xikhati lexi a gambo gi hisako nguvu, mu ta poniswa. Zonake a mitsumi yi lo tlhela yi ya tivisa timhaka leto ka va le Jebexe. A vanhu lavo va lo tsaka.

¹⁰A vanhu va le Jebexe va te ngalo ka va ka Amoni: Manziko hi ta ti nyikela ka nwina, kasi ma maha ka hina zontlhe lezo mu zi ranzako.

¹¹Makunu hi siku gi gamelako, Saule i lo avanyisa a vanhu hi mabutho manharu, zonake va lo enghena wugovelweni ga valala hi xikhati xa xirinzo xa mixo, va lo hlasela va ka Amoni kala gi hisa. Ni lava va seleko va lo hangalaswa. A ku na nga sala ni bambiri va ku famba khatiginwe.

¹²A vanhu vaku ka Samueli: Himani loyi a ngaku: Kasi Saule i ta hi fumela ke? Hi nyikeni vanhu lavo hi va daya.

¹³Kanilezi Saule i te ngalo: Cima ku nga tava kona wa ku dayiwe legi siku, hakuva inyamutlha Jehova i hanyisile Israeli.

¹⁴Zonake Samueli i te ngalo ka vanhu: Ngonani hi famba le Gilgali, hi ta ya tiyisa mufumo leyo.

¹⁵Zonake a vanhu vontlhe va loya le Gilgali; va lo ya yimisa Saule a ku maha hosi mahlweni ka Jehova le Gilgali. Va lo nyikela miphahlelo ya kurula mahlweni ka Jehova. Zonake Saule ni vontlhe va ka Israeli va lo tsaka nguvu.